01 Dhjetor 2022

Korrupsioni, po lagron investitorët e huaj

Prishtinë, 23 maj - Ekspertët e çështjeve ekomomike kërkojnë nga autoritetet kosovare që t’i marrin për bazë kritikat e fundit të mekanizmave ndërkombëtarë për përmirësimin e ambientit për investitorë të huaj. Në raportet e fundit të këtyre institucioneve thuhet se bizneset, të cilat vijnë për të investuar në Kosovë, raportojnë për mungesë të energjisë elektrike, moszbatim të ligjit dhe për - korrupsion.

Ekspertët pajtohen me kritikat e këtyre raporteve, ku thuhet që, me gjithë sektorë të mjaftueshëm për investime, problemet e shumta dhe shkalla e lartë e korrupsionit, kanë ndikuar që investitorët e huaj të mos e investojnë kapitalin e tyre në Kosovë.

Dr. Muhamet Sadiku tha për REL se me gjithë hapësirat e mjaftueshme për investime, barrierat e shumta në këtë sektor i kanë bërë investitorët të hezitojnë të investojnë në Kosovë. “Gjithnjë do të mbetet obligim për forcimin e shtetit ligjor, luftimin e korrupsionit, joformalitetit në ekonomi dhe gjithnjë do të jetë e nevojshme që Kosova ta përmirësojë sistemin e qeverisjes në të gjitha nivelet, sepse vetëm vendet që krijojnë ambient miqësor mund të llogarisin në fluksin e investimeve”, vlerësoi Sadiku.

Ndërkaq, nënkryetari i Odës Ekonomike të Kosovës, Safet Gërxhaliu tha se përkeqësimi i klimës për investime në Kosovë është bërë për shkak të nivelit të lartë të korrupsionit.

Sipas Gërxhaliut, pa përmirësimin e këtyre fushave Kosova do të vazhdojë të ketë nivel të ulët të investimeve dhe gjendje të rëndë ekonomike.

“Në Kosovë, korrupsioni dhe krimi i natyrës ekonomike është forcuar më tepër dhe, në këtë mënyrë, është utopike të mendojmë se mund të vijnë investitorë të huaj. Kosova është duke shërbyer për të promovuar investime në vendet e rajonit dhe jo në Kosovë”, vlerësoi Gërxhaliu.

Për krijimin e një klime të favorshme për investitorët, Ministria e Tregtisë dhe Industrisë ka përgatitur edhe strategjinë për investime 2010-2012, por kjo strategji ende nuk ka treguar rezultatet e para.

Gërxhaliu mendon se Kosovës i duhet një strategji e mirëfilltë, e cila do të zbatohej dhe jo strategji që mbetet vetëm në letër. “Një investitor, i cili vjen me para të gatshme për t’i investuar në Kosovë dhe sheh një ambient të tillë, sigurisht se ato para do t’i investojë në ndonjë vend të Ballkanit Perëndimor dhe për këtë arsye, fatin do ta ketë ose Maqedonia ose Shqipëria, por jo Kosova”, vlerësoi Gërxhaliu.

Ndërkaq dr. Muhamet Sadiku tha se pa luftimin e këtyre dukurive negative Kosova nuk mund të presë përmirësim të gjendjes aktuale ekonomike. Sadiku u sugjero autoriteteve kosovare që të ndërmarrin masa të nevojshme, pasi që, siç thekson ai, tani është koha e fundit për të bërë më shumë në këtë drejtim.

“Realisht, investitorët presin më shumë nga Kosova në kuptimin e forcimit të shtetit ligjor, në kuptimin e përmirësimit të infrastrukturës, përmirësimin e qeverisjes, pastaj të luftimit të korrupsionit dhe luftimit të ekonomisë joformale. Duhet pranuar se në përgjithësi bizneset e Kosovës janë duke u përballur me disa barriera, të cilat japin sinjale dekurajuese për përfshirjen e investitorëve të huaj në realizimin e projekteve të ndryshme”, vlerësoi Sadiku. 

Kalendari

Ngjarjet e datës 1 dhjetor 2022

- Komisioni për Shëndetësi dhe Mirëqenie Sociale shqyrton Projektligjin mbi ndarjet buxhetore për Buxhetin e Republikës së Kosovës për vitin 2023, për fushat që janë në fushëveprim të Komisionit. (Ndërtesa e Kuvendit, salla N302, ora 9:00)

- Ne kuadër të Ditës botërore të luftës kundër sëmundjes së HIV/AIDS, Drejtoria e Shëndetësisë organizon hapjen e Qendrës Mobile për testim me ç’ rast Kryetari i Prishtinës, Përparim Rama bashkë me Drejtorin e Shëndetësisë Izet Sadiku do të vizitojnë këtë qendë. (Sheshi Zahir Pajaziti, ora 11:00)

- Komisioni për Ekonomi, Industri, Ndërmarrësi dhe Tregti shqyrton kërkesat buxhetore të institucioneve që i raportojnë Komisionit, lidhur me Projektligjin mbi ndarjet buxhetore për Buxhetin e Republikës së Kosovës për vitin 2023. (Ndërtesa e Kuvendit, salla N10, ora 11:00)

- Drejtoria e Shëndetësisë në Komunën e Prishtinës organizon një panel diskutimi me temë “Barazia - Dita Botërore e HIV/AIDS” me akterët relevant të kësaj teme. (Salla e amfiteatrit në objektin e Qendrës së Studenteve, ora 12:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022, në nivelin legjislativ, ekzekutiv, rregullator dhe në ndërmarrje publike interviston dëshmitare nga ZRRE për periudhën 2013-2017 dhenga KEK për periudhën 2018-2022. (Ndërtesa e Kuvendit, salla N204, ora 13:00)

- Kolegji AAB organizon ceremoninë e ndarjes së Çmimit Ndërkombëtar për Demokraci dhe Integrime, politikanes së njohur gjermane, ish deputete në Parlamentin Evropian, zonjës Doris Pack. (Teatrin AAB “Faruk Begolli”, ora 15:00)

- Kolektivi Për Mendim dhe Veprim Feminist organizon protestë për të kërkuar që vrasjet e grave nga burrat të trajtohen si urgjencë kombëtare. (Sheshi Zahir Pajaziti, ora 16:00)

- Galeria 17 organizon hapjen e ekspozitës "In the making", nga Yll Xhaferi dhe DYVO. (Galeria 17, ora 18:00)

- Mbahet hapja solemne e Festivalit Ndërkombëtar të Filmit “Art Without Limit International Film Festival” edicioni i 3 -të. (Kino Armata, ora 19:00)