03 Shkurt 2023

Kosova merr më shumë se 100 milionë euro fonde nga BE-ja dhe Gjermania

Prishtinë, 8 dhjetor - Bashkimi Evropian, Gjermania dhe Qeveria e Kosovës nënshkruan dje në Prishtinë dy marrëveshje të mëdha financiare që do t'i mundësojnë Kosovës të marrë më shumë se 100 milionë euro për zbatimin e projekteve të trajtimit të ujërave të zeza dhe menaxhimit të mbeturinave të ngurta në tërë Kosovën nga viti 2023 deri në vitin 2027.

Të dy projektet, të cilat tregojnë solidaritetin e fortë të BE-së dhe shteteve anëtare me Kosovën, do të kontribuojnë në mbrojtjen e mjedisit dhe do të rrisin përputhshmërinë e Kosovës me standardet mjedisore të BE-së, si një nga kërkesat e anëtarësimit në BE.

Qëllimi është të zgjidhen problemet akute të mbeturinave në komunat e Kosovës dhe të ndihmohet në krijimin e kushteve më të sigurta dhe më të mira të jetesës. 

Projekti i trajtimit të ujërave të zeza i zbatuar në rajonin e Prishtinës do të përfshijë ndërtimin e linjave të reja kryesore të kanalizimit nga Prishtina në Fushë Kosovë dhe Obiliq, dhe në drejtim të Graçanicës dhe Jugperëndimit, si dhe rehabilitimin e rrjeteve rajonale të kanalizimeve dhe lidhjeve të shtëpive dhe të sistemit të ndarjes së ujërave të stuhishme.

Ky projekt do të plotësojë ndërtimin e një impianti për trajtimin e ujërave të zeza, që do të financohet nga Franca, duke e bërë këtë përpjekje të përbashkët të BE-së, Gjermanisë dhe Francës, investimin më të madh në këtë sektor në Kosovë.

Gjermania do të sigurojë 48.8 milionë dhe BE-ja 20 milionë euro për projektin e ujërave të zeza, ndërsa komunat e Prishtinës dhe Fushë Kosovës do të bashkëfinancojnë projektin me 9 dhe 2 milionë euro respektivisht.

Projekti për menaxhimin e mbeturinave të ngurta do të zbatohet në komunat e Prishtinës, Prizrenit, Gjilanit, Ferizajt, Podujevës dhe Pejës dhe do të përfshijë ndërtimin, zgjerimin dhe rehabilitimin e deponive dhe stacioneve të transferimit të mbeturinave të ngurta.

Për këtë projekt, Gjermania do të sigurojë 20 milionë dhe BE-ja gjithsej deri në 24 milionë euro, ndërsa Qeveria e Kosovës do të kontribuojë me 8 milionë euro dhe Komuna e Pejës me 3 milionë euro të tjera.

BE-ja dhe shtetet e saj anëtare mbeten ofruesi më i madh i ndihmës financiare për Kosovën.

 

Kalendari

Ngjarjet e datës 3 shkurt 2023  - Këshilli Gjyqësor i Kosovës mban mbledhjen e radhës. (Ndërtesa e KGjK-së, ora 9:00)

- Kuvendi Komunal i Gjilanit mban seancë të jashtëzakonshme, ku në rend dite do të jetë falja e tatimit në pronë në vlerën deri 100 euro për të gjithë tatimpaguesit e kësaj komune, për vitin 2023. (Salla e Kuvendit Komunal të Gjilanit, ora 10:00)

- Sindikata e Sektorit Privat të Kosovës mban konferencë për shtyp lidhur me gjendjen e punëtorëve teknik të Sektorit Privat te Kosovës dhe dialogu me qeverinë dhe institucionet tjera të Kosovës. (Zyrët e Sindikatës, ora 11:00)

- Lidhja Demokratike e Kosovës Dega në Prizren, mban konferencë për medie. (Selia e LDK-së në Prizren, ora 11:00)

- Komisioni për Buxhet, Punë dhe Transfere shqyrton Projektligjin për ndryshimin dhe plotësimin e Ligjit mbi ndarjet buxhetore, si dhe shqyrton listën e kandidatëve për plotësimin e një pozite për anëtar joekzekuiv të Bordit të Bankës Qendrore të Kosovës. (Kuvendi i Kosovës, salla C203, ora 13:30)

- Prezantohet puna e kryer rreth vajzave dhe grave me aftësi të kufizuara të cilat kanë folur hapur për historitë e tyre të, abuzimeve seksuale, dhunës fizike, dhunës psikike, keqtrajtimeve, ofendimeve dhe diskriminimeve. (Ndërtesa e Qeverisë, salla P38, ora 14:30)

- Parlamenti i Studentëve të Universitetit të Prishtinës organizon marsh kundër Asociacionit, dhe në shënim të 53-vjetorit të themelimit të UP-së. (Biblioteka Kombëtare, ora 16:00)