05 Dhjetor 2022

Britania e Madhe e shqetësuar me tensionet në Ballkanin Perëndimor

Londër, 14 dhjetor - Britania e Madhe u bëri thirrje përfaqësuesve të Ballkanit Perëndimor të refuzojnë gjuhën e urrejtjes dhe të punojnë me komunitetit ndërkombëtar, për të ruajtur paqen dhe qëndrueshmërinë në rajon.

Këto komente u bënë pas një takimi të shefes së diplomacisë britanike, Liz Truss me ministrat e Jashtëm të Shqipërisë, Bosnjës, Kosovës, Malit të Zi, Maqedonisë së Veriut dhe Serbisë. Në takim morën pjesë edhe i dërguari amerikan për Ballkanin, Gabriel Escobar dhe ai evropian Miroslav Lajçak.

Në një njoftim të qeverisë britanike thuhet se takimi u mbajt në një periudhë kur “tensionet në rajon kanë arritur kulmin”, duke ju referuar deklarimeve të Përfaqësuesit të Lartë ndërkombëtar në Bosnjë dhe Hercegovine se vendi aktualisht po përballet me kërcënimin më të madh ekzistencial në periudhën e pasluftës dhe se ka një mundësi reale për ndarje dhe konflikt të mëtejshëm.

“Së bashku me partnerët ndërkombëtarë, Britania e Madhe po punon për të trajtuar çdo kërcënim ndaj qëndrueshmërisë pas 26 vitesh përparimi të arritur me vështirësi në Bosnje dhe Hercegovinë”, thuhet në njoftim në të cilin theksohet se situata në Ballkanin Perëndimor është diskutuar edhe në takimin e G-7-tës që u mbajt gjatë fundjavës në Liverpool.

Njoftimi citon sekretaren e Jashtme Liz Truss të ketë thënë se Britania është e përkushtuar ndaj Ballkanit Perëndimor dhe për mbrojtjen dhe promovimin e lirisë dhe demokracisë në rajon.

“Ndërsa u mblodhëm në Londër me ministrat e Jashtëm të gjashtë vendeve të rajonit, si dhe përfaqësues nga Bashkimi Evropian dhe Shtetet e Bashkuara, tensionet janë të larta dhe komuniteti ndërkombëtar duhet të veprojë për të mbrojtur paqen e fituar me vështirësi. Forcimi i lidhjeve ekonomike me rajonin është një mënyrë jetike për të krijuar vende pune e mirëqenie, për të siguruar qëndrueshmëri dhe për të mbështetur lirinë”, tha sekretarja Truss.

Në njoftim thuhet se Britania mbështet aspiratat e Ballkanit Perëndimor për integrimet euro-atlantike, ndërsa nënvizohet se ripajtimi dhe marrëdhëniet mira fqinjësore janë thelbësore për përmbushjen e këtij synimi dhe ruajtjen e qëndrueshmërisë në rajon.

Britania e Madhe, ndonëse është larguar nga Bashkimi Evropian është zotuar “të vazhdojë të jetë mbështetëse e reformave” në Ballkanin Perëndimor. Me 2 dhjetor kryeministri Boris Johnson, emëroi Sir Stuart Pech si të dërguar të posaçëm për Ballkanin Perëndimor.

Takimi synon të ritheksojë përkushtimin e Britanisë ndaj procesit të Berlinit dhe të inkurajojnë rolin e shoqërisë civile për të nxitur paqen dhe qëndrueshmërinë në rajon.

Britania e Madhe “u kërkoi udhëheqësve politikë në rajon që të refuzojnë gjuhën e urrejtjes, të dënojnë çdo madhërim të autorëve të gjenocidit dhe krimeve të luftës dhe të respektojnë vendimet e gjykatave ndërkombëtare dhe vendase”, thuhet në njoftimin e qeverisë britanike.

Kalendari

Ngjarjet e datës 5 dhjetor 2022 - Kryetari i Kryeqytetit, Përparim Rama, do të nënshkruajë marrëveshjen me partneritet publiko privat për ndërtimin e tri shkollave të reja dhe ofrimin e shërbimeve të mirëmbajtjes dhe operimit në Komunën e Prishtinës. (Ndërtesa e Vjetër e Komunës së Prishtinës, ora 9:00)

- Instituti i Kosovës për Drejtësi, Grupi për Studime Juridike dhe Politike, Lëvizja Fol, Iniciativa për Progres, Çohu dhe Colombus organizojnë tryezë të rrumbullakët, ku do të diskutohet lidhur me “Reforma në Drejtësi”. (Hotel Sirius, ora 10:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022 interviston Njazi Thaçin, Luigj Imerin, Perparim Kabashin, Nagip Krasniqin, Faruk Hajrizin, Rrezarta Pllanën, Hysen Fazliun, Musa Misinin, Skender Hazirin, Ali Hamitin, Izet Rushitin dhe Krenar Bujupin. (Ndërtesa e Kuvendit, salla N204, ora 11:00)

- Presidentja e Republikës së Kosovës, Vjosa Osmani Sadriu pret në takim Ndihmës Administratoren e USAID-it, Erin E. McKee. (Kabineti i Presidentes,ora 12:00)

- Ministria e Kulturës, Rinisë dhe Sportit në bashkëpunim me UNICEF-it dhe UN Volunteers shënojnë Ditën Ndërkombëtare të Vullnetarizmit. (Kino Armata, sheshi “Zahir Pajaziti”, ora 13:00)

- Instituti i Kosovës për Drejtësi organizon tryezë të rrumbullakët, ku do të prezantohet raporti me titull “Parashkrimi i Korrupsionit”, i cili është rezultat i monitorimit sistematik që IKD i bënë sistemit Gjyqësor dhe atij Prokurorial të Republikës së Kosovës. (Hotel Sirius, ora 13:00)

- Këshilli Rinor Kosovar në bashkëpunim me Kuvendin e të Rinjëve të Ferizajt dhe Komunën e Ferizajt do të mbajë panelin e diskutimit dhe aktivitetin ‘Dita e Vullnetarizmit’ me qëllim të promovimit dhe diskutimit rreth punës vullnetare, nevojave të vullnetarëve dhe aktiviteti i tyre në këtë komunë. (Salla e Kuvendit Komunal në Ferizaj, ora 14:00)

- Lëvizja FOL në kuadër të  “Javës Kundër Korrupsion 2022” mban konferencë për media me ç’rast do të bëjë publikimin e raportit "Masat disiplinore kundër nëpunësit civil për korrupsion dhe shkelje etike". (Hotel Sirius, ora 15:15)

- Kryeministri i Kosovës, Albin Kurti pret në takim Ndihmës Administratoren e USAID-it, Erin E. McKee. (Zyra e Kryeministrit të Republikës së Kosovës, ora 15:45)