27 Maj 2022

Oda Amerikane fillon aktivitetet e javës së vajzave në TIK

Prishtinë, 25 prill - Me qëllim të vetëdijesimit, promovimit dhe motivimit të angazhimit dhe fuqizimit të vajzave në industrinë e TIK, Oda Ekonomike Amerikane në Kosovë, nën patronatin e Komunës së Prishtinës ka filluar me aktivitetet e saja për shënimin e javës së vajzave në TIK, me rastin e Ditës Ndërkombëtare të Vajzave në TIK, e cila shënohet me datë 28 prill.

Gjatë kësaj jave do të organizohen një numër i ngjarjeve, ku folëse të ndryshme nga sektori i TIK do të flasin për mundësitë që kjo industri u ofron vajzave.

Drejtoresha e Shitjes, Marketingut dhe Operacioneve në kompaninë UCX, njëherit edhe Sekretare e Përgjithshme e Bordit të Guvernatorëve të Odës Amerikane, Jeta Zagragja tha se kjo është një industri që me dinamikën dhe kaosin e saj ofron mundësi të zgjidhjes së problemeve dhe se është e rëndësishme të fillohet në moshë të hershme për t’u mbjellë farat e duhura.  

“Duke qenë vetvetja dhe duke pasur disiplinë në vendin e punës, mund të arrini çdo herë atë që dëshironi. Ne gratë nuk kemi nevojë për ndihmë dhe nuk kemi nevojë që të na krijohen mundësi, sepse ne ia dalim vetë, dhe ne krijojmë mundësitë tona duke punuar shumë”, tha Zagragja.

Abetare Gojani, Drejtoreshë Ekzekutive e IPKO Foundation tha se është e rëndësishme që vajzat të jenë të informuara se ky sektor nuk përbëhet vetëm nga gjinia mashkullore, por që ka hapësirë tejet të madhe edhe për përfshirjen e vajzave. Gojani shtoi se natyra detajiste e vajzave është shumë e nevojshme për çdo inxhinier.

Ekspertja e edukimit jo-formal, Ylberina Mala tha se edukimi i vazhdueshëm është shumë i rëndësishëm në këtë industri dhe se përfshirja në të duhet filluar në moshë të re. “Unë gëzohem që të rinjve sot u ofrohen mundësi për të krijuar aftësi, të cilat nuk ofrohen vetëm në shkollë, por të cilat mund të pasurohen edhe nga edukimi joformal, dhe jam e lumtur që i përkas kësaj fushe që ndikon në edukimin e shumë gjeneratave të reja”, tha Mala.  

Liridona Gërxhaliu nga kompania Sonnecto, njëherit edhe moderatore e kësaj ngjarjeje, tha se në ky sektor vazhdon të ketë numër shumë të vogël të vajzave, duke shtuar se këto statistika janë tejet shqetësuese. Ajo shtoi se vajzat i japin vlerë të shtuar kësaj industrie dhe pjesëmarrja e tyre është shumë e rëndësishme.

Kalendari

Ngjarjet e datës 27 maj 2022

- Fillon punimet konferenca “Qasjet Aktuale në Diagnostikimin dhe Menaxhimin e Pacientëve me Sklerozë Multiple, Dita Botërore e Sklerozës Multiple 2022”. (Four Points by Sheraton, Marigona Residencë, ora 9:00)

- Ministri i Ministrisë së Mjedisit, Planifikimit Hapësinor dhe Infrastrukturës, Liburn Aliu raporton para Komisionit për Mjedis, Ushqim, Bujqësi, Planifikim dhe Zhvillim. (Ndërtesa e Kuvendit, salla N302, ora 10:00)

- Drejtoresha e Misionit të USAID-it, Zeinah Salahi, do të flasë në hapjen e Forumit të Bizneseve të Diasporës. (Swiss Diamond Hotel, ora 10:00)

- Kolegji AAB organizon hapjen zyrtare të edicionit të parë të Panairit të Karrierës dhe Punësimit AAB 2022. (Kolegji AAB, ora 10:00)

- Në kuadër të projektit “Evropa Juglindore - Së Bashku Kundër Korrupsionit” mbahet konferenca për media, në të cilën do të prezantohet raporti me titull “Nevoja për institucionalizimin e vlerësimit anti-korrupsion në Kosovë”, në të cilin raport trajtohet ndryshimi e shpeshtë i ligjeve anti-korrupsion dhe nevoja që ndryshimeve të ligjeve tu paraprijë vlerësimi periodik i legjislacionit dhe masave anti-korrupsion. (Hotel Sirius, ora 10:00)

- Oficerë të lartë nga Kroacia dhe Shqipëria që ishin pjesë e UÇK-së bëjnë homazhe në Kompleksin Memorial në Prekaz. (Prekaz, ora 10:00)

-  Zyrtari për Sektorin Privat në USAID, Mathju Kulinajn, bashkë me Ministren e Arsimit, Shkencës, Teknologjisë dhe Inovacionit, Arbërie Nagavci, do të mbajnë fjalë rasti në ceremoninë përmbyllëse të Programit të USAID-it Përkrahje Adoleshentëve pas Mësimit të Rregullt. (Hoteli Emerald, ora 10:30)

- Komuna e Rahovecit bën homazhe te vendi i rënies së dëshmorëve të kombit Sadedin Hajda dhe Mexhit Mustafa. (Hamoc, ora 11:00)

- Komisioni Hetimor Parlamentar në lidhje me menaxhimin e krizës energjetike nga Qeveria e Republikës së Kosovës diskuton rreth emrave të ekspertëve. (Ndërtesa e Kuvendit, salla  N303, ora 11:00)

- Komuna e Rahovecit bën homazhe të vendi i rënies së dëshmorëve të kombit Feim Gashi, Sakip Bellaqa, Përparim Thaqi në fshatin Fortesë. (Fortesë, ora 12:00)

- Qendra për Informim, Kritikë dhe Aksion organizon konferencë për media si pjesë e Javës Kundër Varfërisë Menstruale dhe Stigmatizimit të menstruacioneve. (Para Bibliotekës Kombëtare, ora 12:30)

- Komuna e Rahovecit bën homazhe në vendin e rënies së dëshmorëve të kombit Milaim Morina dhe Xhevdet Krasniqi. (Në rrugën Fortesë-Celinë, ora 13:0)

- Ministrja e  Industrisë, Ndërmarrësisë dhe Tregtisë, Rozeta Hajdari, do të takohet me një delegacion nga Shqipëria, të kryesuar nga ministrja e Ministrisë së Turizmit dhe Mjedisit të Shqipërisë, Mirela Kumbaro, me rastin e organizimit të konferencës “Turizmi i përbashkët Kosovë - Shqipëri”. (Hotel Prishtina, ora 14:00)

- Mbahet konferenca për media e përzgjedhësit Alain Giresse në kuadër të grumbullimit për katër ndeshjet e muajit qershor në UEFA Nations League. (Hotel Emerald, ora 14:00)

- Komuna e Rahovecit bën homazhe në vendin e rënies së dëshmorëve të kombit në fshatin Brestoc. (Brestoc, ora 14:00)

- Kombëtarja e Kosovës i fillon stërvitjet dhe do t’i mbajë dy seanca në Kampin Nacional në Hajvali. (Stërvitja e parë mbahet, ora 10:30 derisa stërvitja e dytë, ora 17:30)