27 Shtator 2022

Çmimi i naftës bie në 97 dollarë për fuçi

New York, 15 gusht - Çmimi i naftës shënoi rënie për shkak të shenjave të uljes së kërkesës së konsumatorit të dytë më të madh në botë të naftës, Kinës, ndërsa kompania saudite e naftës Aramco tha se mund të rrisë prodhimin për shkak të pritjeve më të larta të kërkesës.

Standardi ndërkombëtar i naftës së papërpunuar Brent u tregtua me 97,14 dollarë për fuçi sot në mëngjes, me një rënie prej 1,02 për qind nga çmimi i mbylljes me 98,15 dollarë për fuçi.

Standardi amerikan West Texas Intermediate (WTI) ishte në 91,19 dollarë për fuçi në të njëjtën kohë me një rënie prej 0,97 për qind, kurse çmimi i mbylljes ishte 92,09 dollarë për fuçi.

Të dhënat e Byrosë Kombëtare të Statistikave (NBS) treguan se qarkullimi ditor i naftës së papërpunuar në korrik të ekonomisë së dytë më të madhe në botë, Kinës, ra në nivelin më të ulët që nga marsi 2020.

Duke sinjalizuar një dobësim të kërkesës, qarkullimi i naftës së papërpunuar të Kinës ka rënë me 8,8 për qind në 53,21 milionë tonë, ose 12,53 milion fuçi në ditë në krahasim me të njëjtin muaj në 2021.

Kina gjithashtu regjistroi rritje më të ngadaltë nga sa pritej të prodhimit industrial dhe shitjeve me pakicë, duke sugjeruar se politika zero-COVID po dobëson kërkesën e konsumatorëve.

Prodhimi industrial i Kinës tregoi rritje në bazë vjetore prej 3,8 për qind në korrik, që ishte më i dobët nga vlerësimi i tregut prej 4,6 për qind, sipas Byrosë Kombëtare të Statistikave.

Megjithatë, kompania shtetërore saudite e naftës Aramco njoftoi të dielën se pret që kërkesa për naftë të vazhdojë të rritet për pjesën tjetër të dekadës, pavarësisht presioneve ekonomike në rënie mbi parashikimet afatshkurtra globale.

Drejtori i Përgjithshëm i kompanisë Amin Nasser tha se Aramco mund të rrisë prodhimin në 12 milionë fuçi në ditë në çdo moment nëse "paraqitet nevoja ose thirrje nga qeveria ose nga ministria e energjisë për të rritur prodhimin tonë".

Pas raporteve se Irani ka rënë dakord për një marrëveshje mbi programin bërthamor të ndërmjetësuar nga Evropa për sigurimin e garancive përkatëse, shqetësimet për furnizim janë zbutur.

Kalendari

Ngjarjet e datës 28 shtator 2022

- Kryetari i Kuvendit të Republikës së Kosovës, Glauk Konjufca, pret në takim udhëheqësin e Njësisë në Drejtorinë e Përgjithshme të Komisionit Evropian për Politikat Evropiane të Fqinjësisë dhe Negociatat e Zgjerimit, Vassilis Maragos. (Kabineti i kryetarit, ora 9:50 - Mediat mund të marrin pamje në fillim të takimit)

- Koalicioni 27, grupi i organizatave të shoqërisë civile që punojnë në fushën e mjedisit bën publikimin e raportit “Shkatërrimi ekologjik - Koha të veprojmë” i cili paraqet gjendjen e mjedisit në Kosovë, në raport me kërkesat e Bashkimit Evropian në kapitullin 27 “Mjedisi dhe ndryshimet klimatike”. (Hotel Swiss Diamond, ora 10:00)

- Komisioni për Buxhet, Punë dhe Transfere shqyrton raportin e shpenzimeve të Kuvendit, të Bankës Qendrore, Fondit të Kursimeve Pensionale, etj. (Ndërtesa e Kuvendit, salla C203, ora 10:00)

- OJQ EC Ma Ndryshe mban konferencën “Zhvillimi i turizmit rural dhe trashëgimisë shpirtërore - Një e ardhme e domosdoshme?”. (Kino Lumbardhi në Prizren, ora 10:00)

-  Komisioni për Shëndetësi dhe Mirëqenie Sociale takohet me kryesuesen e Bordit të Shërbimit Spitalor, Klinik, Universitar të Kosovës znj.Aida Rexhepi dhe me u.d. Drejtoreshën e Shërbimit Spitalor, Klinik, Universitar të Kosovës znj. Pranvera Zejnullahu- Raçi. (Ndërtesa e Kuvendit, salla N302, ora 10:00)

- Shehu Academy në bashkëpunim me projektin e USAID organizon ngjarjen “Ndërlidhja e ofertës me kërkesën në tregun e punës” me moton “Aftësim, Punësim, Zhvillim”. (Hotel Emerald, ora 10:00)

- Aleanca e të Rinjve të Kosovës zhvillon një aksion simbolik para Ministrisë së Arsimit, në mbështetje të kërkesave minimale të mësimdhënësve. (Para Ministrisë së Arsimit, ora 10:00)

- Dhoma e Tregtisë dhe Industrisë Kosovë organizon konferencën rajonale “Promovimi i Investimeve Rajonale”. (Hotel International Prishtina në Veternik, ora 11:00)

 - Kryetari i Kuvendit të Republikës së Kosovës, Glauk Konjufca, pret në takim Ambasadorin e Luksemburgut, Eric Dietz. (Kabineti i kryetarit, ora 11:30 - Mediat mund të marrin pamje në fillim të takimit)​

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton në parim Projektligjin për Institutin e krimeve të kyera gjatë luftës në Kosovë, dhe raportet e komisioneve kryesore për Projektligjin për Kompensimin e Viktimave të Krimit. (Ndërtesa e Kuvendit, salla N506, ora 13:00)

- Qendra e Lëvizjes Vetëvendosje në Kastriot mban konferencë për media. (Pallati i Drejtësisë, ora 13:00)

- Komisioni Ad-Hoc për Reformën Zgjedhore në Kosovë shqyrton Planin e punës së Komisionit, kërkesen për buxhetin e Komisionit dhe shqyrton termat e referencës për Grupin Këshillëdhënës. (Ndërtesa e Kuvendit, salla N302, ora 14:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022, në nivelin legjislativ, ekzekutiv, rregullator dhe në ndërmarrje publike bën zgjedhjen e eksperteve. (Ndërtesa e Kuvendit, salla N204, ora 14:00)