SHBA, 30 shtator - Toka nuk gjen paqe nga objektet qiellore që vazhdojnë të kalojnë me shpejtësi afër planetit tonë, pa e prekur atë.

Kështu, pak ditë pas kalimit të dy asteroidëve, një tjetër me diametër 45-50 metra do kalojë pranë Tokës në muajin tetor. Sipas përllogaritjeve, objekti qiellor do na “përshëndesë” nga rreth 6.4 milionë km.

Ai u vu re për herë të parë kur ndodhej rreth 32 milionë km larg Tokës. Eshtë quajtur 2010 ST3 dhe nuk përbën asnjë alarm…të paktën për momentin.

Astronomët kanë llogaritur orbitën që do të ndjekë, duke vënë në dukje se në vitin 2098 do të godasë planetin.

Robert Jedicke nga Universiteti i Hauait ka theksuar se ka shumë mundësi që asteroidi të shpërbëhet në atmosferë, por nuk përjashtohet mundësia që të arrijë deri në tokë.

“Gjithsesi, ka shumë asteroidë të tjerë më të rrezikshëm që nuk i kemi identifikuar dhe që mund të përplasën me ne në të ardhmen”, thekson Jedicke.

Një objekt me përmasat e 2010 ST3 është përplasur me Tokën në vitin 1908 në Tunguska të Siberisë duke djegur 60 milionë pemë në një sipërfaqe 2 mijë km katrorë.