16 Maj 2022

Privatizimi i NP-ve vetëm nëse luftohet korrupsioni

Prishtinë, 11 maj - Ekspertë për çështje ekonomike në Kosovë vlerësojnë se privatizimi i kompanive publike do të jetë i suksesshëm dhe do të ndikojë në rritjen ekonomike, vetëm në qoftë se luftohet korrupsioni dhe krimi i organizuar.

Privatizimi i disa ndërmarrjeve publike dhe dhënia me koncesion e Aeroportit Ndërkombëtar të Prishtinës do të ndikojnë në zhvillimin ekonomik, në qoftë se në Kosovë luftohet korrupsioni dhe krimi i organizuar, thonë ekspertë për çështje ekonomike.

Në proces të privatizimit tashmë është Postë-Telekomi i Kosovës dhe Korporata Energjetike. Në proces është po ashtu edhe dhënia me koncesion e Aeroportit Ndërkombëtar të Prishtinës.

Por, raportet e ndryshme të mekanizmave ndërkombëtarë se në Kosovë ekziston korrupsioni, kanë sjellë një mesazh negativ tek investitorët e huaj për këtë proces, thotë Ibrahim Rexhepi, ekspert i ekonomisë.

Qeveria e Kosovës dhe institucionet ndërkombëtare, sipas Rexhepit, duhet t’i shpallin luftë kësaj dukurie, në mënyrë që në Kosovë të krijohet një ambient i sigurt për investitorët e huaj.

“Kjo luftë do të krijonte përparësi për investitorët e mundshëm në Kosovë. Por, nga ana tjetër, ky është një sinjal për investitorët se në çfarë niveli është krimi dhe korrupsioni”, thotë Rexhepi.

Pavarësisht kësaj, Muhamet Sadiku, profesor në Fakultetin Ekonomik në Universitetin e Prishtinës, e vlerëson të ngutshëm privatizimin e kompanive publike. Sipas tij, nuk është koha e duhur për një proces të tillë.

“Është pak e çuditshme kjo nguti për të vënë në lëvizje procesin e privatizimit të tri kompanive më të mëdha, duke pasur parasysh se kjo është një kohë e shkurtër. Besoj se kjo nuk është koha e duhur”.

“Pastaj, kjo qeveri nuk ka as kapacitete kohore; fjala është për një vit, vit e gjysmë dhe, në anën tjetër, janë në pyetje edhe metodat e privatizimit, të cilat duhet të analizohen edhe më shumë”, thotë Sadiku.

Sipas tij, i gjithë procesi i privatizimit të kompanive publike duhet të rishqyrtohet.

“Unë nuk mendoj se procesi duhet të pezullohet. Procesi duhet të rishqyrtohet dhe të shikohet edhe një herë nëse vërtet ishte i vënë në binarë të duhur në periudhën e deritanishme. Do të thotë, kërkohet një ripozicionim, rishikim i tërësishëm i privatizimit të këtyre kompanive“, thekson Sadiku.

Sipas një raporti të bërë nga Instituti “Riinvest”, faktori që do të ndikojë për një proces jo edhe aq të përkryer të privatizimit është korrupsioni brenda ndërmarrjeve publike, sidomos në Postë-Telekomin e Kosovës dhe në Korporatën Energjetike të Kosovës.

Në anën tjetër, Oda Ekonomike Amerikane në Kosovë ka vlerësuar se përshpejtimi i procesit të privatizimit të ndërmarrjeve publike do të ndikojë dukshëm në rritjen e efikasitetit të tyre dhe në reduktimin e korrupsionit, sidomos përmes zvogëlimit të aktiviteteve të prokurimit publik, ku edhe duket të jetë më e shprehur kjo dukuri.

(EL)

Kalendari

Ngjarjet e datës 16 maj 2022

- Akademia Diplomatike e Ministrisë së Punëve të Jashtme dhe Diasporës, në bashkëpunim me Friedrich Ebert Stiftung, hapin nesër në Pejë edicionin e 8-të të Shkollës Diplomatike Verore. (Hotel Dukagjini në Pejë, ora 9:00)

- Kryetari i Kuvendit të Republikës së Kosovës, Glauk Konjufca, viziton familjen e veprimtarit Ukshin Hoti. (Krushë e Vogël, ora 9:50)

- Mbahet mbledhja e Qeverisë së Kosovës, e cila do të udhëhiqet nga Zëvendëskryeministri i Parë i Republikës së Kosovës për Integrim Evropian, Zhvillim dhe Dialog, Besnik Bislimi. (Ndërtesa e Qeverisë, ora 10:00‪)

- Konstituohet  Komisioni Hetimor Parlamentar në lidhje me menaxhimin e krizës energjetike nga Qeveria e Republikës së Kosovës. (Ndërtesa e Kuvendit, salla N204, ora 10:00)

- ECIKS organizon ngjarjen përmbyllëse të programit Access - “Qasja në Treg dhe Shërbimet e Digjitalizimit për Bizneset Kosovare”, program ky i cili përgjatë katër viteve pati për qëllim të lehtësojë zhvillimin dhe transformimin digjital në sektorin privat dhe publik në Kosovë. (Hotel Emerald, ora 10:00)

- Në kuadër të Ditëve të Gjuhës Gjermane në Kosovë, Goethe Zentrum hap dyert për të gjithë të interesuarit për tu njoftuar me ofertart e tyre. (Goethe Zentrum në Prishtinë, ora 10:00)

- Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione takohet me ekspertin e angazhuar nga UN Women lidhur me përfundimin e draftligjit për mbrojtje nga dhuna në familje dhe dhuna në baza gjinore. (Ndërtesa e Kuvendit, salla N302, ora 11:00)

- OJQ Aktiv ka kënaqësinë t'ju ftojë në promovimin e ueb faqes “Miqësia Serbo-Shqiptare”. (Qendra e Energjisë Qytetare në Mitrovicë, Mbreti Petri I, 183a, ora 11:00)

- Me rastin e 23-vjetorit të zhdukjes së profesorit, politologut dhe luftëtarit të paepur të çështjes kombëtare Mr. Ukshin Hoti, do të bëhet një vizitë në Shtëpinë Muze të Ukshin Hotit. (Fshati Krushë e Madhe, ora 11:00)

 - Mbahet mbledhja e Kryesisë së Kuvendit të Kosovës. (Ndërtesa e Kuvendit, salla C 301, ora 11:00)

- Mbahet ceremonia e hapjes zyrtare e edicionit te dytë të panairit Max fest. (Sheshi Zahir Pajaziti, ora 11:00)

-  Komisioni për Ekonomi, Industri, Ndërmarrësi dhe Tregti shqyrtion raportin me rekomandime për Projektligjin për turizmin dhe raportin vjetor të Komisionit të Pavarur për Miniera dhe Minerale. (Ndërtesa e Kuvendit, salla N10, ora 12:00)

- Kryetari i Komunës së Rahovecit Smajl Latifi organizon takime publike me qytetarë për kërkesat e tyre dhe ecurinë e projekteve në këto fshatra: Brestoc, Hoçë e Vogël. (Objektet e shkollave fillore të fshatit Brestoc dhe Hoçë e Vogël, ora 17:00)

- Në kuadër të Ditëve të Gjuhës Gjermane në Kosovë, shfaqet filmi "Sami, Joe und ich" nga Karin Heberlein si dhe mbahet diskutim me temë "Diaspora në Kinema: Promovimi i imazhit të Kosovës në vende gjermano folese. (Kinema Armata, ora 18:00)

- Kryetari i Komunës së Rahovecit Smajl Latifi organizon takime publike me qytetarë për kërkesat e tyre dhe ecurinë e projekteve në këto fshatra: Nagac dhe Celinë. (Objektet e shkollave fillore të fshatit Nagac dhe Celinë, ora 18:00)

- Shfaqet premiera e dokumentarit “Babai dhe Babai”. (Muzeu Etnologjik “Emin Gjiku” në Prishtinë, ora 20:00)

- Kryetari i Komunës së Rahovecit Smajl Latifi organizon takime publike me qytetarë për kërkesat e tyre dhe ecurinë e projekteve në këto fshatit Krushë e Madhe. (Shtëpia e Kulturës “Muhamet Malsori”, ora 20:00)