Mitrovicë, 29 prill - Kryetarët e komunave Mitrovicë, Skenderaj dhe Vushtrri, Avni Kastrati, Sami Lushtaku e Bajram Mulaku, kanë nënshkruar të enjten një memorandum bashkëpunimi në fushën e inspekcionit, me qëllim të bashkërendimit të punëve në këtë fushë ndërmjet të tri komunave.

Këtë memorandum, të cilin e ka mbështetur EULOG-u, përkrahja e qeverisjes komunale nga Bashkimi Evropian, kryetari i komunës së Mitrovicës, Avni Kastrati, e ka vlerësuar si shumë të rëndësishme për të tri komunat.

Ai ka thënë se bashkëpunimi rajonal në fushën e inspekcioneve do të përfitojnë qytetarët. Poashtu edhe kryetari i komunës së Vushtrrisë, Bajram Mulaku, ka theksuar se fusha e inspekcionit është shumë e rëndësishme për çdo komunë.

Sipas tij, avancimi i punës në këtë aspekt duke përfshirë edhe bashkëpunimin ndërmjet komunave do të ndihmoj rritjen e efikasitetit të qeverisjes së mirë.

Ndërsa, Xhejms But, nga EULOG-u, e ka përshëndetur nënshkrimin e këtij memorandumi dhe ka thënë se kjo është një formë shumë e mirë e bashkëpunimit ndërmjet komunave. Ai ka shprehur bindjen në suksesin e bashkëpunimit në fushën e inspekcionit.