28 Tetor 2021

Tendosja veriore

Shkruar nga Lëvizja Vetëvendosje

Ka tashmë disa muaj që tendosjet në veri të Kosovës janë shpeshtuar. Që prej rebelimit të strukturave paralele të Serbisë për moslejimin e kthimit të shqiptarëve atje, e deri te përleshjet periodike te Ura e Ibrit. Që prej hedhjes së bombave e deri te vrasja e shqiptarëve. Kush po i kontribuon kësaj gjendjeje dhe në ç’funksion është ajo?

Tash e 11 vjet veriu i Kosovës i është lënë Serbisë. Pushteti komunal, administrata, arsimi, shëndetësia si dhe jeta politike e shoqërore e serbëve që jetojnë në këtë territor, organizohet nga Beogradi. Zgjedhjet e Serbisë mbahen rregullisht dhe politikanët serbë jo vetëm që enden lirisht dhe zhvillojnë aktivitetin e tyre kundër Kosovës, por madje shfaqen publikisht edhe të armatosur.

Jo vetëm strukturat paralele, por edhe vetë shumica e atyre pak policë të Policisë së Kosovës që në veri numërohen në gishta, janë të punësuar të Beogradit, siç u pa qartë edhe me rastin e policit të Policisë së Kosovës, Ljubisha Vujinoviq, e i cili po ashtu punonte për MUP-in, bashkëpjesëmarrës në vrasjen e Hakif Mehmetin në veri të Mitrovicës.

Për këtë situatë kriminale në veri duhet të mbahen përgjegjës misionet e huaja qeverisëse si dhe udhëheqjet partiake vendëse që kanë qeverisur deri sot me Kosovën. Veriu i Kosovës është spastruar etnikisht. Mbi 11,300 shqiptarë janë dëbuar dhunshëm dhe Beogradi ka blerë shumë prona të shqiptarëve në mënyrë të organizuar. Ata politikanë që janë bashkëfajtorë për gjithë këtë që i ka ndodhur veriut, sot dalin dhe thonë se “ne po punojmë për veriun”.

Pas shpalljes së pavarësisë së mbikëqyrur të Kosovës sipas rekomandimit të Ahtisaarit, çdo ditë e kaluar ka përforcuar faktin se kjo pavarësi pa vetëvendosje e shpallur prej një Qeverie pa dhëmbë, mbeti shtet në letër. Menjëherë pas katër muajsh erdhën letrat e Ban Ki-moon-it që kërkonin zgjidhje për “hapësirat serbe”.

Politikanët i futën veshët në lesh. Tash pas opinionit të GjND-së, Serbia e ka përqendruar strategjinë e saj në minimin e integritetit territorial të Kosovës nëpërmjet krijimit të entitetit serb përbrenda, me ç’rast cak i veçantë është vetë veriu i Kosovës. Ky do të jetë qëllimi i Serbisë në negociatat e ardhshme të cilat i fitoi. Negociatat e ardhshme me Serbinë politikanët tanë i quajtën ‘fitore’.

EULEX-i, Serbia dhe Qeveria e Kosovës janë plotësisht të bashkërenduar për çështjen e veriut. Serbia i ndërsen strukturat paralele, Bajram Rexhepi e dërgon njësinë speciale në veri me deklarata, shqiptarët e serbët nxiten për përleshje te Ura e Ibrit, kurse EULEX-i hyn në mes. Krejt kjo situatë e tensionuar mirëmbahet si trysni për negociata të reja. Kjo gjendje po mirëmbahet për t’i sqaruar disa gjëra: së pari që pushteti i Qeverisë së Kosovës është deri te ura. Së dyti që Serbia e kontrollon veriun. Dhe së treti që EULEX-i nuk toleron kurrfarë konfrontimi, gjë që nënkupton nisjen e negociatave.

Republika Serbe në Bosnje është brenda shtetit të Bosnjes. Por ajo e mban peng vetë statusin e këtij shteti. Më shumë Bosnja është e Republikës Serbe sesa që Republika Serbe është e Bosnjes. Sepse Republika Serbe është e Serbisë. Në mënyrë që Kosovës të mos i ndodh një gjë e tillë kaq fatkeqe, populli dhe shoqëria jonë duhet t’i jep fund koniukturave qeverisëse të shitura e të korruptuara, të varura e të shantazhuara, që punojnë për vete e jo për shtet.

 

Kalendari

Ngjarjet e datës 28 Tetor 2021

- Fillon administrimi i vaksinës kundër gripit sezonal. (Salla 1 Tetori nga ora 08:00 deri në ora 19:00)

- Kryeministri Albin Kurti, bashkë me Ministrin e Financave, Punës dhe Transfereve, Hekuran Murati, mbajnë konferencë për media, në lidhje me operacionalizimin e masës 2.1-Subvencionimi i Kredive Investive - dhe masës 2.4 - Mbështetje e eksportit- të Pakos së Ringjalljes Ekonomike. (Ndërtesa e Qeverisë (Salla P38), ora 10:00)

- Komisioni për Mbikëqyrjen e Agjencisë së Kosovës për Inteligjencë diskuton rreth çështjeve vijuese nga fushëveprimi i Komisionit. (Ndërtesa e Kuvendit, salla N302, ora 10:00)

- Kryetari i Bashkësisë Islame të Kosovës, Myftiu Naim Tërnava do ta pres një delegacioni të lartë nga Mbretëria e Arabisë Saudite, i kryesuar nga Shkëlqesia e Tij, Dr. Abdul-Latif bin Abdul-Aziz Al Shejkh, Ministër i Çështjeve Fetare në Mbretërinë e Arabisë Saudite. (Selia e Kryesisë së BIK-ut, ora 10:00)

- Komisioni Qendror i Zgjedhjeve shpall rezultatet përfundimtare të raundit të parë të Zgjedhjeve për Kryetarë të Komunave. (Ndërtesa e KQZ-së, Kati 4, ora 10:00)

- Kolegji AAB organizon mbledhjen Komemorative me rastin e kalimit në amshim të Burbuqe Berisha. (Teatri AAB “Faruk Begolli” në Kolegjin AAB, ora 10:00)

- Komisioni Ad hoc për përzgjedhjen e kandidatëve për anëtar të Bordit të RTK-së shqyrton listën e kandidatëve të propozuar për anëtarë të Bordit të RTK-së. (Ndërtesa e Kuvendit, salla N10, ora 11:00)

- Komuna e Prishtinës inauguro Qendren e re e të Moshuarve në lagjen Ulpianë. (Rr. Imzot Nikë Prelaj, E30, Ulpianë mbrapa pompës Exfis, ora 11:00)

- Punëtorët e Ferronikelit protestojnë para Qeverisë së Kosovës. (Objekti i Qeverisë, ora 11:30)

- Mbahen homazhet për të ndjerën Burbuqe Berisha. (Përpara Teatrit Kombëtar, ora 12:00)

- Kryeministri Kurti dhe Ministri i Financave, Punës dhe Transfereve Hekuran Murati vizitojnë Administratën Tatimore të Kosovës. (ATK, kati I, ora 13:30)

- Hapet edicioni i 12 i Festivalit të Filmit të Shkurtër "Ballkani Përtej Kufijve. (Kino Armata)

 

- Kryetari i Komunës së Prizrenit, njëherësh kandidat për kryetar të Prizrenit nga Lëvizja Vetëvendosje!, prof. dr. Mytaher Haskuka, do të mbajë konferencë për media. (Zyret e Lëvizjes në Prizren, ora 16:00)