05 Dhjetor 2022

Komuna e Mitrovicës dhe FSK thellojnë bashkëpunimin

Mitrovicë, 3 gusht - Kryetari i komunës së Mitrovicës, Avni Kastrati, priti të martën në takim zëvendësministrin e FSK-së, Behxhet Brajshori dhe zëvendëskomandantin e FSK-së, gjen. Rrahman Rama, me të cilët bisedoi për bashkëpunimin e ndërsjellë në mes të pushtetit lokal dhe FSK-së.

Kryetari Kastrati i falënderoi mysafirët për interesimin dhe për angazhimin e tyre në drejtim të thellimit të bashkëpunimit në të mirë të të dy institucioneve dhe në këtë kontekst edhe të të gjithë qytetarëve. 

Ai shprehu zotimin se komuna do të vazhdoj të jetë e angazhuar karshi përgjegjësive të veta në raport me nevojat e FSK-në në Mitrovicë.

Ai u ndal tek hapësira ku është e vendosur Brigada për Reagim të Shpejtë e FSK-së në Mitrovicë, ku sipas tij, është një vend i mirë dhe që ofron kushte shumë të mira për ushtarët e FSK-së.

Kryetari Kastrati, uroj që FSK-ja sa më parë të arrij kapacitetet e plota dhe të jetë në shërbim të të gjithë qytetarëve të Republikës së Kosovës.

Në këtë drejtim edhe zëvendësministri Brajshori dhe zëvendëskomandanti Rama, kanë vlerësuar qasjen konstruktive të kryetarit Kastrati dhe të pushtetit lokal në raport me FSK-në.

Brajshori tha se janë duke punuar shumë që të arrihen sa më parë kapacitetet  e plota të FSK-së. Ai theksoi se ecuria është shumë e mirë dhe në këtë kontekst përmendi edhe përmirësimin e strukturës etnike të FSK-së.

Ndërsa Rama, tha se në kazermën ku është e vendosur FSK-ja në Mitrovicë janë duke u realizuar disa projekte që kanë të bëjnë me krijimin e një ambienti të përshtatshëm për punë.

Ai paralajmëroi se deri në fund të vitit të ardhshëm aty do të kryhen edhe shumë projekte të tjera dhe ai vend do të përmbush standardet më të larta për punën e FSK-së.       

Kalendari

Ngjarjet e datës 5 dhjetor 2022 - Kryetari i Kryeqytetit, Përparim Rama, do të nënshkruajë marrëveshjen me partneritet publiko privat për ndërtimin e tri shkollave të reja dhe ofrimin e shërbimeve të mirëmbajtjes dhe operimit në Komunën e Prishtinës. (Ndërtesa e Vjetër e Komunës së Prishtinës, ora 9:00)

- Instituti i Kosovës për Drejtësi, Grupi për Studime Juridike dhe Politike, Lëvizja Fol, Iniciativa për Progres, Çohu dhe Colombus organizojnë tryezë të rrumbullakët, ku do të diskutohet lidhur me “Reforma në Drejtësi”. (Hotel Sirius, ora 10:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022 interviston Njazi Thaçin, Luigj Imerin, Perparim Kabashin, Nagip Krasniqin, Faruk Hajrizin, Rrezarta Pllanën, Hysen Fazliun, Musa Misinin, Skender Hazirin, Ali Hamitin, Izet Rushitin dhe Krenar Bujupin. (Ndërtesa e Kuvendit, salla N204, ora 11:00)

- Presidentja e Republikës së Kosovës, Vjosa Osmani Sadriu pret në takim Ndihmës Administratoren e USAID-it, Erin E. McKee. (Kabineti i Presidentes,ora 12:00)

- Ministria e Kulturës, Rinisë dhe Sportit në bashkëpunim me UNICEF-it dhe UN Volunteers shënojnë Ditën Ndërkombëtare të Vullnetarizmit. (Kino Armata, sheshi “Zahir Pajaziti”, ora 13:00)

- Instituti i Kosovës për Drejtësi organizon tryezë të rrumbullakët, ku do të prezantohet raporti me titull “Parashkrimi i Korrupsionit”, i cili është rezultat i monitorimit sistematik që IKD i bënë sistemit Gjyqësor dhe atij Prokurorial të Republikës së Kosovës. (Hotel Sirius, ora 13:00)

- Këshilli Rinor Kosovar në bashkëpunim me Kuvendin e të Rinjëve të Ferizajt dhe Komunën e Ferizajt do të mbajë panelin e diskutimit dhe aktivitetin ‘Dita e Vullnetarizmit’ me qëllim të promovimit dhe diskutimit rreth punës vullnetare, nevojave të vullnetarëve dhe aktiviteti i tyre në këtë komunë. (Salla e Kuvendit Komunal në Ferizaj, ora 14:00)

- Lëvizja FOL në kuadër të  “Javës Kundër Korrupsion 2022” mban konferencë për media me ç’rast do të bëjë publikimin e raportit "Masat disiplinore kundër nëpunësit civil për korrupsion dhe shkelje etike". (Hotel Sirius, ora 15:15)

- Kryeministri i Kosovës, Albin Kurti pret në takim Ndihmës Administratoren e USAID-it, Erin E. McKee. (Zyra e Kryeministrit të Republikës së Kosovës, ora 15:45)