08 Mars 2021

Facebook, Twitter dhe Instagram bllokuan përkohësisht llogaritë e Presidentit Trump

New York, 7 janar - Gjigandi i medias sociale, Facebook, do të ndalojë Presidentin Donald Trump të postojë në profilin e tij, të paktën deri në përurimin e Presidentit të zgjedhur Joe Biden.

Në një postim që njoftonte këtë lëvizje të paprecedentë, themeluesi i Facebook-ut, Mark Zuckerberg tha se “rreziku për të lejuar Presidentin Trump të përdorë platformën është shumë i madh pas nxitjes së turmës që shkaktoi trazira vdekjeprurëse në ndërtesën e Kongresit të mërkurën”.

Zuckerberg njoftoi se llogaria e Zotit Trump do të mbyllet "për të paktën dy javët e ardhshme" por mund të mbetet e mbyllur edhe për një kohë të pacaktuar.

"Ngjarjet tronditëse të 24 orëve të fundit tregojnë qartë se Presidenti Donald Trump synon të përdorë kohën e tij të mbetur në detyrë për të minuar tranzicionin paqësor dhe të ligjshëm të pushtetit te pasardhësi i tij i zgjedhur, Joe Biden," shkroi Zuckerberg.

Preisdenti Trump ka përdorur vazhdimisht fuqinë e mediave sociale për të përhapur të pavërteta në lidhje me integritetin e zgjedhjeve dhe rezultatet e garës presidenciale. Platforma e mediave sociale, si Facebook, herë pas here ka etiketuar ose hequr disa nga postimet e zotit Trump. Megjithatë këto vendime nuk kanë arritur të kënaqin një numër në rritje të kritikëve të Facebook-ut, që thonë se platformat e mediave sociale kanë mundësuar përhapjen e keqinformimit që është i rrezikshëm.

Por pas trazirave të së mërkurës, drejtuesi i Facebook-ut, Zuckerberg tha se është e nevojshme një qasje më agresive.

"Konteksti aktual tani është krejtësisht i ndryshëm, duke përfshirë përdorimin e platformës sonë për të nxitur kryengritje të dhunshme kundër një qeverie të zgjedhur në mënyrë demokratike," shkroi ai.

Twitter dhe Instagram të mërkurën gjithashtu bllokuan përkohësisht llogaritë e Presidentit Donald Trump, pasi ai postoi vazhdimisht akuza të rreme në lidhje me integritetin e zgjedhjeve. Kompania Twitter tha të enjten se nuk kishte ndonjë vendim tjetër për llogarinë e Zotit Trump.

Jennifer Grygiel, profesore e komunikimit në Universitetin “Syracuse” dhe eksperte për mediat sociale, thotë se ngjarjet e së mërkurës në Uashington DC janë rezultat i drejtpërdrejtë i përdorimit të mediave sociale nga presidenti Trump për të përhapur propagandë dhe dezinformim dhe se platformat duhet të mbajnë disa përgjegjësi për mosveprimin e tyre.

"Kjo është ajo që ndodh," tha zonja Grygiel. "Ne nuk pamë vetëm një thyerje të sigurisë në Kapitol. Rregullat e platformave të mediave sociale janë “thyer” nga presidenti në mënyrë të përsëritur. Ky është dezinformim. Kjo ishte një përpjekje grusht shteti në Shtetet e Bashkuara ”, shtoi profesorja e komunikimit në Universitetin “Syracuse”. Ajo theksoi se vendimet e dy platformave (Twitter dhe Facebook) janë shumë pak dhe u morën shumë vonë.

Deri më tani, YouTube nuk ka ndërmarrë veprime të ngjashme, megjithëse njoftoi se hoqi një video të presidentit Trump.

Sipas ekspertëve presidenti Trump ka shfrytëzuar mediat sociale - veçanërisht Twitter-in - si një mjet i fuqishëm për përhapjen e dezinformatave në lidhje me zgjedhjet. Në një deklaratë të enjten në mëngjes, zoti Trump tha se do të kishte një "tranzicion të rregullt në 20 Janar" dhe pranoi humbjen në zgjedhje për herë të parë. Ndihmësit e tij postuan deklaratën në Twitter sepse llogaria e tij ishte ende e pezulluar.

Kalendari

Ngjarjet e datës 8 Mars 2021

- Mbahet seanca gjyqësore kundër të pandehurit I.L. për vepren penale 'Keqpërdorimi seksual i personave nën moshën gjashtëmbëdhjetë vjet'. (Gjykata Themelore në Ferizaj, ora 9:30)

- Kryeministri në detyrë, Avdullah Hoti merr pjesë në aktivitetin “Shënimi i 8 Marsit- Dita Ndërkombëtare e Gruas”, me ç’rast do të bëhet edhe nënshkrimi i marrëveshjeve me përfitueset e bizneseve të vogla të Grave nga Programi i Rimëkëmbjes Ekonomike  2021 – Masa 4, Faza e dytë. (Ndërtesa e Qeverisë, ora 9:45)

- Qendra për Informim, Kritikë dhe Aksion organizon aksion simbolik për shënimin e Ditës Ndërkombëtare të Gruas. (Sheshi “Skënderbeu” në Prishtinë, ora 10:00)

- Oda e Mjekëve të Kosovës ndan mirënjohje për mjekët në pension dhe për institucionet shëndetësore të rajonit të Mitrovicës që kanë kontribuar në luftën kundër pandemisë COVID-19. (Spitali i Përgjithshëm Mitrovicë, ora 10:00)

- Lëvizja FOL organizon konferencë për media me ç’rast do të bëhet publikimi i raportit “Pasuria e (pa)ndarë - Posedimi i pasurisë nga zyrtaret politike dhe bashkëshortet e zyrtarëve politik”. (Zyrat e Lëvizjes FOL, ora 10:30)

- Sindikata e Punëtorëve të Lotarisë së Kosovës do të protestojë para ndërtesës së Qeverisë. (Ndërtesa e Qeverisë, ora 11:00)  

- Universiteti ''Kadri Zeka'' do të shënojë 8 vjetorin e themelimit! (Ambientet e Universitetit në Gjilan, ora 11:00)

- Me rastin e Ditës Ndërkombëtare të Gruas mbahet marshi “Marshojmë s’festojmë kundër patriarkatit që vret”,  (Nisja nga sheshi “Zahir Pajaziti”, ora 12:00)  

- Shoqata e Gastronomëve organizon marsh protestues në të cilin do të kërkojnë hapje totale për bizneset. (Sheshi “Zahir Pajaziti”, ora 14:00)

 

- Komisioni Qendror i Zgjedhjeve mban mbledhjen e radhës. (Selia e KQZ-se, ora 14:00)

 

- Grupi I çiklizmit “Marakli t’Biciklave” për nder të ditës së gruas - 8 MARSI organizon eventin e radhës Marsho dhe çiklo që do të mbahet nëpër rrugët kryesore të kryeqytetit të Kosovës - Prishtinë. (Sheshi ''Zahir Pajaziti'' në Prishtinë, ora 14:00)

- OJQ “ETEA” dhe biblioteka “Hivzi Sulejmani” organizojnë bashkëbisedim me temën “Mësuesia ndër vite”. (Biblioteka “Hivzi Sulejmani” në lagjen Dardania, ora 16:00)

- Qendra e Artit dhe Komunitetit organizon mbrëmjen e poezisë “Poezi për Fuqi - çdo ditë është 8 mars”. (Teatrin Kombëtar në Prishtinë, ora 19:00)