19 Tetor 2021

Tregu i pasurive të patundshme në SHBA përjeton rritje të pazakontë

Washington, 31 maj - Sipas Shoqatës Kombëtare amerikane të Shitësve të Patundshmërive, në vitin 2020 niveli i kërkesave për blerje shtëpish ka qenë më i larti që nga viti 2006.

Ekspertët parashikojnë se kërkesat për blerje në tregun e pasurive të patundshme do të mbeten të larta për të paktën 6 muaj.  

Ekspertët thonë se që nga prilli i vitit 2020, tregu i pasurive të patundshme në vend është rritur, kryesisht falë normave rekord të ulëta të interesit për huatë, që ishin mesatarisht 2.7% në vitin 2020, thotë Shoqata Kombëtare e Patundshmërive.

Amerikanët e moshave 25 deri 40 vjeç hynë në tregun e shtëpive në mënyrë aktive. Sipas Byrosë Amerikane të Regjistrimit të Popullsisë, ata përbëjnë rreth 22% të popullsisë.

“Ata janë brezi me numrin më të madh të njerëzve dhe po arrijnë moshën e blerjes së shtëpive. Pra, ata po arrijnë në mesin e të 30-ave. Ata duan të stabilizohen, duan të blejnë shtëpi", thotë zëdhënësja e kompanisë Zillow, Amanda Pendelton.

Për këtë arsye u rritën kërkesat për blerje. Një nga faqet më të njohura të internetit për pasuritë e patundshme, Zillow, regjistroi një rritje prej 1.5 miliardë klikimesh. Dhe thjesht nuk ka shtëpi të mjaftueshme për të gjithë ata që kërkojnë të blejnë.

"Sipas vlerësimit tim, në të gjithë vendin ka një mungesë prej gjashtë milionë shtëpish", thotë Lawrence Yun nga Shoqata Kombëtare e Shitësve të Pasurive të Patundshme.

Shoqata Kombëtare e Ndërtuesve të Shtëpive gjithashtu pranon mungesën e shtëpive, por thotë se numri i tyre është tre herë më i vogël. Ajo shton se problemi ka ekzistuar në dekadën e fundit, dhe pandemia thjesht e ka nxjerrë në pah këtë.

“Recesioni i madh ishte absolutisht shkatërrues për industrinë e shtëpive, dhe shumë njerëz nuk u kthyen më në punë. Pra, ende kemi një deficit të fuqisë punëtore të kualifikuar për shkak të kësaj. Dhe atëherë të rinjtë nuk ishin të interesuar të punonin në industrinë e ndërtimit", thotë Danushka Nanayakkara nga Shoqata Kombëtare e Ndërtuesve.

Kërkesat e larta të shoqëruara me mungesën e shtëpive kanë shkaktuar rritjen e çmimit.

"Vlera e shtëpive në Shtetet e Bashkuara është rritur 10% gjatë vitit të kaluar, dhe shtëpitë po shiten mesatarisht brenda 14 ditëve, 20 ditë më shpejt sesa një vit më parë", thotë zëdhënësja e kompanisë Zillow, Amanda Pendelton.

Megjithatë, ekspertët thonë se tregu i shtëpive nuk ka shumë të ngjarë të bjerë ashtu si në vitin 2008. Një nga arsyet janë kushtet më të rrepta të huazimit.

"Kur të rriten normat e interesit, do të shohim një sheshim të çmimit të shtëpive. Normat e interesit do të rriten në gjashtë ose 12 muajt e ardhshëm", thotë eksperti i pasurive të patundshme, Ken Johnson.

Zyrtarët e Shoqatës së Patundshmërive besojnë se tregu do të stabilizohet deri në vitin 2022 kur ata parashikojnë një rënie të çmimeve.

Kalendari

Ngjarjet e datës 19 Tetor 2021

- Mbahet seanca plenare e Kuvendit të Republikës së Kosovës. (Ndërtesa e Kuvendit, ora 10:00)

- Shefi i Misionit për Vëzhgimin e Zgjedhjeve nga BE Lukas Mandl dhe Udhëheqësja e Delegacionit të Anëtarëve të Parlamentit Evropian Viola von Cramon-Taubadel mbajnë konferencë për shtyp lidhur me për zgjedhjet lokale në Kosovë. (Hotel Swiss Diamond, ora 11:00)

- Organizata për Rritjen e Cilësisë në Arsim publikon raportin "Transparenca dhe llogaridhënia në universitetet publike në Kosovë - Mos - Informimi i Publikut 3". (Swiss Diamond Hotel, ora 11:00)

- Komisioni Evropian do ta publikojë paketën vjetore të zgjerimit, përfshirë Raportet e Vendeve ku do te mbahet konferencë për shtyp nga Komisioneri për Fqinjësi dhe Zgjerimi, Oliver Varhelyi. (Transmetimi në faqen e Zyrës së BE-së në Facebook, ora 17:15)

- Teatri i Prishtinës Dodona shfaq “Bob Vatsoni bie nga kati i nëntë por nuk vdes plotësisht”. (Teatri Dodona, ora 17:30)

- Shefi i Zyrës së BE-së, Tomas Szunyog i dorëzon raportin e Komisionit Evropian Kryeministrit të Kosovës, Albin Kurti me ç'rast do të mbajnë edhe një konferencë te përbashkët për shtyp, ora 18:30)