03 Korrik 2020

Goditet grupi ndërkombëtar i krimit kibernetik

Washington, 3 gusht - Autoritetet amerikane njoftojnë se janë kapur vjedhësit kibernetikë, të cilët përvetësuan miliona numra kartash krediti dhe debiti nga disa prej rrjeteve të mëdha komerciale në SHBA.

Autoritetet ligjzbatuese njoftuan arrestimet dhe aktakuzën ndaj tre drejtuesve të grupit të njohur FIN-7 në Evropën Lindore, i dyshuar për disa sulme kibernetike ndaj më shumë se 120 kompanive amerikane midis viteve 2015 dhe 2017.

Kompanitë e vëna në shënjestër nga grupi ishin kryesisht në industrinë e restoranteve, lojrave të fatit dhe mikpritjes, sipas prokurorëve.

Autoritetet identifikuan vetëm shtatë nga bizneset viktima.

"Hetimi vazhdon, nuk kemi asnjë iluzion se e kemi mposhtur plotësisht këtë grup, por i kemi dhënë një goditje të madhe: këta hakerë mendojnë se mund të fshihen pas tastierave në vende të largëta dhe se mund t'i shpëtojnë krahut të gjatë të ligjit amerikan, por e kanë të pamundur,” tha prokurorja e çështjes, Annette Hayes.

Zyrtarët i identifikuan tre të arrestuarit si shtetasit ukrainas Dmytro Fedorov, 44 vjeç, Fedir Hladyr, 33 vjeç dhe Andrii Kolpakov, 30 vjeç.

Hladyr, administratori i sistemeve të dyshuara të grupit, është në paraburgim në Seattle, pas arrestimit në Gjermani në janar dhe ekstradimit në Shtetet e Bashkuara në fillim të majit.

Dy të tjerët janë në paraburgim në Poloni dhe Spanjë në pritje të ekstradimit në Shtetet e Bashkuara.

"Ka qenë një hetim afatgjatë dhe i sofistikuar ndaj një grupi të krimit të organizuar që i kalonte kufijtë e vendeve dhe që e identifikuam përmes ekspertizës së avancuar kibernetike," thotë Jay Tabb, Agjent i posaçëm i FBI-së.

Krimi kibernetik është një biznes global prej 600 miliard dollarësh, sipas ekspertëve. Hakerët janë bërë gjithnjë e më të sofistikuar vitet e fundit, duke e bërë kapjen e tyre më të vështirë.

Por rritja e bashkëpunimit midis kompanive private, firmave të sigurisë në internet dhe agjencive të zbatimit të ligjit ka çuar në një varg goditjesh të këtij lloji krimi gjatë vitit të shkuar.

Kalendari

Ngjarjet e datës 3 Korrik 2020

- Kryeministri i Republikës së Kosovës, Avdullah Hoti, viziton Republikën e Shqipërisë ku do të zhvillojë takim me kryeministrin Edi Rama. (Pallati i Brigadave në Tiranë, ora 10:00)

- Ministri  i Arsimit dhe Shkencës, Ramë Likaj, viziton Komunën e Deçanit, ku pritet në takim nga kryetari Bashkim Ramosaj. (Salla e Asamblesë Komunale, Deçan, ora 10:00)

- Ambasadori hungarez në Kosovë, Laszlo Markusz, viziton Komunën e Gjakovës. (Ndërtesa e Komunës, ora 10:45)

- Lëvizja FOL organizon konferencë për media, me ç’rast do të publikoj raportin “Pagesat e Vendimeve Gjyqësore nga Komunat - Vitet 2017, 2018, 2019”. (Zyret e Lëvizjes FOL, ora 11:00)

- Kryeministri i Kosovës, Avdullah Hoti dhe Kryeministrit të Shqipërisë, Edi Rama mbajnë konferencë e përbashkët për shtyp. (Pallati i Brigadave në Tiranë, ora 11:15)

- Hapet ekspozita “Ditarët e Depresionit” e realizuar nga Ferdi Limani. (Shtëpia e Evropës në Prishtinë, ora 12:00)

- Banorët e lagjes ”Qendra” protestojnë, të pakënaqur me shërbimet komunale. (Rr.“Rexhep Luci”, ora 12:00)

- Lëvizja Vetëvendosje! mban konferencë për media në të cilën flasin deputetët Arbërie Nagavci dhe Hajrulla Çeku. (Oborri i Kuvendit të Kosovës, ora 13:00)

- Kryeministri i Republikës së Kosovës, Avdullah Hoti takohet me Presidentin e Republikës së Shqipërisë, Ilir Meta. (Presidenca e Shqipërisë, ora 13:10)

- Kryeministri i Republikës së Kosovës, Avdullah Hoti takohet me Kryetarin e Kuvendit të Shqipërisë, Gramoz Ruçi. (Zyra e Kryetarit të Kuvendit, ora 14:00) 

- Komisioni Qendror i Zgjedhjeve mban mbledhjen e radhës. (Selia e KQZ-së, ora 14:00)

- Kryeministri i Republikës së Kosovës, Avdullah Hoti takohet me Kryetarin e Bashkisë së Tiranës, Erion Veliaj. (Zyra e Kryetarit të Bashkisë, ora 14:45)
 
- Kryeministri i Republikës së Kosovës, Avdullah Hoti takohet me Kryetarin e Partisë Demokratike, Lulzim Basha. (Zyra e Kryetarit të PD-së, ora 15:30)