05 Dhjetor 2022

Franca mbështët integrimin e Kosovës në Bashkimin Evropian

Prishtinë, 15 qershor - Kryetari i Kuvendit të Kosovës, dr, Jakup Krasniqi, priti sot delegacionin e  Grupit parlamentar të miqësisë Francë –Kosovë, të kryesuar nga kryetari i këtij komisioni, z. Christian Menard, i cili shoqërohej edhe nga  ambasadori i Francës në Kosovë,  Zhan Fransua Fitu.

Pasi u falënderua për pritjen që iu organizua, kryetari i Grupit parlamentar të miqësisë Francë –Kosovë theksoi se parlamentarët francez ndjekin me interesim proceset e gjithëmbarshme , si dhe rezultatet që po arrihen në Kosovë.

“Kemi vërejtur cilësi në demokratizim. Shohim se demokratizimi ka përfshirë edhe komunitetin serb, pos atij ne veri të Kosovës, integrimi i të cilit do të jetë më i vështirë. Franca është e vendosur në përpjekjet që çojnë drejt integrimit të Kosovës në Bashkimin Evropian”, theksoi  z. Christian Menard. Në vijim ai foli edhe për pasuritë qe ka Kosovë, si në minerale, ashtu edhe në bujqësi. Kosova , tha z. Menard, ka edhe një fond shumë të begatshëm arkeologjik.

Duke iu uruar mirëseardhje , kryekuvendari Krasniqi falënderoi institucionet dhe popullin e Francës për mbështetjen që i ka dhënë e po i jep Kosovës, pasi vendi ka nevojë për traditën demokratike franceze. Është shumë domethënëse për Kosovës, tha z. Krasniqi, prezenca e politike e Francës në Kosovë, si dhe prezenca e saj në kuadër të KFOR-it dhe të EULEX-it. Parlamenti i Francës ka ndihmuar Kuvendin e Kosovës edhe në kuadër të konzorciumit të katër shteteve të BE-së, ndërsa kjo mbështetje vazhdon edhe më tutje.

Një shtytje të re këtij bashkëpunimi do t’ i japin edhe grupet e miqësisë së dy parlamenteve , që do të jenë edhe dy ura të fuqishme që lidhin e afrojnë edhe më fuqishëm dy popujt dhe shtetet. 

Në vijim kreu i legjislativit  foli me të dhëna konkrete lidhur me strukturën e Kuvendit të Kosovës, si dhe rezultatet që po arrihen në fushën e legjislacionit, posaçërisht kur është fjala për ligjet që derivojnë nga Pakoja e Ahtisaarit. Duke folur për çështjen e integrimit të komuniteteve kryekuvendari Krasniqi tha se në jetën institucionale e shoqërore, janë të përfshira komunitetet, pos  pjesëtarëve të komunitetit serb, pjesëmarrja e të cilëve ende nuk kënaq, sidomos kur është fjala për veriun e Kosovës.

Kryekuvendari Krasniqi pastaj foli edhe për procesin e njohjeve të Kosovës, duke theksuar se disa shtete janë në pritje të vendimit të Gjykatës Ndërkombëtare të Drejtësisë, nga e cila populli i Kosovës pret që të njohë vullnetin e tij, ndaj edhe pritet që numri i shteteve pas vendimit të kësaj Gjykate të shtohet edhe më. Kosovës, pos në procesin e njohjes, ndihma e Bashkimit Evropian, pra edhe e Francës, i duhet sidomos në përpjekjet e Kosovës për liberalizimin e vizave, që do të mundësonte lëvizje të lirë të qytetarëve, posaçërisht e të rinjve që duan të shkollohen  në universitetet evropiane, por kjo do të reflektohej pozitivisht edhe në aktivitetet e biznismenëve.

Kryekuvendari Krasniqi i bëri një vështrim edhe marrëdhënieve të Kosovës me shtetet fqinje, duke theksuar se me të gjitha shtetet Kosova po ndërton marrëdhënie të mira, pos me Serbinë, nga e cila madje po pengohen disa nisma të zgjerimit të bashkëpunimit në Rajon.

Duke u ndërlidhur me këtë çështje nga bashkëbiseduesit francez u tha se pas vendimit të GJND-së gjërat do të shkojnë shumë më shpejt. Ndërkaq, të vetëdijshëm për vështirësitë që ka Kosova në veri, ata theksuan se disa punë nuk mund të kryhen shpejt, megjithë vullnetin e mirë,duke zënë në gojë një thënie frënge se edhe Parisi nuk është bërë për një ditë. Në këtë vështrim u tha se nganjëherë vetë njerëzit mund të bëjnë më shumë se sa diplomacia, ndaj gjithnjë duhet të punohet për pajtim.  

Kalendari

Ngjarjet e datës 5 dhjetor 2022 - Kryetari i Kryeqytetit, Përparim Rama, do të nënshkruajë marrëveshjen me partneritet publiko privat për ndërtimin e tri shkollave të reja dhe ofrimin e shërbimeve të mirëmbajtjes dhe operimit në Komunën e Prishtinës. (Ndërtesa e Vjetër e Komunës së Prishtinës, ora 9:00)

- Instituti i Kosovës për Drejtësi, Grupi për Studime Juridike dhe Politike, Lëvizja Fol, Iniciativa për Progres, Çohu dhe Colombus organizojnë tryezë të rrumbullakët, ku do të diskutohet lidhur me “Reforma në Drejtësi”. (Hotel Sirius, ora 10:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022 interviston Njazi Thaçin, Luigj Imerin, Perparim Kabashin, Nagip Krasniqin, Faruk Hajrizin, Rrezarta Pllanën, Hysen Fazliun, Musa Misinin, Skender Hazirin, Ali Hamitin, Izet Rushitin dhe Krenar Bujupin. (Ndërtesa e Kuvendit, salla N204, ora 11:00)

- Presidentja e Republikës së Kosovës, Vjosa Osmani Sadriu pret në takim Ndihmës Administratoren e USAID-it, Erin E. McKee. (Kabineti i Presidentes,ora 12:00)

- Ministria e Kulturës, Rinisë dhe Sportit në bashkëpunim me UNICEF-it dhe UN Volunteers shënojnë Ditën Ndërkombëtare të Vullnetarizmit. (Kino Armata, sheshi “Zahir Pajaziti”, ora 13:00)

- Instituti i Kosovës për Drejtësi organizon tryezë të rrumbullakët, ku do të prezantohet raporti me titull “Parashkrimi i Korrupsionit”, i cili është rezultat i monitorimit sistematik që IKD i bënë sistemit Gjyqësor dhe atij Prokurorial të Republikës së Kosovës. (Hotel Sirius, ora 13:00)

- Këshilli Rinor Kosovar në bashkëpunim me Kuvendin e të Rinjëve të Ferizajt dhe Komunën e Ferizajt do të mbajë panelin e diskutimit dhe aktivitetin ‘Dita e Vullnetarizmit’ me qëllim të promovimit dhe diskutimit rreth punës vullnetare, nevojave të vullnetarëve dhe aktiviteti i tyre në këtë komunë. (Salla e Kuvendit Komunal në Ferizaj, ora 14:00)

- Lëvizja FOL në kuadër të  “Javës Kundër Korrupsion 2022” mban konferencë për media me ç’rast do të bëjë publikimin e raportit "Masat disiplinore kundër nëpunësit civil për korrupsion dhe shkelje etike". (Hotel Sirius, ora 15:15)

- Kryeministri i Kosovës, Albin Kurti pret në takim Ndihmës Administratoren e USAID-it, Erin E. McKee. (Zyra e Kryeministrit të Republikës së Kosovës, ora 15:45)