01 Dhjetor 2021

Kombëtarja e Kosovës i jep fund bashkëpunimit me Bernard Challandes

Prishtinë, 13 tetor - Federata e Futbollit e Kosovës i ka dhënë fund bashkëpunimit me trajnerin zviceran, Bernard Challandes, në rolin e përzgjedhësit të kombëtares.

Një vendim i tillë është bërë i ditur për opinionin në një konferencë për media ku ishin të pranishëm presidenti i Federatës së Futbollit të Kosovës, Agim Ademi dhe trajneri Challandes.

Ademi njoftoi se pas bisedës me trajnerin zviceran kanë ardhur në përfundim për t’i dhënë fund bashkëpunimit të deritashëm.

Ai e ka falënderuar përzgjedhësin Challandes për punën e mirë në drejtimin e kombëtares, veçmas në Ligën e Kombeve.

“Duke i pasur parasysh objektivat tona, me marrëveshje të përbashkët kemi vendosur për t’i dhënë fund bashkëpunimit në rolin e përzgjedhësit. E falënderojmë Challandes për punën e tij pasi ajo çfarë kemi bërë në Ligën e Kombeve ka qenë historike, por më pas gjatë rrugës nuk i kemi përmbushur objektivat”, tha Ademi.

Ndërkaq, Challandes është shprehur i mërzitur që më nuk do të jetë trajner i "Dardanëve", duke theksuar se ka kaluar kohë shumë të mirë me të gjithë në Kosovë.

“Kishim synim në fillim të ndërtojmë një ekip të vërtetë dhe të mirë. Isha i lumtur me këtë punë dhe gjithashtu krenar me punën që e kemi bërë. Kam pasur kënaqësinë të punoj me ketë ekip dhe për këtë arsye jam i mërzitur që po largohem. Si trajner kam kaluar një kohë shumë të mirë dhe i falënderoj të gjithë për bashkëpunimin duke filluar nga federata, lojtarët dhe stafi përcjellës”, ka thënë ai.

Challandes tha se është i mërzitur vetëm për shkak të rezultateve.

“Shpresoj të kthehem t’i shoh ndeshjet e Kosovës në të ardhmen pasi besoj se tashmë e kemi ndërtuar hapin e parë dhe për të arritur të dytin nuk është aspak e lehtë“, shtoi Challandes, i cili ka falënderuar presidentin Ademi, stafin e federatës, lojtarët dhe tifozët për mbështetjen e vazhdueshme.

Challandes e ka drejtuar Kosovën në 40 ndeshje, 17 prej të cilave i ka fituar, 15 i ka humbur dhe tetë prej tyre kanë dalë barazim.

Kosova mbrëmë priti në stadiumin “Fadil Vokrri” në Prishtinë kombëtaren e Gjeorgjisë në kuadër të kualifikimeve për Kampionatin Botërorë “Katar 2022”, ku humbi me rezultat 1 me 2.

Kalendari

Ngjarjet e datës 1 dhjetor 2021 - Misioni i Bashkimit Evropian për Sundimin e Ligjit në Kosovë (EULEX) dhe OJQ Të Drejtat e Grave organizojnë diskutimin për manipulimin mendor dhe keqtrajtimin psikologjik si elemente të dhunës në familje. (Hoteli Emerald, ora 9:45)
    
- Bëhet betimi i kryetarit të komunës së Deçanit, Bashkim Ramosaj dhe nënshkruhen deklaratat  solemne për marrjen e detyrës nga anëtarët e Kuvendit të komunës. (Salla e Kuvendit të komunës në Deçan, ora 10:00)

- Mbahet mbledhja inauguruese e Kuvendit të Komunës së Mitrovicës së Jugut. (Salla e Kuvendit të Komunës, ora 10:00)

- Mbahet mbledhja inauguruese e Kuvendit të Komunës së Malishevës, ku do të bëjnë betimin anëtarët e Kuvendit dhe Kryetari i Komunës së Malishevës, Ekrem Kastrati. (Salla e mbledhjeve të Kuvendit të Komunës së Malishevës, ora 10:00)
    
- Oda e Hotelerisë dhe Turizmit të Kosovës mban konferencë të jashtëzakonshme për shkak të mos aprovimit të kërkesave për lirim të masave. (Te ish-Rilindja, kompleksi III nr. 42, ora 12:00)
    
- Grupi Parlamentar i AAK-së, në Kuvendin e Kosovës mban tryezën me temën: Ngritja enorme e çmimeve dhe jostabiliteti ekononomik. (Salla N – 506, ora 13:00)
    
- Qendra për Këshillim, Shërbime Sociale, dhe Hulumtime (SIT), bën lansimin e platformës: Ofrimi i shërbimeve online dhe fizikisht për kryerësit e veprave të dhunës në familje dhe dhunës në baza gjinore. (Hotel “Prishtina”, Prishtinë, ora 14:00)

- Galeria 17 me mbështetjen nga Swiss Cooperation Office në Kosovë, Ministria e Kulturës, Rinisë dhe Sportit dhe Komuna e Prishtinës organizojnë ngjarjen Dinner party/ Make me coffee make me a sandwich, në kuadër të ekspozitës së kuruar nga Natalija Vujošević. (Galeria 17 rruga Henrik Bariç, nr.10, ora 18:00)

- Mbahet hapja zyrtare e edicionit të dytë të Festivalit “Art Without Limit International Film Festival”. (Kino Armata, ora 18:00)

- Asociacioni i Artistëve Vizual të Kosovës organizojnë hapjen e ekspozitës vjetore të anëtarëve të Asociacionit të artistëve vizual të Kosovës. (Galeria e Artëve të Kosovës, ora 19:00)