Prishtinë, 5 maj - Komisioneri i BE-së për Zgjerim dhe Politikë të Fqinjësisë, Štefan Füle do të vizitojë Kosovën në vizitën e tij të dytë zyrtare më 6 dhe 7 maj 2010. 

Komisioneri Fuele do të takohet me partnerët kyçë vendës dhe ndërkombëtarë,  si kryeministrin Thaçi dhe ministrin e Integrimeve evropiane, Besim Beqaj. 

Gjatë vizitës së tij dyditore, Komisioneri Fuele do ta përurojë ndërtesën e re të Ministrisë së Punëve të Brendshme e financuar nga BE-ja, Pikën informative në Mitrovicën Veriore dhe kompleksin afarist në Zveçan.

Po ashtu ai do të mbajë një ligjëratë para studentëve të universitetit në Mitrovicën Veriore. Komisioneri Fuele do ta shënojë Ditën e Evropës në një pritje formale në Prishtinë. 

Z. Fuele është emëruar Komisioner për Zgjerim dhe Politikë Evropiane të Fqinjësisë në shkurt 2010. Vizita e tij e mëhershme në Kosovë ishte në fund të marsit 2010.