23 Korrik 2021

Franca gjobit “Google” me 50 milionë euro

Paris, 23 janar - Komiteti Kombëtar i Francës për Informatikë dhe Liri (CNIL) gjobiti me 50 milionë euro gjigantin e internetit “Google”,  me arsyetimin se nuk bën informime të qarta për përdorimin e të dhënave personale.

Në komunikatën me shkrim të komitetit CNIL, që është organi zyrtar që kontrollon fshehtësinë e të dhënave personale në Francë, thuhet se dënimi është bërë në kuadër Rregullores së Përgjithshme për Mbrojtjen e të Dhënave Personale (GDPR).

Sipas lajmeve që zënë vend në shtypin francez, Komiteti Kombëtar i Francës për Informatikë dhe Liri është institucioni i parë, i cili në kuadër të rregullores në fjalë gjobit një gjigant të internetit.

Edhe më herët shoqatat “Non Of Your Business” dhe “La Quadrature du Net” kanë paraqitur ankesa të ngjashme ndaj “Google”-it në lidhje me çështjen.

Rregullorja e Përgjithshme për Mbrojtjen e të Dhënave Personale (GDPR), e cila hyri në fuqi më 25 maj 2018 në të gjitha vendet e BE-së, përfshin përmirësime në çështjen e mbrojtjes së të dhënave personale ndaj shkeljeve të mundshme. Me anët të rregullores në fjalë, përdoruesit evropian të internetit kanë më shumë kontroll mbi të dhënat e tyre personale dhe kuptojnë më mirë se si përdoren këto të dhëna.

Me rregulloren e re kanë ndryshuar edhe mënyrat e mbledhjes, përpunimit dhe ruajtjes së të dhënave personale të përdoruesve nga institucionet dhe kompanitë. Sipas kësaj rregulloreje kushti për mbledhjen, përpunimin, shpërndarjen dhe ruajtjen e të dhënave personale është që kompanitë ti informojnë plotësisht përdoruesit dhe të marrin leje të qarta nga individët për këto veprime.

Rregullorja përcakton që kompanitë duhet të informojnë organet përkatëse rregulluese brenda 72 orëve në rast se vjen deri tek rrjedhja e të dhënave personale, vjedhja ose përdorimi i tyre jashtë qëllimit.

Nëse bizneset shkelin rregullat e të dhënave personale, autoritetet mund të shqiptojnë gjoba për kompanitë deri në 20 milionë euro ose 4 për qind të xhiros botërore të kompanisë.

Kalendari

Ngjarjet e datës 23 Korrik 2021

- Kryetari i Komunës së Prishtinës Shpend Ahmeti dhe Nënkryetari, Muhedin Nushi do të marrin pjesë në inaugurimin e instalimit të tre mbushësve elektrik për vetura në hapësirën e “Prishtina Parking”. (Mbrapa pallatit të Rinisë, ora 8:45)

- Avokati i Popullit, Naim Qelaj raporton para Komisionit për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione lidhur me zbatimin e rekomandimeve të Avokatit të Popullit dhe koordinimi i aktiviteteve me qëllim tÑ‘ promovimit  të të drejtave të njeriut. (Ndërtesa e Kuvendit, salla N302, ora 10:00)  

- Komisioni për Buxhet, Punë dhe Transfere vazhdon mbledhjen në të cilën do të shqyrtoj Projektligjin për ndryshimin dhe plotësimin e Ligjit mbi ndarjet buxhetore për Buxhetin e Republikës së Kosovës për vitin 2021. (Ndërtesa e Kuvendit, salla C 203, ora 10:00)

- Komuna e Prizrenit mban konsultim publik për “Plotësimin-Ndryshimin e Rregullores për Menaxhimin e Mbeturinave". (Salla e mbledhjeve të Kuvendit Komunal në Shtëpinë e Bardhë, ora 10:00)

- Instituti Demokratik i Kosovës organizon tryezën e diskutimit ku do të publikohet raporti “Transparometrit komunal 2020 & Transparenca e komunave në retrospektivë” i cili shpalos të gjeturat e nivelit të transparencës së institucioneve lokale në 38 komunat e Kosovës bazuar në 48 indikatorë vlerësues të përzgjedhur konform obligimeve ligjore dhe udhëzimeve administrative që rregullojnë punën dhe funksionimin e institucioneve të qeverisjes lokale. (Hotel Sirius, ora 10:00)

- Komisioni për Ekonomi, Industri, Ndërmarrësi dhe Tregti mban dëgjim publik lidhur me mbikëqyrjen e zbatimit të Ligjit për shoqëritë tregtare. (Ndërtesa e Kuvendit, salla N506,ora 11:00

- Komuna e Prishtinës organizon shpërndarjen e pakove mbështetëse bujqësore për fermerët në regjionin e Prishtinës. (Tek objekti i kompanisë “EuroFruti”, në Mramor, ora 11:00)

- Lidhja e Historianëve  të Kosovës ’’Ali Hadri’’ dega në Deçan, përkrahur nga kryetari i komunës Bashkim Ramosaj shënojnë një 100-vjetorin e kryerjes së masakrës ndaj popullsisë së Isniqit nga forcat serbo-malazeze. (Asamblea Komunale në Deçan, ora 11:00)

- Komisioni Qendror i Zgjedhjeve mban mbledhjen e radhës. (Selia e KQZ-së, ora 11:00)

- Zëvendësministri i Arsimit, Shkencës, Teknologjisë dhe Inovacionit, Dukagjin Pupovci, do të mbajë konferencën e rregullt për media. (Ndërtesa e MAShTI, ora 12:00)  

- Mbahet takimi i radhës i Grupit Koordinues Ndërministror për të Drejtat e Njeriut në Republikën e Kosovës, të organizuar nga Zyra për Qeverisje të Mirë. (Ndërtesa e Qeverisë, salla P38, ora 14:00)

- Kryesia e Sindikatës së Punëtoreve të ATK-së mbanë konferencë për media lidhur me grevën që po mbahet në ATK. (Qendra e shërbimit të tatimpaguesve, sheshi Skenderbeu, ora 16:00)

- Ministria e Kulturës, Rinisë dhe Sportit organizon ceremoninë zyrtare te përurimit të shtatores së Fadil Vokrrit. (Stadiumi “Fadil Vokrri”, ora 18:00)

- Pas inaugurimit të shtatores së Fadil Vokrrit do të zhvillohen dy ndeshje revyale të organizuara nga Federata e Futbollit e Kosovës, për nder të ditëlindjes së Legjendës në të cilën do të luajnë veteranët e dy skuadrave në të cilat ka luajtur Vokrri, Llapi dhe Prishtina, derisa më pas do të përballen veteranët e futbollit të Kosovës dhe ata të Shqipërisë. (Stadiumi “Fadil Vokrri”, ora 19:00)

- Drejtoria e Inspekcionit së bashku me Policinë dhe Njësinë Speciale të Kosovës nisin aksion të gjerë në lokalet e qytetit të Mitrovicës për kontrollimin e lokaleve pas shqetësimeve dhe ankesave të vazhdueshme të qytetarëve për zhurmën që po shkaktojnë lokalet e qytetit. (Mitrovicë, ora 20:00)