03 Shkurt 2023

Deputetët ratifikuan marrëveshjen Kosovë-Gjermani

Prishtinë, 1 prill - Kuvendi i Kosovës, ratifikoi sot marrëveshjen për kredi dhe financim ndërmjet Qeverisë së Kosovës dhe Bankës Qeveritare të Gjermanisë KfV - Frankfurt. Kosova, me këtë marrëveshje, përfiton 16.5 milionë grante dhe 17 milionë kredi të buta, mjete këto që do të përdoren për realizimin e projektit të rrjetit energjetik me Shqipërinë dhe Malin e Zi.

Ministri i Ekonomisë dhe Financave, Ahmet Shala tha se ky financim ka për qëllim ndërtimin e lidhjes prej 400 kilovoltësh Prishtinë-Tiranë, e që ndryshe quhet edhe autostrada energjetike.

“Donacionet të cilat KfW i ka ofruar si grante janë pa kthim dhe i bie që të kemi 16 milionë euro falas”, ka thënë Shala.

Të gjitha grupet parlamentare duke përfshirë edhe opozitën i kanë dhënë mbështetje ratifikimit të marrëveshjes, megjithëse këta të fundit e kanë konsideruar si marrëveshje e vonuar.

Shala vlerësoi se ratifikimi i kësaj marrëveshje do të ndihmojë sektorin ekonomik, sidomos tani para proceseve që janë përpara në këtë sektor, ndërkohë që ka njoftuar që punimet janë duke u zhvilluar paralel në pjesën e Kosovës, Shqipërisë dhe Malit të Zi.

Ndërkaq Komisioni parlamentar për buxhet dhe financa, ka vlerësuar se ky është suksesi i parë pas anëtarësimit të Kosovës në Fondin Monetar Ndërkombëtar.

Kuvendi i Kosovës gjatë seancës shqyrton edhe Projektligjin për masat antidumping, propozim-vendimin e Qeverisë së Kosovës për emërimin e anëtarëve të Bordit të Autoritetit Rregullator të Hekurudhave të Kosovës dhe rekomandimet e Komisionit për ekonomi, tregti, industri, energjetikë dhe telekomunikacion për Propozimin-strategjinë e energjisë për periudhën 2009-2018.

Kuvendi, në vazhdim, miratoi edhe rekomandimet e Komisionit për Ekonomi, Tregti, Industri, Energjetikë dhe Telekomunikacion për Propozim-Strategjinë e Energjisë për periudhën 2009-2018. Kryeministri Thaçi tha se “Qeveria ka rishikuar Strategjinë për Energjinë në pajtim me zhvillimet aktuale në tregun botëror, duke pasur parasysh edhe krizën globale.

Kalendari

Ngjarjet e datës 3 shkurt 2023  - Këshilli Gjyqësor i Kosovës mban mbledhjen e radhës. (Ndërtesa e KGjK-së, ora 9:00)

- Kuvendi Komunal i Gjilanit mban seancë të jashtëzakonshme, ku në rend dite do të jetë falja e tatimit në pronë në vlerën deri 100 euro për të gjithë tatimpaguesit e kësaj komune, për vitin 2023. (Salla e Kuvendit Komunal të Gjilanit, ora 10:00)

- Sindikata e Sektorit Privat të Kosovës mban konferencë për shtyp lidhur me gjendjen e punëtorëve teknik të Sektorit Privat te Kosovës dhe dialogu me qeverinë dhe institucionet tjera të Kosovës. (Zyrët e Sindikatës, ora 11:00)

- Lidhja Demokratike e Kosovës Dega në Prizren, mban konferencë për medie. (Selia e LDK-së në Prizren, ora 11:00)

- Komisioni për Buxhet, Punë dhe Transfere shqyrton Projektligjin për ndryshimin dhe plotësimin e Ligjit mbi ndarjet buxhetore, si dhe shqyrton listën e kandidatëve për plotësimin e një pozite për anëtar joekzekuiv të Bordit të Bankës Qendrore të Kosovës. (Kuvendi i Kosovës, salla C203, ora 13:30)

- Prezantohet puna e kryer rreth vajzave dhe grave me aftësi të kufizuara të cilat kanë folur hapur për historitë e tyre të, abuzimeve seksuale, dhunës fizike, dhunës psikike, keqtrajtimeve, ofendimeve dhe diskriminimeve. (Ndërtesa e Qeverisë, salla P38, ora 14:30)