05 Korrik 2022

“Sharri” ende pa listën për 20-përqindësh

Prishtinë, 21 janar - Ka përfunduar procesi i privatizimit për ndërmarrjen “Sharr”, e cila ka qenë e përbërë nga katër njësi punuese: \"Lepenci\" në Kaçanik, \"Silcapor\" në Doganaj (Kaçanik), \"Sharrsaloniti\" në Han të Elezit dhe “Sharrcemi” në Han të Elezit”, mirëpo ende nuk është bërë gati lista për shpërndarjen e 20-përqindëshit për punëtorët e kësaj ndërmarrje.

Zëdhënësi i Agjencisë Kosovare të Privatizimit (AKP), Yll Kaloshi, ka thënë se AKP-ja ende nuk ka listë të punëtorëve të kualifikuar, të cilët do ta përfitonin 20-përqindëshin nga çmimi i shitjes së ndërmarrjes “Sharr”.

“Tash për tash nuk dihet se sa punëtorë do të jenë të përfshirë në këtë listë. Për këtë arsye nuk dihet as se kur do të bëhet shpërndarja e mjeteve që u takojnë atyre”, ka thënë Kaloshi.

Kaloshi është shprehur se gjatë vitit që shkoi janë bërë hapa shumë të rëndësishëm në përshpejtimin e shpërndarjes së 20-përqindëshit. “Deri më tani janë shpërndarë 34 milionë euro për punëtorët nga pjesa e 20-përqindëshit.

Ish-AKM-ja ka shpërndarë rreth 14 milionë euro, kurse AKP-ja për dy vjet ka arritur ta dyfishojë këtë shumë dhe t’i shpërndajë rreth 20 milionë euro. Ky është një sukses i madh, kur merren parasysh vështirësitë që kanë ekzistuar me Odën e Veçantë të Gjykatës Supreme të Kosovës”, ka theksuar Kaloshi.

Kurse kryetari i Bashkimit të Sindikatave të Pavarura të Kosovës (BSBK), Haxhi Arifi, ka deklaruar se deri në fund të marsit do të përfundojë shpërndarja e 20-përqindëshit për punëtorët e ndërmarrjeve shoqërore të privatizuara.

“Të gjithë punëtorët e ndërmarrjeve shoqërore të privatizuara deri në fund të marsit do t’i marrin paratë të cilat u takojnë nga 20-përqindëshi, por problem do të sjellin ankesat të cilët janë bërë në Odën e Veçantë”, ka theksuar ai.
 

Gazeta Epoka e RE

Kalendari

Ngjarjet e datës 5 korrik 2022

- Mbahet takimi në mes të delegacionit Amerikan të MCC-së dhe atij të Republikës së Kosovës në lidhje me programin Kompakt të MCC-së. (Ndërtesa e Qeverisë, Salla - P38, ora 9:00)

- Komisioni për Çështje të Sigurisë dhe Mbrojtjes shqyrton propozim-amendamentet për Projektligjin për Komisionerin Parlamentar për Forcën e Sigurisë së Kosovë. (Ndërtesa e Kuvendit, salla N225, ora 10:00)

- Auditorja e Përgjithshme, Vlora Spanca mban konferencë për media me rastin e përfundimit të sezonit auditues 2021/22 dhe procesit të publikimit të 121 raporteve të auditimit. (Ambientet e Zyrës Kombëtare të Auditimit, Lagjja Arbëria, ora 11:00)

- Komisioni për Ekonomi, Industri, Ndërmarrësi dhe Tregti shqyrton raportin vjetor të Autoritetit të Konkurrencës së Republikës së Kosovës për vitin 2021. (Ndërtesa e Kuvendit, salla N10, ora 11:00)

- Rektori i Universiteti të Prishtinës Naser Sahiti dhe U.D Sekretari i Përgjithshëm, Besfort Krasniqi raportojnë para Komisionit për Mbikëqyrjen e Financave Publike lidhur me raportin e Auditimit për pasqyrat financiare vjetore të Universitetit të Prishtinës, për vitin 2021. (Ndërtesa e Kuvendit, salla N303, ora 11:00)

- Instituti Demokratik i Kosovës mban konferencën për media gjatë të cilës do të shpalosën të gjeturat nga monitorimi i punës së Kuvendit për gjashtë muajt e parë të sesionit pranveror me fokus në çështjen e mungesës së kuorumit dhe shqyrtimit të projektligjeve. (Zyrat e Institutit Demokratik të Kosovës, ora 11:00)

- Programi i Kombeve të Bashkuara për Zhvillim në Kosovë do të lansoj edicion e 22-të të Përmbledhjes Pulsi Publik. (Salla e konferencave të UNDP-së, ora 11:00)

- UBT nënshkruan dy marrëveshje shumë të rëndësishme me dy universitete nga shteti i Iowa-s, me University of Northern Iowa dhe University of Iowa. (Kampusi i UBT-së, Lipjan, tek QMI, ora 12:00)

- Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione prezanton draftligjin për Mbrojtje nga Dhuna në Familje dhe Dhuna në Baza Gjinore, nga eksperti Hilmi Jasahri, i angazhuar nga UN Women. (Ndërtesa e Kuvendit, salla N303, ora 13:00)

- Komisioni për Shëndetësi dhe Mirëqenie Sociale shqyrton Projektligjin për ndryshimin dhe plotësimin e Ligjit për Inspektoratin Shëndetësor, etj. (Ndërtesa e Kuvendit, salla N204, ora 13:00)

- Komisioni Hetimor Parlamentar në lidhje me menaxhimin e krizës energjetike nga Qeveria e Republikës së Kosovës njoftohet rreth ndërrimit të anëtares së PDK-së Eliza Hoxha me deputetin Abelard Tahiri si dhe diskuton rreth emrave të ekspertëve. (Ndërtesa e Kuvendit, salla N303, ora 13:00)

- Kryetari i Kuvendit të Republikës së Kosovës, Glauk Konjufca, pret në takim ambasadorin japonez, Akira Mizutani. (Kabineti i kryetarit, 13:30 - mediat mund të marrin pamje në fillim të takimit)