18 Nëntor 2019

Turistët e huaj pushojnë në bregdetin shqiptar

Tiranë27 korrik -  Në këto ditë të pikut të sezonit veror në të gjithë vijën bregdetare në Shqipëri mbërrijnë për pushime shumë turistë të huaj.

Atmosferës së ndezur të një ceremonie dasme që zhvillohet në një lokal buzë detit në Sarandë i janë bashkuar dhe dy turiste norvegjeze.

Randi dhe Doris ndjekin me vëmendje çdo rit të një dasme shqiptare, por më shumë ato janë të interesuara për vallet, për mënyrën se si kërcehen ato nga dasmorët.

Ardhja e tyre në Sarandë veç anës turistike ka dhe elementë kulturorë. Doris Forbrego ka ndjekur një kurs vallzimi me pjesë shqiptare dhe mësimet i drejtonte një koreograf sarandiot. Të njëjtën gjë kanë bërë dhe 10 pjesëtarët e tjerë të grupit turistik nga Norvegjia.

Doris Forbrego e njeh Ballkanin: "Kemi qënë në Greqi, në Rumani, në Bullgari etj. Këtu jemi për herë të parë. Kishim shumë vështirësi për të mësuar vallet shqiptare. Pas një jave nuk jemi perfekt, por stilin e kemi kapur. Kemi punuar çdo ditë nga 3 orë me instruktorin. Do ta plotësojmë hartën ballkanike duke shkuar edhe në vende të tjera. Është shumë këndshëm, shohim të përbashkëtat e ndryshimet nga një vend në tjetrin. Këtu në Sarandë, në javën e dytë të qëndrimit gjërat do të jenë më mirë sigurisht."



Frika para ardhjes në një vend...si Shqipëria

Randi Wunkeb para vizitës në Shqipëri kishte lexuar në internet guidat turistike. Për të marrë informacion kishte kontaktuar edhe me shqiptarë që jetojnë e punojnë në Norvegji. Randi nuk e fsheh edhe një lloj ndjesie fillestare pasigurie se do të vinte me grupin në një shtet të pasigurtë dhe të prapambetur.

"Mendonim se në këtë vend do të kishte më shumë njerëz të varfër. Por nga qëndrimi këtu kemi një pamje reale të kundërt. Qyteti funksionon normalisht me një atmosferë të gjallë turistike si dhe në vende të tjera europiane. Njerëzit janë mikpritës dhe me humor. Kemi parë resorte dhe bukuri natyrore që na kanë befasuar. Syri i Kaltër, qyteti antik i Butrintit, kala e site arkeologjike që flasin për një histori të lashtë. Rruga përgjatë bregdetit Jonian ishte mahnitëse".

Randi thotë se i vjen keq që vlerat turistike dhe historike të Shqipërisë njihen pak në vendin e saj. Për këtë ajo thotë që autoritetet shqiptare duhet të bëjnë më shumë promocion në mediat të ndryshme ndërkombëtare dhe nëpërmjet hapësirave të internetit.

Saranda - atraktive për turistë vendas e të huaj

Saranda qe gjendet 285 km larg Tiranës, mbetet një ndër destinacionet më të preferuara për vizitorët shqiptarë dhe të huaj. Nga shifrat zyrtare të bashkisë së qytetit qysh nga 1 janari dhe deri më 25 korrik 2010 këtu kanë ardhur rreth 200 mijë turistë vendas dhe të huaj, ose 10 përqind më shumë se një vit më parë.

Nga ky total vizitorësh më shumë se 90 mijë janë shtetas të huaj, të cilët mbërrijnë nga "porta" të ndryshme: nga pikat tokësore të kalimit kufitar me Greqinë, nga deti nëpermjet krocierave dhe trageteve të linjës, nga segmentet e brendshme rrugore të vendit etj. Turistët e huaj janë me qëndrim disa ditor, ose që mbërrijnë dhe largohen brenda ditës, siç janë ata të kroçierave.

Martini nga Polonia është një fans i bregdetit Jonian. Ai është zhytës profesionist dhe për të katërtën herë po kalon të gjithë sezonin veror duke shijuar botën nënujore tw detit Jon.

Në Sarandë Martini ka ardhur edhe mikun e tij. Antonit i bie në sy që gjatë ditës automjetet nuk respektojnë fare rregullat e qarkullimit. Shoferët mbajnë zërin e lartë të radiove dhe parkojnë ku të mundin, duke penguar lëvizjen e lirshme të mjeteve dhe qytetarëve. Ai do të dëshironte që patrullat e policisë të ishin më prezente në qytet.

Ndërsa Luixhi nga Italia që përjeton qëndrimin e parë në bregdetin shqiptar është i kënaqur. "Kam qënë në Dhërmi dhe në Vlorë. Shumë mirë mu duk dhe Tirana e Durrësi. Shqipërisë i duhen rrugë më të gjëra dhe kualitative për të përballuar fluksin e madh të turistëve që mbërrijnë nga shumë vende".

Zbavitje por edhe vërejtje. Megjithatë një gjë është e sigurtë. Bregdeti shqiptar ga njëri sezon në tjetrin po tërheq gjithnjë e më shumë vizitorë të huaj nga vende të ndryshme të globit.

Kalendari

Ngjarjet e datës 18 nëntor 2019

- Oda Ekonomike e Kosovës do të mbajë konferencë për media në të cilën do të prezentojë hulumtimin rreth opinionit të bizneseve për marrëveshjen Kosovë-Serbi. (Objekti i Odës Ekonomike të Kosovës, ora 9:00)

- Organizata për Demokraci, Anti-korrupsion dhe Dinjitet, ÇOHU! me përkrahjen e Ambasadës së Mbretërisë së Holandës përmes Programit Matra organizon tryezë në të cilën do të publikohet raporti me titull Qasja në Drejtësi. (Hotel Sirius, ora 10:00)

- Qendra e Inovacionit të Kosovës dhe Oda Ekonomike Amerikane në Kosovë organizojnë ceremoninë e hapjes së Javës Globale të Ndërmarrësisë 2019 në Kosovë. (Menza "Ramiz Sadiku" në Prishtinë, ora 10:00)

- Grupi Tematik për të Drejtat e Fëmijëve në Shëndetësi në kuadër të Koalicionit te OJQ-ve për Mbrojtjen e Fëmijëve organizon konferencën për media në te cilën do të prezantojë një dokumet me të dhëna dhe rekomandime për mbrojtjen e ambientit në Kosovë. (Qendra e Resurseve për OSHC, Forumi për Iniciativa Qytetare në Lagjen Pejton, ora 10:00) 

- Instituti i Kosovës për Drejtësi me përkrahje të Departamentit të Shtetit Amerikan - Byrosë së Narkotikëve Ndërkombëtar dhe Çështjeve të Zbatimit të Ligjit dhe NED-it do të organizojë tryezë me titull “Pandëshkueshmëria e korrupsionit”. (Hotel Sirius, ora 10:00)

- Instituti Kërkimor për Çështje Evropiane dhe të Zhvillimit organizon prezantimin e studimit per Çështjen e Kompleksit të Trepçës dhe Çështjen e Reparacioneve për Krimet e Luftës të kryera në Kosovë në Kontekstin e ‘Finales së Madhe’ eventuale ndërmjet Kosovës dhe Serbisë. (Hotel Swiss Diamond, ora 10:00)

- Komuna e Prizrenit në bashkëpunim me PPSE Swisscontact dhe SHB Sharri përuron shtegun turistik të ri Via Ferrata "Panorama". (Gryka e Lumbardhit, 4.5 km nga qendra e qytetit, ora 11:00 - transporti i organizuar nga Komuna e Prizrenit, nisja nga Shtëpia e Bardhë, ora 10:30)

- Në kuadër të aktivitet kulturor kushtuar "Ditet e Alfabetit", promovohet botimi 'Levizja Protestante te shqiptaret 1818-1908" te autorit prof. dr. David Hosaflook. (Biblioteka Kombetare "Pjeter Bogdani", ora 10:30)

- Muzeu Kombëtar i Kosovës hap ekspozitën “Bienalen e Akuarelit Edicioni i 2-të” e cila sjellë vepra arti të artisëve nga 70 vende të botës me rreth 380 piktura. (Muzeu Kombëtar, ora 19:00)

 

- Në kuadër të projektit ' Tell Me More' të perkrahur nga MKRS dhe DKRS dhe të implementuar nga Kuvendi i të Rinjve të Prizrenit do të realizohet shfaqja teatrale në Shtepinë e Kulturës " Xhemajli Berisha ". (Shtëpia e Kulturës në Prizren, ora 20:00)