05 Dhjetor 2022

Në korrik starton operatori i katërt në Shqipëri

Prishtinë, 31 maj - Një verë me çmime shumë më të lira në aspektin e komunikimit, do të ofroj Postë Telekomi i Kosovës si aksionar në operatorin e katërt në Shqipëri. Menaxhmenti i PTK-së konfirmoi se këtë verë do të nis funksionimin operatori i katërt në Shqipëri dhe GSM “Plus” do të bëhet realitet që në javën e parë të muajit korrik.

Kryeshefi Ekzekutiv i PTK-së, dr. Shyqyri Haxha ishte pjesë e panelit publik në cilësinë e aksionarit të parë në prezentimin e brendit, misionit dhe vizionit të operatorit të katërt në Shqipëri të emërtuar “Plus”.

“PTK-ja, e cila në këtë konzorcium merr pjesë me modelin e ashtuquajtur “Know How”, për të gjithë konsumatorët e vet, që do të udhëtojnë drejt Shqipërisë, qoftë për pushime apo për biznes, e të cilët janë mbi 500 mijë brenda një sezoni turistik – do të ofroj duke nisur nga korriku, çmime shumë më të levërdishme se deri më tash”, ka bërë të ditur me këtë rast dr. Shyqyri Haxha.

Sipas tij, kjo tregon se PTK është në rrugë të mirë që të bëhet lider në rajon konform vizionit dhe misionit të saj në ofrimin e shërbimeve telekomunikuse dhe ofertave atraktive.

Operatori më i ri në tregun shqiptar ka prezantuar arritjet e deritanishme dhe planet afatshkurtra për ofrimin në treg të shërbimeve të tij.

Drejtori Ekzekutiv i ‘Plus-it”, z. Moni Buchnik ka theksuar se kompania ka nënshkruar tashmë marrëveshjet tregtare me furnitorët kryesorë të rrjetit, pas procesit tenderues duke shtuar se disa kompani shqiptare janë kontraktuar për kryerjen e punimeve të nevojshme për ndërtimin e rrjetit: ndërtimin e stacioneve të backbone, stacioneve në terren, stacioneve në godina, ofrimin e shërbimeve dhe pajisjeve elektrike, mirëmbjatjen e rrjetit si dhe shërbimin e sigurisë fizike për rrjetin, etj.

“Plus” do të fokusohet në ndërtimin e një rrjeti cilësor në një kohë rekord, me qëllim përmbushjen e detyrimeve ligjore dhe rregullatore, si dhe në ofrimin e vlerave më të mira të shërbimit ndaj klientëve”, ka pohuar z. Buchnik. Ai ka nënvizuar se kompania synon të shndërrohet në një lider tregu në fushën e telekomunikacionit, duke sjellë vlera të shtuara tek klientët, në mënyrë mjaft domethënëse edhe në emrin e markës së kompanisë: PLUS.

Nga ana e tij, kryetar i Bordit Drejtues të “Plus”, z. Petraq Shomo, deklaroi se “Plus-i” është i vetmi biznes shqiptar në fushën e telefonisë mobile dhe po hyn në një mjedis mjaft konkurrues.

“Ne do të fitojmë besimin e konsumatorëve, jo vetëm për shkak të produktit dhe cilësisë që ne ofrojmë, por edhe për shkak se aktiviteti ynë është një kontribut direkt në ekonominë e vendit dhe në jetën e shqiptarëve. Ne do të hapim në mënyrë direkte dhe indirekte mundësi punësimi si dhe do të krijojmë bashkëpunim me biznesin. Ne do të riinvestojmë paratë e klientëve në Shqipëri për përmirësimin e standardeve të vendit tonë”, ka potencuar z.Shomo.

Operatori “Plus” ka përfunduar procesin e kontraktimit për më shumë se 100 stacione bazë dhe është aktualisht në procesin e ndërtimit të 50 stacioneve të tjera. Mbulimi do të shtrihet në faza, duke filluar nga zona Tiranë–Durrës–Rinas dhe më pas do të shtrihet në qytetet kryesore dhe rrugët kombëtare.

Investitorët kanë planifikuar të investojnë rreth 100 milionë euro gjatë dy viteve të para, prej të cilave rreth 35 milionë janë vendosur aktualisht në dispozicion nga ana e investitorëve shqiptarë. Kompania do të vazhdojë të investojë për optimimizimin e rrjetit dhe shtimin e portofolit të shërbimeve në vitet e ardhshme.

Operatori më i ri do t’u ofrojë klientëve të saj gamën e plotë të shërbimeve GSM, sikurse parashikohet në Autorizimin Individual, me synim penetrimin e shpejtë në treg.

Kalendari

Ngjarjet e datës 5 dhjetor 2022 - Kryetari i Kryeqytetit, Përparim Rama, do të nënshkruajë marrëveshjen me partneritet publiko privat për ndërtimin e tri shkollave të reja dhe ofrimin e shërbimeve të mirëmbajtjes dhe operimit në Komunën e Prishtinës. (Ndërtesa e Vjetër e Komunës së Prishtinës, ora 9:00)

- Instituti i Kosovës për Drejtësi, Grupi për Studime Juridike dhe Politike, Lëvizja Fol, Iniciativa për Progres, Çohu dhe Colombus organizojnë tryezë të rrumbullakët, ku do të diskutohet lidhur me “Reforma në Drejtësi”. (Hotel Sirius, ora 10:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022 interviston Njazi Thaçin, Luigj Imerin, Perparim Kabashin, Nagip Krasniqin, Faruk Hajrizin, Rrezarta Pllanën, Hysen Fazliun, Musa Misinin, Skender Hazirin, Ali Hamitin, Izet Rushitin dhe Krenar Bujupin. (Ndërtesa e Kuvendit, salla N204, ora 11:00)

- Presidentja e Republikës së Kosovës, Vjosa Osmani Sadriu pret në takim Ndihmës Administratoren e USAID-it, Erin E. McKee. (Kabineti i Presidentes,ora 12:00)

- Ministria e Kulturës, Rinisë dhe Sportit në bashkëpunim me UNICEF-it dhe UN Volunteers shënojnë Ditën Ndërkombëtare të Vullnetarizmit. (Kino Armata, sheshi “Zahir Pajaziti”, ora 13:00)

- Instituti i Kosovës për Drejtësi organizon tryezë të rrumbullakët, ku do të prezantohet raporti me titull “Parashkrimi i Korrupsionit”, i cili është rezultat i monitorimit sistematik që IKD i bënë sistemit Gjyqësor dhe atij Prokurorial të Republikës së Kosovës. (Hotel Sirius, ora 13:00)

- Këshilli Rinor Kosovar në bashkëpunim me Kuvendin e të Rinjëve të Ferizajt dhe Komunën e Ferizajt do të mbajë panelin e diskutimit dhe aktivitetin ‘Dita e Vullnetarizmit’ me qëllim të promovimit dhe diskutimit rreth punës vullnetare, nevojave të vullnetarëve dhe aktiviteti i tyre në këtë komunë. (Salla e Kuvendit Komunal në Ferizaj, ora 14:00)

- Lëvizja FOL në kuadër të  “Javës Kundër Korrupsion 2022” mban konferencë për media me ç’rast do të bëjë publikimin e raportit "Masat disiplinore kundër nëpunësit civil për korrupsion dhe shkelje etike". (Hotel Sirius, ora 15:15)

- Kryeministri i Kosovës, Albin Kurti pret në takim Ndihmës Administratoren e USAID-it, Erin E. McKee. (Zyra e Kryeministrit të Republikës së Kosovës, ora 15:45)