05 Dhjetor 2022

KK e Mitrovicës denon dhunën në lagjen e boshnjakëve

Mitrovicë, 3 korrik - Përfaqësuesit e strukturave politike dhe të sigurisë kanë mbajtur të premten një takim urgjent të Komitetit të Sigurisë në Mitrovicë, për të vlerësuar gjendjen e krijuar pas tensionimit të gjendjes në veri të qytetit.

Në këtë takim janë dënuar aktet e dhunës, ku si rrjedhojë e protestave të organizuara nga pjesëtarët e komunitetit serb në shenjë kundërshtimi ndaj hapjes së zyrës për regjistrim civil nga Ministria e Punëve të Brendshme e Republikës së Kosovës në Lagjen e Boshnjakëve, ka vdekur 1 dhe janë lënduar 10 qytetarë. 

Drejtuesit e Komunës së Mitrovicës i kanë dënuar veprimet e dhunshme dhe kanë kërkuar nga strukturat e rendit zbardhjen e rastit të shpërthimit që ka ndodhur në mesin e protestuesve.

Kryetari i komunës, Avni Kastrati, ka kërkuar nga autoritetet që të marrin masa që të zbardhet rasti në mënyrë që mos të lejohen spekulimet e qarqeve të ndryshme, të cilat janë të interesuara që të destabilizohet situata.

Kryetari Kastrati ka vlerësuar se aktet e dhunshme janë të papranueshme, prandaj ka kërkuar nga qytetarët e të gjitha komuniteteve në veri që të jenë të matura dhe të mos bien pre e qarqeve që duan të destabilizojnë situatën.

Në të njëjtën kohë ai e ka përshëndetur hapjen e zyrës për regjistrim civil, nëpërmjetmjet të së cilës do t’u ofrohen shërbime qytetarëve në atë pjesë të qytetit.          

Për ecurinë e ngjarjeve që kanë ndodhur të premten në veri të Mitrovicës, foli Avni Zaiti nga Policia Rajonale. Ai tha se në orën 08:15 ka qenë e paralajmëruar përurimi i një zyreje të regjistrimit civil të MBP-së në Lagjen e Boshnjakëve, ndërsa pas arritjes aty të personelit që janë caktuar të punojnë, në afërsi janë mbledhur qytetarë të komunitetit serb në shenjë kundërshtimi.


“Policia ka krijuar kordon përreth zyrës, ndërsa më vonë rreth orës 09:50 në mesin e protestuesve serbë në afërsi të udhëkryqit të shkollës teknike ka ndodhur një shpërthim, ku janë lënduar 11 persona. Më vonë është konfirmuar se një prej të plagosurve ka vdekur”, tha ai, duke shtuar se rreth orës 11:00 situata është qetësuar.

Zaiti theksoi se një protestë tjetër e pjesëtarëve të komunitetit serb është organizuar në orën 14:00 në sheshin “Shumadija” në veri të qytetit, ku janë mbledhur poashtu rreth 500-600 veta, në shenjë kundërshtimi ndaj hapjes së asaj zyreje në Lagjen e Boshnjakëve. Sipas tij, protesta ka përfunduar e qetë dhe pa incidente.

Ai ka thënë se zyra që është hapur është nën kontroll të pjesëtarëve të staciononit të policisë në veri me mbështetje të atyre nga stacioni jugor.

Ndërsa Behxhet Bala, drejtor për Mbrojtje dhe Shpëtim, kërkoi nga autoritet e rendit që të shtojnë masat e sigurisë në lagjet me popullatë të përzier për shkak të përshkallëzimit të situatës. Ai tha se banorët shqiptarë që jetojnë në veri janë të shqetësuar, andaj nevojitet shtim i masave të sigurisë.

Ndërsa nënkryetari i komunës, Riza Haziri, ka kërkuar shtimin e masave të sigurisë edhe në Kodrën e Minatorëve, ku para disa javësh ka pasur një incident ku janë lënduar 5 të rinj shqiptarë.   

Në anën tjetër, përfaqësuesit e KFOR-it theksuan se ata janë në gjendje gatishmërie për të intervenuar në rast nevoje në mënyrë që të ofrohet siguri për të gjithë.
          


 

Kalendari

Ngjarjet e datës 5 dhjetor 2022 - Kryetari i Kryeqytetit, Përparim Rama, do të nënshkruajë marrëveshjen me partneritet publiko privat për ndërtimin e tri shkollave të reja dhe ofrimin e shërbimeve të mirëmbajtjes dhe operimit në Komunën e Prishtinës. (Ndërtesa e Vjetër e Komunës së Prishtinës, ora 9:00)

- Instituti i Kosovës për Drejtësi, Grupi për Studime Juridike dhe Politike, Lëvizja Fol, Iniciativa për Progres, Çohu dhe Colombus organizojnë tryezë të rrumbullakët, ku do të diskutohet lidhur me “Reforma në Drejtësi”. (Hotel Sirius, ora 10:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022 interviston Njazi Thaçin, Luigj Imerin, Perparim Kabashin, Nagip Krasniqin, Faruk Hajrizin, Rrezarta Pllanën, Hysen Fazliun, Musa Misinin, Skender Hazirin, Ali Hamitin, Izet Rushitin dhe Krenar Bujupin. (Ndërtesa e Kuvendit, salla N204, ora 11:00)

- Presidentja e Republikës së Kosovës, Vjosa Osmani Sadriu pret në takim Ndihmës Administratoren e USAID-it, Erin E. McKee. (Kabineti i Presidentes,ora 12:00)

- Ministria e Kulturës, Rinisë dhe Sportit në bashkëpunim me UNICEF-it dhe UN Volunteers shënojnë Ditën Ndërkombëtare të Vullnetarizmit. (Kino Armata, sheshi “Zahir Pajaziti”, ora 13:00)

- Instituti i Kosovës për Drejtësi organizon tryezë të rrumbullakët, ku do të prezantohet raporti me titull “Parashkrimi i Korrupsionit”, i cili është rezultat i monitorimit sistematik që IKD i bënë sistemit Gjyqësor dhe atij Prokurorial të Republikës së Kosovës. (Hotel Sirius, ora 13:00)

- Këshilli Rinor Kosovar në bashkëpunim me Kuvendin e të Rinjëve të Ferizajt dhe Komunën e Ferizajt do të mbajë panelin e diskutimit dhe aktivitetin ‘Dita e Vullnetarizmit’ me qëllim të promovimit dhe diskutimit rreth punës vullnetare, nevojave të vullnetarëve dhe aktiviteti i tyre në këtë komunë. (Salla e Kuvendit Komunal në Ferizaj, ora 14:00)

- Lëvizja FOL në kuadër të  “Javës Kundër Korrupsion 2022” mban konferencë për media me ç’rast do të bëjë publikimin e raportit "Masat disiplinore kundër nëpunësit civil për korrupsion dhe shkelje etike". (Hotel Sirius, ora 15:15)

- Kryeministri i Kosovës, Albin Kurti pret në takim Ndihmës Administratoren e USAID-it, Erin E. McKee. (Zyra e Kryeministrit të Republikës së Kosovës, ora 15:45)