19 Shtator 2019

MKRS mbështetë financiarisht Komitetin Olimpik

Prishtinë, 3 prill - Ministri i Kulturës, Rinisë dhe Sportit, Kujtim Gashi, ka vizituar sot Komitetin Olimpik të Kosovës ku u prit nga presidenti Besim Hasani.

Me rastin e kësaj vizite, mes MKRS-së dhe KOK-ut u nënshkrua edhe një memorandum bashkëpunimi. Ky memorandum u nënshkrua me qëllim të mbështetjes financiare të KOK-ut me 300 mijë euro për realizimin e objektivave të veta për vitin 2019.

Ministri Gashi tha se mbështetja e tij për sportin në vend nuk do të ndalet dhe këtë po e dëshmon realizimi i shumë objektivave të Ministrisë për avancimin e sportit në vend. Ai tha se prezenca e tij në KOK sot, nuk është vetëm për të nënshkruar memorandumin e bashkëpunimit për vitin 2019 por edhe për të rikonfirmuar mbështetjen për Komitetin dhe për të gjitha organizatat sportive që janë pjesë e Komitetit Olimpik të Kosovës.

“Komiteti Olimpik i Kosovës është ombrellë e sporteve në Kosovë dhe ne jemi shumë të lumtur që e kemi një lidership shumë të përgatitur po ashtu edhe shumë punëtorë të cilët kanë bërë një punë të jashtëzakonshme për vitin e kaluar”, tha ministri Gashi.
 
Ai tha se gjatë takimit janë dakorduar për shtyrjen përpara të ligjit të ri për sport sepse ligji aktual nuk përkon me kërkesat dhe nevojat e kohës.

“Kohëve të fundit ka zhvillime të hovshme në sport andaj na duhet një ligj i cili edhe më tutje e favorizon sportin në Kosovë. Jemi duke punuar me intensitet të madh edhe me strategjinë e sportit që po ashtu është një dokument i rëndësishëm për sportin në Kosovë”, u shpreh ministri Gashi.

Ministri njoftoi edhe për marrjen e vendimit që në objektin ku operon KOK-u ta shfrytëzojë edhe një kat tjetër me qëllim të krijimit të një hapësire më të madhe për zhvillimin e aktiviteteve.
 
Ministri Gashi po ashtu njoftoi se për shkak të sukseseve të njëpasnjëshme të xhudistëve, është vendosur që të mos pritet edhe më tutje për ndarjen e parcelës nga ana Komunës së Pejës për ndërtimin e objektit të xhudos, por bashkë me Federatën e Xhudos të shikohen alternativa tjera për ndërtimin e objektit.

“Jemi dakorduar që pritjeve të Komunës së Pejës për ndarjen e parcelës për objektin e xhudos t’u vije fundi sepse edhe vitin e kaluar edhe këtë vit kemi ndarë mjete financiare dhe nuk po arrijmë të fillojmë ndërtimin e këtij objekti”, theksoi Gashi.

Ndërsa, kryetari i KOK-ut, Besim Hasani, falënderoi ministrin Gashi për përkrahjen e tij dhënë Komitetit Olimpik të Kosovës dhe sportistëve në përgjithësi.
 
Për nënshkrimin e memorandumit, kryetari Hasani tha: “Kjo ka rëndësi të jashtëzakonshme për ne sepse realizimi i planeve dhe objektivave strategjike donë edhe mbështetje financiare”.
 
Ai premtoi se KOK-u do të angazhohet maksimalisht për arritjen e të gjitha objektivave strategjike.

“Përtej memorandumit me ministrin biseduam edhe për çështje tjera që e preokupojnë jo vetëm KOK-un por tërë lëvizjen olimpike, federatat, klubet dhe sportistët që kanë të bëjnë me Ligjin për Sponsorizime. Sportistët dhe drejtuesit e sportit janë shumë të angazhuar në arritjen e objektivave të tyre në mënyrë që ta përfaqësojnë shtetin në mënyrë të dinjitetshme. Por edhe nevoja për përfshirje më të madhe të njerëzve në sport është me rëndësi të jashtëzakonshme kështu që krejt këtë proces do e ndihmojë shumë nënshkrimi i Ligjit. Ftoj deputetët në mbështetje të sportit”, tha Hasani.

“Biseduam edhe për nevojën që edhe Ligji për Sport të harmonizohet me zhvillimet që po ndodhin në lëvizjen olimpike botërore por edhe në sportin në përgjithësi dhe në këtë drejtim jemi në një drejtim me ministrin dhe bashkëpunëtorët e tij”, përfundoi Hasani.
 

Kalendari

Ngjarjet e datës 19 shtator 2019 - Në Universitetin “Ukshin Hoti” në Prizren të zhvillon punimet një punëtori nga Garda Kombëtare e Iowa në SHBA dhe Forcës të Sigurisë së Kosovës. (Universiteti “Ukshin Hoti” në Prizren, ora 8:00)

- Mbahet mbledhja e Kuvendit të Komunës së Mitrovicës. (Salla e Kuvendit të Komunës, ora 10:00)

- Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti, do të vizitojë Komunën e Mamushës  ku do të takoj kryetarin e kësaj komune, Abdülhadi Krasniç , për të diskutuar rreth përgaditjes së Garës Nacionale të Sportit. (Objekti i komunës, ora 10:15)

- Fillon skema e re e projektit per fuqizimin e angazhimit të ndërtimit të pronësisë i financuar nga BE që synon të mbështesë punën e OJQ-së për një Kosovë të gjelbër. (Sheshi Zahir Pajaziti, ora 10:30)

- Në kuadër të Javës për Zhvillim të Qëndrueshëm në Kosovë, Balkan Green Foundation dhe Instituti për Politika Zhvillimore organizojnë eventin që thekson të arriturat dhe ndikimin në komunitet nga projekti “Empower - Engage Build Ownership” i mbështetur nga Zyra e Bashkimit Europian në Kosovë. (Amfiteatri i Sheshit Zahir Pajaziti, ora 10:30)

- Në faqen e KDI-së në Facebook, mbahet bashkëbisedimi LIVE për dialogun Kosovë-Serbi, me kandidaten për kryeministre znj.Vjosa Osmani nga Lidhja Demokratike e Kosovës. (KDI, ora 12:00)

- Lëvizja FOL organizon diskutimin e katërt në kuadër të Forumit FOL Hapur me kandidatin për Kryeministër nga Koalicioni Aleanca për Ardhmërinë e Kosovës, Partia Socialdemokratike. Ramush Haradinaj. (Lëvizjes FOL, ora 13:00)

- Mbahen ndeshjet e ligës së femrave dhe ligës së juniorëve në pingpong. (Ferizaj, ora 18:00)

- Kryetari i Lëvizjes Vetëvendosjes, Albin Kurti takohet me qytetarë të Prishtinës. (Hotel Sirius, ora 18:00)

- Kandidatja e LDK-së për Kryeministre, Dr. Vjosa Osmani, takohet me strukturat dhe qytetarët e Ferizajt. (Restaurant “Fitorja”. ora 18:00)

- Bëhet hapja e ekspozitës personale të piktorit Vehbi Murati, e titulluar “Një ditë e zakonshme shtatori”. (Galeria e Ministrisë së Kulturës, ora 19:00) 

- Kryetari i Lëvizjes Vetëvendosjes, Albin Kurti takohet me banorë te Malishevës së Gjilanit. (Fshati Malishevë, ora 20:00)

 - Kryetari i Lëvizjes Vetëvendosjes, Albin Kurti takohet me banorë te Pozhoranit. Pozhoran, ora 21:00)