15 Gusht 2022

AKP i dorëzohet Raportin Vjetor Financiar Parlamentit

Prishtinë, 25 mars - Kryetari i Bordit të Drejtorëve të Agjencisë Kosovare të Privatizimit (AKP), Dino Asanaj, i shoqëruar nga zëvendësdrejtorët menaxhues, Shkëlzen Lluka dhe Naim Avdiu, i kanë dorëzuar të enjten kryetarit të Kuvendit të Kosovës, dr. Jakup Krasniqi, Raportin Vjetor Financiar të AKP-së për vitin 2009, si dhe Pasqyrat financiare të kësaj agjencie. Ata e kanë njoftuar kreun e Kuvendit me punën dhe angazhimet e AKP-së për sa i përket procesit të privatizimit. 


Asanaj e ka vlerësuar të suksesshëm këtë proces, gjatë të cilit është privatizuar mbi 50 për qind e pronës shoqërore në Kosovës. 


Një ndër të arriturat e fundit të AKP-se, ka thënë Asanaj, është edhe Strategjia për shpërndarjen e përkohshme të 20 përqindëshit nga të hyrat e privatizimit për punëtorët e ligjshëm. 


“Në takimin e fundit të Bordit të AKP-së janë aprovuar nëntë lista të punëtorëve dhe tanimë është bërë shpërndarja e këtyre mjeteve”, ka thënë Asanaj, duke shtuar se në takimin e nesërm të Bordit të AKP-së priten të aprovohen edhe disa lista të tjera dhe më pastaj të bëhet edhe shpërndarja e mjeteve. 


Një ndër çështjet tjera të diskutuara në këtë takim ishte edhe nevoja e amendamentimit të legjislacionit të aplikueshëm që ndërlidhet me punën e AKP-së. Në veçanti dhe me interes të veçantë janë veçuar amendamentimet në vetë Ligjin mbi Themelimin e AKP-së, nxjerrja e ligjit mbi Odën e Veçantë të Gjykatës Supreme, ashtu siç parashihet edhe në Pakon e Presidentit Ahtisari, si dhe amandementimi i Rregullores së UNMIK-ut 2005/48 mbi Riorganizimin dhe Likuidimin e Ndërmarrjeve Shoqërore. 


Është folur, ndërkaq edhe për synimet e AKP-së dhe vazhdimin e procesit të privatizimit në të ardhmen, kurse është diskutuar edhe çështja e mjeteve financiare, të përfituara nga privatizimi, të depozituara jashtë vendit, si dhe sistemi bankar i Kosovës, me kamata jostimuluese për zhvillimin e bizneseve. 


“Mjetet financiare të përfituara nga privatizimi duhet të kthehen në Kosovë dhe të përdoren për kreditimin e bizneseve fitimprurëse”, ka theksuar Asanaj.


Kryeparlamentari Krasniqi, i ka falënderuar drejtuesit e AKP-së për informacionin dhe Raportin Vjetor Financiar për vitin 2009 (i përgatitur në formë libri) dhe i ka përgëzuar për punën e deritashme të këtij agjencioni, sidomos për zbatimin e 20 përqindëshit për punëtorët.


Drejtuesit e AKP-së e kanë siguruar kryeparlamentarin Krasniqi se pasqyrat financiare të kësaj agjencie janë përgatitur në pajtim me Ligjin mbi Menaxhimin e Financave publike dhe Përgjegjësitë, si dhe në pajtim me Udhëzimet Administrative të Thesarit dhe të Standardeve Ndërkombëtare për Sektorin Publik (SNKSP). Në funksion të transparencës së punës dhe, konform ligjit, kanë theksuar përfaqësuesit e AKP-së, Raporti i është dorëzuar edhe drejtorit të Thesarit.

Kalendari

Ngjarjet e datës 15 gusht 2022  - Presidentja e Republikës së Kosovës, Vjosa Osmani Sadriu  pret me ceremonitë më të larta shtetërore, me rastin e fillimit të mandatit të tij, presidentin e Republikës së Shqipërisë, Bajram Begaj. (Sheshi “Ibrahim Rugova”, ora 10:00 - Mediat duhet të jenë në ndërtesën e Kuvendit të Kosovës më së voni në ora 9:15)

- Komuna e Rahovecit organizon dëgjim publik me organizatat jo qeveritare për buxhetin e vitit 2023 dhe Kornizës Afatmesme Buxhetore për vitet 2024-2025. (Salla e Kuvendit Komunal, ora 10:00)

- Fakulteti i Filologjisë i Universitetit të Prishtinës "Hasan Prishtina" organizon ceremoninë solemne të hapjes së punimeve të Seminarit XL Ndërkombëtar për Gjuhën, Letërsinë dhe Kulturën Shqiptare. (Amfiteatri i Bibliotekës Qendrore Universitare, ora 11:00).

- Kryetari i Kuvendit të Republikës së Kosovës, Glauk Konjufca, pret në takim presidentin e Republikës së Shqipërisë, Bajram Begaj. (Kabineti i kryetarit, ora 12:15 - Mediat mund të marrin pamje në fillim të takimit)

- Kryeministri i Kosovës, Albin Kurti pret në takim presidentin e Republikës së Shqipërisë, Bajram Begaj. (Ndërtesa e Qeverisë, ora 13:00)

- Kryetari i Komunës së Gjilanit, Alban Hyseni pret sot në takim ministren e Arsimit, Shkencës, Teknologjisë dhe Inovacionit, Arbërie Nagavci, ku më pas do të ketë prononcim për media në Zyrën e Kryetarit. (Gjilan, ora 15:00)

- Presidenti i Shqipërisë, Bajram Begaj zhvillon homazhe te varri i ish-presidentit Ibrahim Rugova. (Velani, ora 15:45)

- Presidenti i Shqipërisë, Bajram Begaj zhvillon homazhe te varrezat e Familjes Jashari. (Kompleksi Memorial  në Prekaz, ora 16:35)

- Në kuadër të Akademisë Verore ‘’Arbën Xhaferi"  mbahet akademi përkujtimore për jetën dhe veprën e Arbën Xhaferit. (Pallati i Kulturës, "Hasan Prishtina", ora 19:30)