Prishtinë, 24 nëntor - Fondacioni i Kosovës për Shoqëri të Hapur (KFOS) organizon panel diskutimi me temë “Diplomacia sportive: A mund ta forcojë Kosova pozitën e vet ndërkombëtare përmes sportit?”
 
Pas dy dekadash izolimi, Kosova ia ka dalë të bëhet anëtare e plotë në shumicën e organeve drejtuese ndërkombëtare të sportit në gjashtë vjetët e fundit, së pari duke u pranuar në familjen olimpike në vitin 2014 dhe më vonë duke u bërë pjesë e FIFA-s në vitin 2016.

Të dyja këto anëtarësime sipas KFOS kanë ndihmuar normalizimin e shtetësisë së Kosovës për shumë audienca që nuk kanë dëgjuar asgjë pozitive për vendin për vite me radhë.

Për më tepër KFOS konsideron se përmbushja e sovranitetit sportiv i ka falur shtetit më të ri në Evropë mundësinë për të vepuar si shtet, edhe pse është përballur me pengesa sa i përket anëtarësimit në organizata ndërkombëtare të sferave të tjera.
 
Ndonëse kanë kaluar disa vjet nga përvojat e përfaqësuesve pishtarë të Kosovës që filluan të garonin në rrafshin ndërkombëtar, Kosova vazhdon të ballafaqohet me shumë sfida në diplomacinë sportive.

Pavarësisht nga kjo, fusha në fjalë mbetet shteg i fuqishëm për Kosovën që të përfshihet dhe të forcojë marrëdhëniet e dyanshme me shtetet mosnjohëse sikur Spanja dhe Greqia, si dhe një shteg për përdorimin e sportit si vegël e pushtetit të butë, sidomos pas pertformancave frymëzuese të sportistëve të suksesshëm të Kosovës.

Sporti po ashtu mbetet fushë interesante për të hartuar dhe shpleksur çështjet e brendshme të identitetit kulturor dhe kombndërtimit.
 
Ndërsa fokusi i botës zhvendoset nga Kampionati Botëror, Fondacioni i Kosovës për Shoqëri të Hapur ju fton të merrni pjesë në panel diskutimin “Diplomacia sportive: A mund ta forcojë Kosova pozitën e vet ndërkombëtare përmes sportit?”
 
Në kuadër të këtij diskutimi, Dr. George Kyris dhe Juan Manuel Montoro do të paraqesin analizën e tyre mbi mënyrën se si diplomacia sportive i ka mundësuar Kosovës zgjerimin e njohjes ndërkombëtare përjashta dhe artikulimin e një identiteti kombëtar përbrenda me titullin “Diplomacia Sportive e Kosovës: Duke iu qasur ndërkombëtares; duke e ndërtuar kombëtaren”.
 
Për ta diskutuar këtë temë, Fondacioni ka ftuar Zëvendësministren e Kulturës, Rinisë dhe Sportit znj. Daulina Osmani, dhe znj. Silvija Mitevski, drejtore sportive dhe konsultente për diplomacinë sportive, e cila do t’u bashkohet dy bashkautorëve në një panel të moderuar nga z. Arian Lumezi. Agjendën mund ta gjeni këtu.