Beograd, 29 shtator - Telekomi i Serbisë i kërkon operatorëve të interesuar për blerjen e PTK-së që të tërheqin ofertat e paraqitura, me arsyetimin se sipas Telekom Serbia, bëhet fjalë për tender jo legjitim.

Agjencia “FoNet” raporton se Telekomi i Serbisë i ka dërguar nga një letër operatorëve të interesuar për PTK-në, ku thuhet se “ nëse kryhet çfarëdo lloj transaksioni të pasurisë së rrëmbyer të Telekomit të Serbisë në Kosovë, kompania do të marrë të gjitha masat juridike te gjykatat e selive të ofertuesve si dhe te drejtësia evropiane”.

\"Do të marrim masa juridike ndaj të gjitha autoriteteve përgjegjëse, të cilat nuk e ndalojnë një posedim të këtillë ilegal të pasurisë së uzurpuar të korporatës së Telekomit të Serbisë si dhe ndaj blerësve eventual”, thuhet në letër.

Telekomi i Serbisë në vazhdim thekson se Republika e Serbisë është anëtare e Unionit Ndërkombëtar të Telekomunikacionit dhe jo Kosova.