24 Tetor 2021

Kosova dhe Maqedonia nënshkruajnë Memorandum për sektorin e energjisë

Shkup, 16 shtator - Në mbledhjen e përbashkët të Qeverisë së Republikës të Kosovës dhe Qeverisë së Republikës të Maqedonisë së Veriut, sot janë nënshkruar 11 memorandume bashkëpunimi.

Në kuadër të Ministrisë së Ekonomisë të Kosovës dhe Ministrisë së Ekonomisë të Maqedonisë së Veriut, ministrja Artane Rizvanolli dhe ministri Kreshnik Bekteshi kanë nënshkruar Memorandumin e Mirëkuptimit për sektorin e energjisë.

Ky memorandum është nënshkruar duke pasur parasysh rëndësinë e sigurisë së furnizimit me energji elektrike për zhvillimin ekonomik në Republikën e Kosovës dhe Republikën e Maqedonisë së Veriut, si dhe mungesën e kapaciteteve gjeneruese dhe llojshmërinë e tyre në të dy vendet.

Në këtë memorandum theksohet rëndësia dhe përfitimet e bashkëpunimit dypalësh në sektorin e energjisë dhe burimet energjetike në përfitimin reciprok në përputhje me parimet e Legjislacionit të BE-së dhe Traktatit për themelimin e Komunitetit të Energjisë.

Ministrja Rizvanolli, gjatë mbledhjes ka cekur se; “Synimet e njëjta si dekarbonizimi i sektorit, diversifikimi i burimeve dhe integrimi i burimeve të ripërtërishme të energjisë e bëjnë më të rëndësishëm se kurrë krijimin e kushteve teknike e tregtare për bashkëpunim më të ngushtë.

Në këtë mënyrë do të sigurojmë fleksibilitet të sistemit, siguri dhe cilësi të furnizimit, si dhe tarifa më të lira për konsumatorët”.

Memorandumi i përbashkët ka për qëllim të arrijë furnizim më të sigurt të energjisë për Kosovën, Maqedoninë e Veriut, për Evropën Juglindore dhe Bashkimin Evropian në përgjithësi.

Ky lehtësim i bashkëpunimit mes të dyja vendeve do të fokusohet në fushat prioritare të cilat përfshijnë; sektorin e energjisë, burimet e ripërtërishme të energjisë, efiçiencën e energjisë, sigurinë e furnizimit etj..

“Përfitimet për qytetarët dhe bizneset tona do të jenë të prekshme, prandaj motivi ynë për realizim është i fortë dhe nuk do të mbetet vetëm në letër”, shtoi në fund, Ministrja Rizvanolli.
 

Kalendari

Ngjarjet e datës 25 Tetor 2021

- Komisioni i Pavarur i Mediave në bashkëpunim me Departamentin e Gazetarisë të UP-së, me rastin fillimit të javës globale për edukimin mbi median dhe informacionin, organizojnë tryezë diskutimi me temën: “Edukimi Medial - Përmbajtjet e papërshtatshme për fëmijë”. (Hotel Sirius, ora 10:00)

- Nën patronatin e Kryeprokurorit të Shtetit, Aleksandër Lumezi do të mbahet “Java për të Drejtat e Viktimave të Krimit”, me moton “Së bashku në mbrojtje të viktimave të krimit”. (Hotelin Emerald, ora 10:00)

- GLPS mban tryezë diskutimit me temë “Meritokracia në shërbimin e jashtëm të Kosovës: një sërë rekomandimesh që duhet marrë parasysh”. (Hotel Swiss Diamond, ora 10:30)

- Punëtorët e Lotarisë së  Kosovës mbajnë protestë në të cilën do të kërkohet miratimi i ligjit për Lotarinë e Kosovës. (Para ndërtesës së Qeverisë, ora 11:00)

- Mbahet konferencë për media lidhur me Festivalin e 12 -të i Filmit të Shkurtër Ballkani Përtej Kufijve. (Kino Armata, ora 12:45)

- Oda e Hotelerisë dhe Turizmit të Kosovës  do të mbajnë tubim për të diskutuar masat e reja. (Golden Imperial, ora 19:00)