08 Shkurt 2023

MTI ka caktuar inspektorë të veçantë për inspektimin e makinerive

Prishtinë, 30 tetor - Ministri i Tregtisë dhe Industrisë, Vesel Krasniqi ka vizituar kompaninë “Agribau” në Prishtinë, e cila importon makineri të markave të ndryshme, kryesisht makineri të bujqësisë.
 
Ministri Krasniqi fillimisht i njoftoi drejtuesit e kësaj kompanie për obligimet që ka Kosova ndaj Marrëveshjes së Stabilizim Asociimit (MSA) dhe se për këtë kemi nxjerrë Udhëzimin administrativ 02/2020 për makineritë, ku parashihet që bizneset tona obligohen t’i plotësojnë disa standarde në kuadër të shenjës së konfirmitetit gjatë tregtimit.
 
“Arsyeja kryesore e kësaj vizite të përbashkët është që të konstatojmë edhe nga afër se këto makineri, të cilat importohen në Kosovë, i përgjigjen të gjitha kërkesave ligjore, përkatësisht i plotësojnë kërkesat themelore dhe kërkesat e standardeve të harmonizuara, që janë të shoqëruara me dokumentacionin teknik (deklaratën e konformitetit dhe certifikatën e konformitetit)  për vendosje në treg dhe njëkohësisht ofrojnë siguri gjatë përdorimit”, u shpreh ministri Krasniqi.

Ai bëri të ditur se Ministria e Tregtisë dhe Industrisë ka caktuar inspektorë të veçantë sa i përket inspektimit të makinerive, të cilët do të kërkojnë që bizneset t’i përmbushin standardet përmes deklaracioneve gjatë importit.
 
Ministri Krasniqi ritheksoi edhe njëherë faktin se ne si Ministri e Tregtisë dhe Industrisë jemi të përkushtuar që të rrisim përkrahjen për bizneset, të cilat operojnë në këtë sektor, për certifikimin e produkteve të tyre me skema të veçanta dhe gjithashtu do të shtojmë aktivitetet e mbikëqyrjes inspektuese për të garantuar një treg me produkte të sigurta.
 

Kalendari

Ngjarjet e datës 8 shkurt 2023

- Komisioni për Ekonomi, Industri, Ndërmarrësi dhe Tregti, shqyrton Projektligjin për Sigurinë e përgjithshme të produkteve. (Kuvendi i Kosovës, salla N506, ora 10:00)
    
- Përfaqësuesit e Agjencisë Kosovare të Privatizimit, raportojnë në Komisionin për Buxhet, Punë dhe Transfere, lidhur me Raportin e Auditimit për të “Hyrat nga Qiraja e Agjencisë Kosovare të Privatizimit”. (Kuvendi i Kosovës, salla C203, ora 10:00)
    
- Koalicioni i OJQ–ve për Mbrojtjen e Fëmijëve në Kosovë mban tryezë diskutimi me temën: “Ligji për Mbrojtjen e Fëmijës – progresi në zbatimin e tij”. (Hotel Sirius, ora 10:00)    

- Kuvendi i Republikës së Kosovës vazhdon seancën plenare me pikat e pa përfunduar. (Kuvendi i Kosovës, ora 12:00)

- Komisioni Qendror i Zgjedhjeve mban mbledhjen e radhës. (Selia e KQZ-së, ora 13:30)
    
- Organizata paditëse GLPS dhe një qytetare e Republikës së Kosovës do të paraqesin Padi për konflikt administrativ për refuzimin e kompensimit për personin paraplegjik dhe tetraplegjik. (Pallati i Drejtësisë, Ndërtesa A, ora 14:00)

- Federata e Futbollit e Kosovës mbledh të gjitha klubet e Superligës së Kosovës në një ngjarje të veçantë, ku fituesit e fushatës së nisur javë më parë në rrjetet sociale do të shpërblehen me fanella të nënshkruara nga vet lojtarët e ekipeve të ndryshme. (Kati i parë në Albi Mall, ora 18:00)

- Fondi për të Drejtën Humanitare Kosovë (FDHK) organizon hapjen e ekspozitës së përkohshme të veprës “Albumi familjar – Mes kujtimit dhe realitetit” (Family Album – Between Recollection and Reality) nga Alban Muja, e cila do të pasohet me një bisedë me artistin. (Vendi: Qendra e Dokumentimit, Biblioteka “Hivzi Sylejmani”, Dardani, ora 19:00)