23 Shtator 2021

Variantet e reja të COVID-19 kërcënojnë rimëkëmbjen ekonomike

Washington, 11 korrik - Rimëkëmbja ekonomike globale është në rrezik nga përhapja e varianteve të reja të koronavirusit dhe qasja e pamjaftueshme e vaksinave në vendet në zhvillim, paralajmëruan të shtunën ministrat e financave të 20 ekonomive më të mëdha në botë.

Në takimin e G-20-së në Venecia të Italisë – i pari ku ministrat marrin pjesë fizikisht që nga fillimi i pandemisë – u miratua gjithashtu një vendim për të ndaluar kompanitë ndërkombëtare që të dërgojnë fitimet në parajsat fiskale me taksa të ulëta.

Kjo u hap rrugën udhëheqësve të G20-ës që të finalizojnë një normë të re globale të taksës minimale të korporatave prej 15% në një takim të nivelit të lartë në Romë në tetor, një veprim që mund të rikuperojë qindra miliarda dollarë për arkat publike të dobësuara nga kriza e COVID-19.

Në një deklaratë përfundimtare thuhej se perspektiva ekonomike globale ishte përmirësuar që nga bisedimet e G-20 në prill falë shpërndarjes së vaksinave dhe paketave të mbështetjes ekonomike, por pranohet fakti se situata është e brishtë për shkak të varianteve si Delta që përhapen me shpejtësi.

"Rimëkëmbja karakterizohet nga hendeqe të mëdha mes vendeve dhe brenda tyre dhe mbetet e ekspozuar ndaj rreziqeve, në veçanti përhapjes së varianteve të reja të virusit COVID-19 dhe ritmeve të ndryshme të vaksinimit," thotë deklarata.

"Ne riafirmojmë vendosmërinë tonë për të përdorur të gjitha mjetet në dispozicion për aq kohë sa duhet për të përballuar pasojat e COVID-19", vazhdon më tej ajo, duke theksuar që ato duhet të jenë në përputhje me ruajtjen e stabilitetit në çmime dhe financat publike.

Megjithëse dokumenti thekson mbështetjen për "ndarjen e drejtë globale" të vaksinave, aty nuk propozohen masa konkrete, thjesht përmendet një rekomandim për 50 miliardë dollarë financim për vaksina shtesë nga Fondi Monetar Ndërkombëtar, Banka Botërore, Organizata Botërore e Shëndetësisë dhe Organizata Botërore e Tregëtisë.

Dallimet në nivelet e vaksinimit mes të pasurve dhe të varfërve në botë mbeten të thella. Drejtori i Përgjithshëm i OBSH-së Tedros Adhanom Ghebreyesus e ka quajtur hendekun një "turp moral" që minon përpjekjet më të gjera për të zbutur përhapjen e virusit.

Ndërsa në disa nga vendet më të pasura mbi dy të tretat e qytetarëve kanë marrë të paktën një doze vaksine, kjo shifër bie nën 5% për shumë vende afrikane.

Kalendari

Ngjarjet e datës 23 Shtator 2021 - Mbahet mbledhja e Kryesisë së Kuvendit të Republikës së Kosovës. (Ndërtesa e Kuvendit, salla C 301, ora 10:00)

- Kandidati për Kryetar të Prishtinës, Uran Ismaili do të vizitoj Kompaninë Pastrimi në Prishtinë ku do të mbaj edhe një Konferencë për media në hapësirën e kësaj kompanie. (Kompania Pastrimi në Emshir pas stacionit të autobusëve, ora 11:30)

- Partia Socialdemokrate do të dorëzoj kallëzim penal në Prokurori. (Ndërtesa e Prokurorisë në lagjen Veternik, ora 13:00)

- Forumi i Gruas së Nismës Socialdemokrate në Malishevë mban takim elektoral, ku i pranishëm do të jetë kryetari Nismës, Fatmir Limaj dhe kandidati për kryetar të Komunës së Malishevës, Ekrem Kastrati. (Ambienti i jashtëm i shkollës fillore “Ibrahim Mazreku” në Malishevë, ora 14:00)

- Dhomat e Specializuara të Kosovës organizojnë informimin javore  në të cilin do  të  japin  një  informacion  të  përditësuar  mbi zhvillimet  e  fundit  lidhur  me  procedurat  gjyqësore  dhe  veprimtaritë  e  tjera  publike  të  gjykatës. (Online, ora 14:30)

- Forumi për Lidership dhe Diplomaci organizon ngjarjen lansuese të projektit: Promovimi i Zhvillimit Ekonomik Rajonal përmes Akademisë se Ndërmarrësisë. (Hotel Sirius, ora 16:00)

- Mbahet ceremonia e  hapjes së Kongresit te Parë Klinik të Kolegjit te Kirurgëve të Kosovës organizuar në bashkëpunim me Odën e Mjekëve të Kosovës. (Hotel Emerald, ora 17:00)