05 Dhjetor 2022

BE godet ushtrinë private të Putin, sanksione ndaj famëkeqëve “Wagner”

Bruksel, 13 dhjetor - Bashkimi Europian (BE) miratoi një sërë masash kufizuese kundër Grupit Wagner, një ent ushtarak privat i pa inkorporuar me ushtrinë, apo ndonjë institucion në Rusi. Masat synojnë vetë grupin Ëagner, tetë individë drejtues të tij dhe tre subjekte të lidhura me të.

Sipas BE, Grupi Wagner ka rekrutuar, trajnuar dhe dërguar operativë ushtarakë privatë në zonat e konfliktit anembanë botës për të nxitur dhunën, për të plaçkitur burimet natyrore dhe për të frikësuar civilët në kundërshtim me ligjin ndërkombëtar, duke përfshirë ligjet për të drejtat e njeriut.

Individët e listuar nga BE-ja akuzohen se janë të përfshirë në abuzime serioze të të drejtave të njeriut, duke përfshirë torturat dhe ekzekutimet dhe vrasjet jashtëgjyqësore, të përmbledhura ose arbitrare, ose në aktivitete destabilizuese në disa nga vendet ku veprojnë, duke përfshirë Libinë, Sirinë, Ukrainën dhe Republika e Afrikës Qendrore.

Grupi po përhap gjithashtu ndikimin e tij keqdashës gjetkë, veçanërisht në rajonin e Sahelit. Për këto arsye grupi, thotë BE, përbën një kërcënim në vendet ku ata janë të pranishëm, për rajonin më të gjerë dhe për Bashkimin Europian.

Qëllimi i vendimit është të kufizojë aktivitetet e Grupit Wagner. Në deklaratën e Brukselit thuhet se “ai sinjalizon vendosmërinë e fortë të BE-së për të mbrojtur interesat dhe vlerat e saj në fqinjësinë e saj dhe më gjerë dhe për të ndërmarrë veprime të prekshme kundër atyre që kërcënojnë paqen dhe sigurinë ndërkombëtare dhe shkelin ligjin ndërkombëtar”.

Masat kufizuese të vendosura u ranë dakord nën katër regjime të ndryshme sanksionesh: Regjimi Global i Sanksioneve të të Drejtave të Njeriut të BE-së dhe regjimet e sanksioneve në lidhje me situatën në Libi dhe Siri, si dhe për veprimet që cenojnë integritetin territorial të Ukrainës.

Individëve dhe subjekteve të listuara mund t’u bllokohen pasuritë që zotërojnë në vendet e BE-së. Përveç kësaj, individët e listuar shpallen non grata nga BE, ndërsa shtetasve dhe kompanive të regjistruara në BE do t'u ndalohet të vënë në dispozicion fondet, drejtpërdrejt ose tërthorazi për ta.

 

Kalendari

Ngjarjet e datës 5 dhjetor 2022 - Kryetari i Kryeqytetit, Përparim Rama, do të nënshkruajë marrëveshjen me partneritet publiko privat për ndërtimin e tri shkollave të reja dhe ofrimin e shërbimeve të mirëmbajtjes dhe operimit në Komunën e Prishtinës. (Ndërtesa e Vjetër e Komunës së Prishtinës, ora 9:00)

- Instituti i Kosovës për Drejtësi, Grupi për Studime Juridike dhe Politike, Lëvizja Fol, Iniciativa për Progres, Çohu dhe Colombus organizojnë tryezë të rrumbullakët, ku do të diskutohet lidhur me “Reforma në Drejtësi”. (Hotel Sirius, ora 10:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022 interviston Njazi Thaçin, Luigj Imerin, Perparim Kabashin, Nagip Krasniqin, Faruk Hajrizin, Rrezarta Pllanën, Hysen Fazliun, Musa Misinin, Skender Hazirin, Ali Hamitin, Izet Rushitin dhe Krenar Bujupin. (Ndërtesa e Kuvendit, salla N204, ora 11:00)

- Presidentja e Republikës së Kosovës, Vjosa Osmani Sadriu pret në takim Ndihmës Administratoren e USAID-it, Erin E. McKee. (Kabineti i Presidentes,ora 12:00)

- Ministria e Kulturës, Rinisë dhe Sportit në bashkëpunim me UNICEF-it dhe UN Volunteers shënojnë Ditën Ndërkombëtare të Vullnetarizmit. (Kino Armata, sheshi “Zahir Pajaziti”, ora 13:00)

- Instituti i Kosovës për Drejtësi organizon tryezë të rrumbullakët, ku do të prezantohet raporti me titull “Parashkrimi i Korrupsionit”, i cili është rezultat i monitorimit sistematik që IKD i bënë sistemit Gjyqësor dhe atij Prokurorial të Republikës së Kosovës. (Hotel Sirius, ora 13:00)

- Këshilli Rinor Kosovar në bashkëpunim me Kuvendin e të Rinjëve të Ferizajt dhe Komunën e Ferizajt do të mbajë panelin e diskutimit dhe aktivitetin ‘Dita e Vullnetarizmit’ me qëllim të promovimit dhe diskutimit rreth punës vullnetare, nevojave të vullnetarëve dhe aktiviteti i tyre në këtë komunë. (Salla e Kuvendit Komunal në Ferizaj, ora 14:00)

- Lëvizja FOL në kuadër të  “Javës Kundër Korrupsion 2022” mban konferencë për media me ç’rast do të bëjë publikimin e raportit "Masat disiplinore kundër nëpunësit civil për korrupsion dhe shkelje etike". (Hotel Sirius, ora 15:15)

- Kryeministri i Kosovës, Albin Kurti pret në takim Ndihmës Administratoren e USAID-it, Erin E. McKee. (Zyra e Kryeministrit të Republikës së Kosovës, ora 15:45)