Mitrovicë, shtohen masat e sigurisë në veri
Baki Kelani nga Zyra për Marrëdhënie me Publikun, ka bërë të ditur të shtunën se Policia e Kosovës ka krijuar një grup pune, i cili do të asistojë njësitet hetimore për të mësuar shkaqet të cilat kanë çuar deri tek incidenti.
Sipas tij, Policia e Kosovës, ajo e EULEX-it dhe KFOR-i kanë shtuar masat e sigurisë në atë pjesë, në mënyrë që t\'u ofrohet siguri më e plotë qytetarëve.
Ai, po ashtu, ka bërë të ditur se tani më ka filluar edhe pyetja e personave, të cilët mund të ofrojnë informacione për hetimin e rastit.
Ndërkaq Ministri i Brendshëm i Kosovës, Bajram Rexhepi, i ka cilësuar incidentet e fundit në veri të Mitrovicës si të motivuara politikisht dhe ka përjashtuar njoftimet se autoritetet e Kosovës po i provokojnë serbët lokalë ose vetë Serbinë.
Ministri Rexhepi ka kërkuar nga qytetarët serbë të Kosovës që të kuptojnë se veriu i saj është pjesë e territorit kosovar dhe se institucionet e vendit janë të vendosura që të shtrijnë autoritetin e tyre edhe në veri të Kosovës.
Ai tha se, sipas informatave paraprake, incidenti i të premtes në Lagjen e Boshnjakëve, kur u vra një dhe u plagosën dhjetë persona të tjerë, nga shpërthimi i një granate dore, mund të jetë shkaktuar nga pakujdesia e ndonjë protestuesi të armatosur ose është shkaktuar qëllimisht.
Incidenti ndodhi në kohën kur autoritetet e Kosovës provuan të hapin një zyrë për regjistrim civil në Lagjen e Boshnjakëve në veri të Mitrovicës, që shkaktoi një valë protestash të serbëve lokalë.
