22 Shtator 2021

Nafta bie në tregjet globale, po në Kosovë shënon rritje

Prishtinë, 21 korrik - Vendet anëtare të OPEC ranë dakord që të rrisin sasinë e prodhimit të naftës në mënyrë që të ulet çmimi i saj në tregjet globale, si një mjet për të ndihmuar ekonomitë në përpjekjet për t’u rimëkëmbur pas krizës së pandemisë.

Njoftimi i organizatës që mbledh në gjirin e saj prodhueset më të mëdha të naftës në botë u reflektua menjëherë në tregjet ndërkombëtare, ku një fuçi ra në 70 dollarë ditën e martë.

Çmimi i naftës së papërpunuar në SHBA ra gati 8 për qind dhe u mbyll në rreth 66 dollarë për fuçi të hënën, duke shënuar rënien më të madhe njëditore që nga shtatori i vitit 2020. Edhe nafta e papërpunuar Brend ra me 7 për qind duke zbritur në 69 dollarë për fuçi.

OPEC ra dakord të rrisë me 400 mijë fuçi prodhimin ditor duke filluar prej muajit gusht. Marrëveshja u kundërshtua fillimisht nga Emiratet e Bashkuara Arabe, që pas bisedimeve u tërhoqën nga ky qëndrim.

Me heqjen e kufizimeve dhe rinisjen e aktiviteteve në pranverë, çmimi i naftës filloi të rritej gradualisht.  

Çuditërisht, luhatjet e bursave ndërkombëtare nuk ndjehen në tregun e Kosovës ku litri i naftës shkoi deri në çmimin rekord prej 1 euro e 15 cent.
 

Kalendari

Ngjarjet e datës 22 Shtator 2021

- Ministri i Shëndetësisë, Arben Vitia, raporton në Komisionin për Shëndetësi dhe Mirëqenie Sociale për menaxhimin e situatës me Covid-19. (Ndërtesa e Kuvendit, salla N302, ora 10:00)

- Ministria e Mjedisit, Planifikimit Hapësinor dhe Infrastrukturës në bashkë organizim me Komunën e Prishtinës, Policinë e Kosovës, OJQ-të shënojnë “Ditën Ndërkombëtare pa Makina”. (Para ndërtesës së Qeverisë, ora 10:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton formon grupin punues për Projektligjin për Gjykatën Komerciale, shqyrton raportet e Komisioneve të përhershme  për Projektligjin për ndryshimin dhe plotësimin e Ligjit për përgjegjësinë disiplinore të gjyqtarëve dhe prokurorëve, etj,. (Ndërtesa e Kuvendit, salla N204, ora 10:00)

- Kryetari i Kuvendit të Republikës së Kosovës, Glauk Konjufca, pret në takim kryetaren e Kuvendit të Shqipërisë, Lindita Nikolla. (Kabineti i kryetarit, ora 10:00)

- Mbahet takimi i 203-të i Këshillit Prokurorial të Kosovës. (Përmes formës online, ora 10:00)

- Komisioni për Mbikëqyrjen e Financave Publike shqyrton rekomandimet e dala nga raporti i auditimit të performancës “Parandalimi dhe reagimi i situatave emergjente: Vërshimet”, etj. (Ndërtesa e Kuvendit, salla N10, ora 12:00)

- Komisioni për Buxhet, Punë dhe Transfere shqyrton Raportin vjetor financiar të Agjencisë Kosovare të Privatizimit, raportin vjetor Financiar i Agjencisë Kosovare për Krahasim dhe Verifikim të Pronëssi dhe Raportin vjetor Financiar i Institucionit të Avokatit të Popullit. (Ndërtesa e Kuvendit, salla C203, ora 13:00)

- Komisioni për Mbikëqyrjen e Agjencisë së Kosovës për Inteligjencë bën rishikimin e Planit të punës së Komisionit për sesionin vjeshtor. (Ndërtesa e Kuvendit, salla N302, ora 13:00)

- Instituti Kosovar për Kërkim dhe Zhvillim i Politikave dhe Qendra Kosovare për Studime të Sigurisë në bashkëpunim me Programi i Universitetit Columbia për Ndërtimin e Paqes dhe të Drejtat e Njeriut organizojnë një konferencë me temë 'Sfidat e Kosovës që vijnë Rusia dhe Kina' me Holden Triplett Agjenti Special i FBI -së dhe Drejtor për Kundërzbulimin në Këshillin e Sigurisë Kombëtare, ret. (https://zoom.us/j/98242813908?pwd=cFBiZGdMV3pRTTV3RDJBbTE5UEtVQT09, ora 16:00)