05 Dhjetor 2022

PTK modernizon shërbimet postare

Prishtinë, 6 korrik - Menaxhmenti aktual i PTK-së ka ndërmarrë hapa konkret mbi modernizimin e Postës së Kosovës dhe rritjes së efikasitetit në shpërndarjen e dërgesave postare brenda territorit të Kosovës.

Investimet aktuale dhe ato që priten në të ardhmen, tregojnë përkushtimin dhe vizionin e qartë të menaxhmentit, që ka vënë si prioritet për ta zhvilluar më tej Njësinë e saj të Biznesit, Postën e Kosovës.

Kryeshefi Ekzekutiv i PTK-së, Dr. Shyqyri Haxha ka bërë të ditur se deri më tash është investuar 300 mijë euro në blerjen e 16 furgonëve të kapaciteteve të ndryshme që do të shpejtojnë edhe më shumë shpërndarjen e dërgesave anëmbanë vendit.

“Meqë Qeveria ka vendosur që ta privatizojë Telekomin dhe Vala-n, Posta si njësi e veçantë do t’i mbetet shtetit, andaj jemi duke bërë çmos që ta ngrisim standardin e saj, në mënyrë që në të ardhmen kjo njësi, apo kjo kompani e shtetit të jetë më profitabile”, ka deklaruar Dr. Haxha duke shtuar se synim parësor mbetet që brenda një kohe shumë të shkurtër Posta e Kosovës të jetë kompani më fitimprurëse.

Sipas tij, PTK ka investuar duke siguruar motoçikleta me helmeta, gjithsejt 200 sosh me një kosto rreth 300 mijë euro, ndërsa, siç dihet, Posta ka në dispozicion edhe një numër të biçikletave, të dhuruar si donacion nga Posta Shqiptare.

“I gjithë ky investim dhe këto automjete moderne që tashmë i posedojmë, do të ndikojnë në shpejtësinë dhe sigurinë e shpërndarjes së shërbimeve postare”, ka theksuar Dr. Shyqyri Haxha me rastin e dorëzimit të çelsave për automjetet dhe motoçikletave të reja për punëtorët e Postës së Kosovës.

Janë edhe dy projekte shumë të rëndësishme që kanë të bëjnë me modernizimin e Postës së Kosovës, siç janë projekti i automatizimit, i cili do të kushtoj 1.4 milionë euro, ku me këtë projekt do të ketë avancim të shërbimeve të reja postare, sepse të gjitha sportelet në tërë territorin e Kosovës do të modernizohen.

Projekti tjetër i po kësaj rëndësi është padyshim ai i Postës Hibride, për të cilin projekt, shpresohet në mbështetjen e Qeverisë së Republikës së Kosovës i cili parashihet të kushtoj rreth 2.4 milionë euro. Me këtë projekt do të zhvillohet edhe më shumë shërbimi i printimit, përpunimit, zarfimit dhe shpërndarjes së dërgesave postare me një kapacitet jashtëzakonisht të shpejtë dhe të sigurtë, në veçanti për konsumatorët e mëdhenj.

Me këto dy projekte do të ngritet standardi i Postës, shpërndarja e dërgesave, pakove me një shpejtësi shumë të madhe, pastaj këmbimi i dërgesave nëpër kufij, gjë që do ta shndërronte Postën e Kosovës në një kompani të suksesshme fitimi.

Kalendari

Ngjarjet e datës 5 dhjetor 2022 - Kryetari i Kryeqytetit, Përparim Rama, do të nënshkruajë marrëveshjen me partneritet publiko privat për ndërtimin e tri shkollave të reja dhe ofrimin e shërbimeve të mirëmbajtjes dhe operimit në Komunën e Prishtinës. (Ndërtesa e Vjetër e Komunës së Prishtinës, ora 9:00)

- Instituti i Kosovës për Drejtësi, Grupi për Studime Juridike dhe Politike, Lëvizja Fol, Iniciativa për Progres, Çohu dhe Colombus organizojnë tryezë të rrumbullakët, ku do të diskutohet lidhur me “Reforma në Drejtësi”. (Hotel Sirius, ora 10:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022 interviston Njazi Thaçin, Luigj Imerin, Perparim Kabashin, Nagip Krasniqin, Faruk Hajrizin, Rrezarta Pllanën, Hysen Fazliun, Musa Misinin, Skender Hazirin, Ali Hamitin, Izet Rushitin dhe Krenar Bujupin. (Ndërtesa e Kuvendit, salla N204, ora 11:00)

- Presidentja e Republikës së Kosovës, Vjosa Osmani Sadriu pret në takim Ndihmës Administratoren e USAID-it, Erin E. McKee. (Kabineti i Presidentes,ora 12:00)

- Ministria e Kulturës, Rinisë dhe Sportit në bashkëpunim me UNICEF-it dhe UN Volunteers shënojnë Ditën Ndërkombëtare të Vullnetarizmit. (Kino Armata, sheshi “Zahir Pajaziti”, ora 13:00)

- Instituti i Kosovës për Drejtësi organizon tryezë të rrumbullakët, ku do të prezantohet raporti me titull “Parashkrimi i Korrupsionit”, i cili është rezultat i monitorimit sistematik që IKD i bënë sistemit Gjyqësor dhe atij Prokurorial të Republikës së Kosovës. (Hotel Sirius, ora 13:00)

- Këshilli Rinor Kosovar në bashkëpunim me Kuvendin e të Rinjëve të Ferizajt dhe Komunën e Ferizajt do të mbajë panelin e diskutimit dhe aktivitetin ‘Dita e Vullnetarizmit’ me qëllim të promovimit dhe diskutimit rreth punës vullnetare, nevojave të vullnetarëve dhe aktiviteti i tyre në këtë komunë. (Salla e Kuvendit Komunal në Ferizaj, ora 14:00)

- Lëvizja FOL në kuadër të  “Javës Kundër Korrupsion 2022” mban konferencë për media me ç’rast do të bëjë publikimin e raportit "Masat disiplinore kundër nëpunësit civil për korrupsion dhe shkelje etike". (Hotel Sirius, ora 15:15)

- Kryeministri i Kosovës, Albin Kurti pret në takim Ndihmës Administratoren e USAID-it, Erin E. McKee. (Zyra e Kryeministrit të Republikës së Kosovës, ora 15:45)