17 Qershor 2019

Policia apelon drejtuesit e automjeteve që të kenë kujdes

Prishtinë, 4 janar - Për të parandaluar aksidentet rrugore, Policia e Kosovës do të vendosë, në muajin maj, radarë me kamera në çdo rrugë nacionale të Republikës së Kosovës.

Ekspertët e komunikacionit rrugor thonë se fundi i shkurtit do të sjellë akullin e zi, ku mund të sjellë edhe fatalitete të tjera.

Policia bën apel për drejtuesit e automjeteve që të kenë kujdes, sidomos në orët e hershme të mëngjesit, ku për shkak të kohës se ftohtë ka ngrica në rrugë.

Eksperti i komunikacionit, Nol Dedaj, vlerëson se institucionet e vendit nuk janë fare  të përgatitura sa i përket masave mbrojtëse nga aksidentet rrugore.

Ai thotë se drejtuesit e automjeteve në Kosovë kanë mungesë të informacioneve dhe gjatë ngasjes së veturës nuk e kanë të ditur se çka do t’u ndodhë në momente të caktuara. Dedaj paralajmëroi akullin e zi në fund të shkurtit, i cili, sipas tij, mund të shkaktojë edhe aksidente të tjera me fatalitet.

”Nga fundi i muajit të dytë pritet të ndodhë akulli i zi, që drejtuesit dhe popullata nuk janë të informuar se ky faktor mund të sjellë aksidente me pasoja fatale. Në disa vende të Kosovës, ku janë temperaturat e ulëta, bëhet avull dhe ka mjegulla të dendura, në ato raste paraqitet akulli i zi. Do t’i përmendi vetëm dy pika, rruga e Sllatinës dhe rruga e Mazgitit ku shkon për Obiliq, këtu është pasiguri dhe rrezikshmëria për fatalitet është e madhe. Kjo është mungesë e institucioneve tona, të cilat nuk kanë bërë kurrë analiza”, tha ai për Radio Kosovën.

Ai shtoi se duhet bërë aplikacione ku drejtuesit e automjeteve mund të marrin informacione në mënyrë elektronike për pika të caktuara të rrugës që nuk janë të identifikuara.

Për të parandaluar aksidentet me fatalitet, Ministria e Infrastrukturës këtë vit ka bërë një marrëveshje me qeverinë hungareze për implementimin e sistemit inteligjent të menaxhimit të komunikacionit rrugor. Zyrtari për informim i kësaj ministrie, Rexhep Kadriu,  i ka thënë Radio Kosovës se nga muaji maj, në çdo rrugë nacionale të Republikës së Kosovës  do të vendosen radarë me kamera.

 “Në muajin prill apo maj  do të vendosim radarë me kamera nëpër rrugët nacionale të Republikës së Kosovës. Mirëpo, gjatë 2018 kemi bërë përpjekje të mëdha që rrugët tona të kenë një sinjalistikë rrugore të mirë. Ne tash e kemi dyfishuar buxhetin, që shkon në 4 milionë, për investime në sinjalisitikë rrugore”, ka thënë ai.
 
Kadriu shtoi se Ministria e Infrastrukturës,  në bazë të kontratave që ka pasur me operatorët ekonomikë, ka vendosur edhe vija anësore të bardha pas shumë viteve, por, siç thotë ai, nuk janë përfunduar të gjitha e që pritet të përfundohen në përmirësimin e kohës në pranverë.

Zëdhënësi i Policisë së Kosovës, Baki Kelani, ka bërë apel te drejtuesit e automjeteve të kenë kujdes në rrugë, sidomos në orët e hershme të mëngjesit, ku mund të ketë ngrica për shkak të kushteve atmosferike. Ai tregoi se me rastin e shënimit të vitit të ri ka pasur dy aksidente me pasoja fatale. 

Statistikat e përgjithshme për datën 31dhjetor, kanë evidentuar dy aksidente me pasoja fatale. Data 1 janar, ka kaluar pa aksidente fatale ndërsa me datën 2 ka ndodhur një aksident në një fshat të Suharekës,  ku një person ka goditur një këmbësor dhe si pasojë e goditjes, personi ka ndërruar jetë”, ka thënë ai.

Kujtojmë se numri i aksidenteve me fatalitet në Kosovë ka qenë shumë shqetësues. Brenda vitit 2018 kanë humbur jetën 110 persona. 

Kalendari

Ngjarjet e datës 18 qershor 2019

- Mbahet mbledhja e jashtëzakonshme e Kuvendit të Komunës së Prizrenit me pikën e vetme të rendit të ditës në lidhje me kërkesën për pezullim të financimit të klubit të futbollit "KF Liria" dhe formimin e një komisioni prej 5-7 anëtarëve nga ana e Kuvendit. (Salla e mbledhjeve të Kuvendit në Shtëpinë e Bardhë, ora 10:00)

- Drejtorja e USAID-it në Kosovë Lisa Magno viziton Ministrin e Shëndetësis dhe takohet me Ministrin Uran Ismailin. (Ndërtesa e Ministrisë së shëndetësisë, ora 10:00)

- Ministri i Drejtësisë, Abelard Tahiri, së bashku me Kryesuesin e Këshillit Gjyqësor të Kosovës, Skënder Çoçaj vizitojnë Dhomën e Posaçme të Gjykatës Supreme. (Dhoma e Posaçme e Gjykatës Supreme, ora 10:30)

- Kryeministri Ramush Haradinaj bën homazhe dhe merr pjesë në tubimin përkujtimor te lapidari i dëshmorit Basri Canolli - Shpendi në fshatin Marec të Komunës së Prishtinës. (Fshati Marec, ora 11:00)

- Komisioni për Punë të Jashtme, Diasporë dhe Investime Strategjike mban dëgjim publik për Projektligjin për Diasporën. (Ndërtesa e Kuvendit,C-405, ora 11:00)

- Grupi Parlamentar i Lidhjes Demokratike të Kosovës mban konferencën për media. (Ndërtesa e Kuvendit te Kosovës, kati III, para sallës C301, ora 12:30)

- Mbahet ushtrimi gjithëpërfshires, ku do të simulohet një aksident ajror dhe do të reagohet në perputhje me standardet e Agjencionit Evropian per Siguri ne Aviacion. (Terminali i Aeroportit  "Adem Jashari", ora 14:30)

- Mbahet mbledhja e rregullt e Qeverisë së Republikës së Kosovës. (Ndërtesa e Qeverisë, ora 15:00)

- Ambassadori Kosnett do të flasë me rastin e përmbylljes së programit Lidershipi Transformues - Bursat dhe Partneritetet. (Hoteli Emerald, ora 17:30)