24 Janar 2020

Për të eksportuar në BE kërkohet rritje e cilësisë

Kaçanik, 14 qershor  - Për të eksportuar produktet kosovare në tregun evropian, duhet cilësi më e lartë dhe plotësim i kërkesave dhe standardeve të BE-së.

Kjo u tha në diskutimin që Zyra e BE-së në Kosovë, në bashkëpunim me Ministrinë e Integrimeve, e organizuan në kuadër të diskutimeve për të njoftuar qytetarët për MSA-në, në komunën e Kaçanikut me temën “Prodhimi vendor dhe tregu i BE-së”.

Aty u theksuan edhe nevojat dhe kërkesat e prodhuesve vendor të cilët kërkuan rregullim të tregut dhe më shumë mbështetje.

Duke folur për rëndësinë e bujqësisë në komunën që ai drejton, kryetari i komunës së Kaçanikut, Besim Ilazi tha se përmes këtyre projekteve janë fermerët ata që përfitojnë.

“Fermerët nuk duhet të orientohen vetëm drejt subvencioneve, por të kërkojnë edhe këshilla e trajnime se të arrihet cilësi dhe rendiment më i lartë. Këto këshilla e trajnime ofrohen falas nga Bashkimi Evropian, nga Banka Botërore, nga Ministria e Bujqësisë, Agjencia e Ushqimit e Veterinës, etj.”, ka thënë Ilazi.

Ndërkaq, kryetari i komunës së Hanit të Elezit, Rufki Suma, u shpreh se problemi kryesor është tek tregu, pasi sipas tij pikat grumbulluese janë duke bërë manipulime dhe nga ana e institucioneve qendrore nuk ka masa që i kushtëzojnë ato.

“Ajo që është shqetësuese për ata që kanë mbjellë mjedrat, është dashur t’i asgjësojnë ato pikërisht për shkak të tregut; këto pikat grumbulluese thjeshtë po tallen me qytetarët. Nuk kemi ndonjë masë prej nivelit shtetëror që i kushtëzon pak dhe ata që merren me blerje dhe shitje”, tha Suma.

Menaxherja e programeve në sektorin e bujqësisë pranë Zyrës së BE-së në Kosovë, Daniela Topirceanu, theksoi rëndësinë e MSA-së dhe kërkesat që i ka BE-ja për produktet e Kosovës për t’u bërë konkurrues në tregun e BE-së.

“Tregu evropian ka shumë kërkesa të cilat ceken edhe në legjislacionin e BE-së dhe Kosova që të mund të eksportojë në tregun e saj, duhet t’i ketë parasysh të gjitha këto kërkesa që i ka tregu evropian. Shumica e audiencës këtu janë prodhues. Ajo çka duhet të mbani në mend është që të gjitha produktet që eksportohen në Bashkimin Evropian, duhet të plotësojnë kërkesa të caktuara dhe të kalojnë kontrollimet e caktuara”, tha ajo.

Për mbështetjen e institucioneve, foli shefi i divizionit për përkrahje direkte dhe politika tregtare në kuadër të Ministrisë së Bujqësisë, Habil Zeqiri. Ai shpjegoi disa nga masat që ka ndërmarrë ministria për t’i subvencionuar fermerët dhe për të përmirësuar këtë sektor.

“Ne jemi në fazën e hartimit të një strategjie për avancimin e ndërmarrjeve agro-ekonomike. Kjo lidhet me produktet që kanë nevojë për përpunim shumë të shpejtë, mjedra, dredhëza, vishnje. Jemi në hartimin e draftit të parë”, tha ai.

 

Kalendari

Ngjarjet e datës 24 janar 2020

- Shefja e Misionit të Vëzhgimit të Zgjedhjeve nga BE, Viola von Cramon-Taubadel organizon konferencë për media lidhur me prezantimin e Raportit Final dhe Rekomandimeve te zgjedhjeve te parakohshme legjislative në Kosovë. (Hotel Swiss Diamond, ora 9:30)

- Akademia e Kosovës për Siguri Publike organizon konferencën e 7-të ndërkombëtare “Sfidat e Mobilitetit të Transportit dhe Siguria Publike”. (Qendra Mësimore “Steve Bennett” në AKSP, Vushtrri, ora 10:00) 

- Kolegji i Shkencave të Aplikuara Teknike Tempulli në bashkëpunim me Fakultetin e Sigurisë Publike dhe Akademinë e Kosovës për Siguri Publike, organizojnë Konferencën e 7-të Ndërkombëtare "Sfidat e mobilitetit në transport dhe siguria publike". (Akademia e Kosovës për siguri publike në Vushtrri, ora 10:00)

- Zëvendës ndihmës Sekretari i Shtetit në Byronë e Narkotikëve Ndërkombëtarë dhe Çështjeve të Zbatimit të Ligjit Jorgan K. Andrews vizton Akademinë e Kosovës për Siguri Publike  ku do të pritet nga Drejtori i Përgjithshëm i Akademisë Ismail Smakiqi si dhe menagjmenti i lartë. (Objekti i Akademisë në Vushtrri, ora 10:45)

- Kryetari i Degës së PDK-së në Prizren, Shaqir Totaj mban konferencën e radhës me gazetarë. (Zyret e Degës në Prizren, ora 11:00)

- Nën patronatin e kryetarit të komunës, Agim Bahtiri do të mbahet manifestimi sportiv i shpalljes së “Sportistit të vitit 2019”. (Restaurant “Villa Lux” në Mitrovicë, ora 17:00)