08 Shkurt 2023

AKP privatizon 10 ndermarrje për 6 milion euro

Prishtinë, 12 maj - Agjencia Kosovare e Privatizimit (AKP) sot në ceremoninë e hapjes së ofertave të valës 43 të privatizimit, shpalli ofertuesit e përkohshëm, fitues të  Ndërmarrjeve të Reja të tenderuar përmes metodës së Spin-off-it të Rregullt.

Nga 16 ndërmarrje të reja me spin-off të rregullt qe kanë qenë në tender vetëm për 10 ka pas oferta, ndërsa për 6 ndërmarrje nuk ka pas asnjë ofertë dhe për këtë tash vendos Bordi i AKP-së.  Vlera e tërësishme e ofertave më të larta ishte 6,333,425 euro.
Në mesin e ndërmarrjeve që nuk ka pas asnjë ofertë ka qenë edhe “Llamkosi” nga Vushtrria, i cili pas dështimit të privatizimit të parë ka dalë prapë në tenderim.

Zëvendësdrejtoresha e AKP-së, Mrika Tahiri, ka thënë se deri më tash janë privatizuar 576 ndërmarrje dhe nga ky privatizim në konton e AKP-së janë derdhur mbi 464 milionë euro.

“Deri më 30 prill të këtij viti janë privatizuar 576 ndërmarrje të reja prej të cilave 552 janë privatizuar me metodën e spin-off të rregullt, ndërsa 24 prej tyre përmes metodës së spin-off special. Privatizimi i këtyre ndërmarrjeve shoqërore së bashku me shitjet dhe mënyrën e likuidimit në konton e mirëbesimit janë akumuluar mbi 464 milionë euro. Dëshiroj të ju njoftoj se nga ky fond i privatizimit punëtorëve të ndërmarrjeve shoqërore iu janë shpërndarë mbi 26 milionë euro”, ka theksuar Tahiri.

Çmimin më të lartë gjatë këtij raundi të privatizimit e ka arritur ndërmarrja e re “Morava e Binçës”-Gurthyesi nga Gjilani, e cila është shitur për 2.345.678 euro, ndërsa ndërmarrja e re “Pasuria Bujqësore”- toka Rahovicë është shitur për 222.500 euro.

Ndërmarrja e re “Rilindja Libraria” Istog është shitur për 51.150 euro, ndërsa ndërmarrja e re “Shitorja Mulliri” Ferizaj është shitur për 22.220 euro, “Mulliri”-shitoret Fushë Kosovës është shitur për 36.001 euro.

Ndërmarrja ndërtesa administrative “Ekonomia Pyjore” është shitur për 355.555 euro, ndërsa ndërmarrja e re punëtoria “Ilira” është shitur për 223.223 euro, kurse ndërmarrja e re Shtëpia e Mallrave “Agimi” është shitur për 2.111.999 euro. Të gjitha këto ndërmarrje janë nga regjioni i Pejës.

Në regjionin e Prizrenit janë privatizuar ndërmarrja e re “Koretniku”-hotel “Sharri” Sharr për 465.100 euro dhe ndërmarrja e re “Liria” -Depoja e Tekstilit është shitur për 499.999 euro.

Për 6 ndërmarrje nuk ka pas asnjë ofertë dhe për këtë çështje do të vendosë Bordi i AKP-së. Ndërmarrjet që nuk kanë pas asnjë ofertë janë ndërmarrja e re “Llamkos”, “Çyçavica” Shitorja Metrazha, “Universal” Qendra Tregtare dhe Universal Depoja, të gjitha këto në regjionin e Mitrovicës. Po ashtu për ndërmarrjen “Fryti” nga regjioni i Prishtinës dhe për ndërmarrjen e re “Strezovci dhe Oborri” nga regjioni i Gjilanit nuk ka pas asnjë ofertë.

Agjencia Kosovare e Privatizimit tani është duke punuar që të përfundoj të gjitha shitjet, në pritje të vendimit të Bordit të Drejtorëve të AKP-së.

Agjencia, deri më 30 Prill të këtij viti ka privatizuar 576 ndërmarrje të reja, prej të cilave 552 janë privatizuar përmes metodës së Spin Off-it të Rregullt, ndërsa 24 prej tyre janë privatizuar përmes metodës së Spin Off-it Special. Nga privatizimi i këtyre ndërmarrjeve shoqërore në Fondin e Privatizimit janë akumuluar mbi 460 milionë euro.

 

Kalendari

Ngjarjet e datës 8 shkurt 2023

- Komisioni për Ekonomi, Industri, Ndërmarrësi dhe Tregti, shqyrton Projektligjin për Sigurinë e përgjithshme të produkteve. (Kuvendi i Kosovës, salla N506, ora 10:00)
    
- Përfaqësuesit e Agjencisë Kosovare të Privatizimit, raportojnë në Komisionin për Buxhet, Punë dhe Transfere, lidhur me Raportin e Auditimit për të “Hyrat nga Qiraja e Agjencisë Kosovare të Privatizimit”. (Kuvendi i Kosovës, salla C203, ora 10:00)
    
- Koalicioni i OJQ–ve për Mbrojtjen e Fëmijëve në Kosovë mban tryezë diskutimi me temën: “Ligji për Mbrojtjen e Fëmijës – progresi në zbatimin e tij”. (Hotel Sirius, ora 10:00)    

- Kuvendi i Republikës së Kosovës vazhdon seancën plenare me pikat e pa përfunduar. (Kuvendi i Kosovës, ora 12:00)

- Komisioni Qendror i Zgjedhjeve mban mbledhjen e radhës. (Selia e KQZ-së, ora 13:30)
    
- Organizata paditëse GLPS dhe një qytetare e Republikës së Kosovës do të paraqesin Padi për konflikt administrativ për refuzimin e kompensimit për personin paraplegjik dhe tetraplegjik. (Pallati i Drejtësisë, Ndërtesa A, ora 14:00)

- Federata e Futbollit e Kosovës mbledh të gjitha klubet e Superligës së Kosovës në një ngjarje të veçantë, ku fituesit e fushatës së nisur javë më parë në rrjetet sociale do të shpërblehen me fanella të nënshkruara nga vet lojtarët e ekipeve të ndryshme. (Kati i parë në Albi Mall, ora 18:00)

- Fondi për të Drejtën Humanitare Kosovë (FDHK) organizon hapjen e ekspozitës së përkohshme të veprës “Albumi familjar – Mes kujtimit dhe realitetit” (Family Album – Between Recollection and Reality) nga Alban Muja, e cila do të pasohet me një bisedë me artistin. (Vendi: Qendra e Dokumentimit, Biblioteka “Hivzi Sylejmani”, Dardani, ora 19:00)