Islamabad, 17 gusht - Nisur nga përmbytjet shkatërruese në Pakistan, Banka Botërore i siguroi qeverisë pakistaneze një kredi prej rreth 900 milionë dollarësh ose rreth 702 milionë euro. Pasojat e katastrofës në ekonominë e vendit aziatik janë të mëdha, tha një zëdhënës në Uashington.

Mbi një e katërta e vendit ndodhet nën ujë, 20 milionë njerëz janë të pastrehë. Të prekurit nga kjo katastrofë ankohen se qeveria po shpërndan ushqime vetëm kur mediet janë aty prezent.

Sipas vlerësimeve të organizatës humanitare ndërkombëtare Care, Pakistani ndodhet në prag të një krize urie.

Deri 3,5 milionë fëmijë mund të vdesin nga hepatiti, tifoja dhe diarreja. Ministri gjerman për Zhvillim Dirk Niebel  bëri thirrje për ndihma dhe theksoi se bashkëpunimi me OKB-në dhe organizatat e tjera humanitare të jetë i sigurtë që paratë të mos shkojnë në kanale të korruptuara.