15 Nëntor 2019

Prokuroria po e heton Ministrinë e Infrastrukturës për 53-milionë të Bechtelit

Prishtinë, 28 tetor - Prokuroria po e heton Ministrinë e Infrastrukturës të udhëhequr nga Pal Lekaj për shpërfilljen e një raporti që ka hedhur poshtë pretendimet e konserciumit “Bechtel-Enka” mbi të cilat ka kërkuar pagesën 53-milionëshe për vonesa.

Kompania “HILL”, e cila është kontraktuar nga vetë Qeveria e Kosovës për mbikëqyrjen e ndërtimit të autostradës, ka lëshuar një opinion në vitin 2017 përmes të cilit ka konstatuar se kërkesa e “Bechtel-Enkas” për 53 milionë euro është e paarsyetuar, shkruan sot “Koha Ditore”. Sipas këtij opinioni, ka pasur bazë që të kërkohej nga Qeveria e Kosovës t’ia paguante 14 milionë euro.

Kompania “HILL” është e kontraktuar nga Qeveria e Kosovës për mbikëqyrjen e ndërtimit të autostradës Prishtinë- Shkup “Arbën Xhaferi” . Siç ka mësuar gazeta, kjo kompani për mbikëqyrjen e gjithë projektit, që kap vlerën e rreth 600 milionë eurove, paguhet rreth 7 milionë euro.

Kërkesën për opinion nga kjo kompani e ka bërë Ministria e Infrastrukturës. Opinioni i “Hill”, sipas dokumenteve që i ka siguruar gazeta, mban datën e dhjetorit 2017.

Përkundër kësaj, Qeveria e Kosovës ka vendosur të paguajë 53 milionë euro për këtë kompani.

/marr nga Koha.net/

(Artikullin e plotë mund ta lexoni sot në “Koha Ditore”)

Kalendari

Ngjarjet e datës 15 nëntor 2019 - Klinika e Neonatologjisë dhe Shoqata e Neonatologëve të Kosovës, organizojnë Konferencën e I-rë nderkombëtare. (Hotel Garden, ora 9:00)

- Policia e Kosovës në shënim të ditës botërore të përkujtimit të viktimave në trafikun rrugor, në bashkëpunim me Këshillin e Sigurisë në Trafikun Rrugor dhe me Shoqatën e Sigurimeve , do të mbaj tryezë për shënimin e kësaj dite. (Salla Orion në Prishtinë në afërsi të Kino ABC, ora 9:30)

- Ministria e Arsimit, Shkencës dhe Teknologjisë organizon tryezën dhe punëtorinë me temën “Status quo e Zhvillimit të Kërkimit dhe Inovacionit në Kosovë: Ide rreth së ardhmes së K&I në Kosovë”, mbështetur nga Projekti HERAS i cili përkrahet nga Qeveria e Austrisë. (Hotel Sirius, ora 9:30)

- Komisioni i Pavarur për Miniera dhe Minerale mban punëtorinë lidhur me “Udhëzuesin për miradministrimin e aktiviteteve minerare dhe mjedisore. (Hotel Amazona, ora 10:00)

- Programi i Kombeve të Bashkuara për Zhvillim në Kosovë, përmes projektit Interdev 2, organizon një panair me shoqatat e grave prodhuese për të shënuar Ditën Ndërkombëtare të Sipërmarrësisë së Grave. (Qendra Kulturore në Viti, ora 11:00)

- Ministria e Mbrojtjes organizon ceremoninë e certifikimit të rekrutëve të rinj të FSK-së, gjenerata e dytë 2019. (Kazerma 'Adem Jashari' në Komandën e Forcave Tokësore në Prishtinë, ora 11:00)

- Komuniteti artistik organizon takim përkujtimor për regjisoren Arzana Kraja. (Teatri Kombëtar, ora 12:00)

- Organizata ETEA dhe Kuvendi i të Rinjve të Prishtinës organizon ceremoninë e hapjes të minibibliotekës së lagjes Ulpiana. (Te fontana në lagjen Ulpiana, ora 12:00).

- Ministri i MMPH-së, Fatmir Matoshi, do të nënshkruajë gjashtë Udhëzime Administrative që avancojne fushën e kadastrës dhe regjistrimit të pronës. (Zyret e Agjencisë Kadastrale të Kosoves, ndërtesa e Arkivit të Kosovës, ora 14:00)

- Kryetari i Gjykatës Themelore në Gjilan, Ramiz Azizi, do të mbajë një konferencë për media në të cilën do të prezantohet raporti nga muaji korrik deri në muajin tetor për Gjykatën Themelore të Gjilanit, së bashku me Degët e saja. (Gjykata Themelore Gjilan, ora 14:30)

- Mbahet marsh përkujtimor në këmbë nga Lagja Arbëria, rrugës Fehmi Agani deri te Teatri Kombëtar ku do të bëhet ndezja e qirinjve në përkujtim të viktimave që kanë humbur jetën në aksidente në trafikun rrugor. (Kolegji i Shkencave të Aplikuara Teknike “Tempulli”, ora 18:00)

- Mbahet stërvitja e Kombëtares së Kosovës. (Stadiumi ‘Fadil Vokrri’, ora 18:00)

- Galeria e Ministrisë së Kulturës organizn hapjen e ekspozitës individuale të autores Lumjetë Havolli, e titulluar "Is This Me...Or i Do it For You Only!?". (Galeria e Ministrisë së Kulturës, ora 19:00)

- Qendra për Informim dhe Përmirësim Social feston hapjen e Linjës telefonike për parandalim të vetëvrasjes "Linja e Jetës" në Kosovë! (Menza Ramiz Sadiku, ora 21:00)