26 Tetor 2020

Milan, 23 milionë euro për kualifikimin në çerekfinale

Milano, 17 shkurt - Statistika më e rëndësishme në duelin Milan-Mançester Junajtid nuk janë golat e shënuar në takimet e fundit në kampionat (Milani 3 në portën e Udinezes, ndërsa anglezët 1 ndaj Aston Vilës), apo diferenca nga kryesueset e ligave respektive (kuqezinjtë -9 nga Interi, ndërkohë Mançesteri ka vetëm 1 pikë më pak se Çelsi). 


Shifra, që krijon më së miri idenë sesa i rëndësishëm është kualifikimi në turin e ardhshëm të Champions-it për këto dy skuadra, janë milionat e përfituara gjatë 17 edicioneve të mëparshme të aktivitetit më prestigjioz në rang klubesh: Mançesteri kryeson klasifikimin me 292 milionë euro, ndërsa Milani renditet në vendin e gjashtë, me 219 euro.


Nuk është më çudi që Liga e Kampioneve përbën një burim të domosdoshëm ekonomik për klubet e mëdha në Europë, mbi të gjitha tashmë që janë “zbuluar” borxhet e jashtëzakonshme, ku shifrat më të konsiderueshme i kanë ekipet angleze dhe ato spanjolle.


Kriza ekonomike detyroi Mançesterin dhe Milanin që të shisnin lojtarët më të mirë (Kristiano Ronaldon dhe Kakanë), ndërsa totali prej 60 milionë eurosh që do të marrë klubi fitues i këtij edicioni faraonik në Champions, duket se është më i rëndësishëm sesa vetë lavdia për triumfin në kupë.
Një vit mungesë nga aktiviteti rezultoi shumë i dëmshëm për financat e Milanit, ndërsa gjatë këtij viti, Adriano Galiani ka rigjetur buzëqeshjen për shkak të të ardhurave.

 

Deri më tani, vetëm duke llogaritur premiot (këtu përjashtohen të ardhurat nga biletat, marketingu dhe të drejtat televizive), kuqezinjtë kanë marrë 12.9 milionë euro: 7.1 nga pjesëmarrja në fazën e grupeve, 3 nga kualifikimi në 1/8-at, 1.6 nga fitoret kundër Marsejës dhe Realit të Madridit dhe 1.2 milionë euro nga barazimet me Marsejën, Realin dhe Zyrihun. 


Një sukses përballë Mançester Junajtid, i cili përkthehet kualifikim në çerekfinale, do të “prodhonte” mbi 23 milionë euro. Një shifër për të cilët Milani do të bëjë gjithçka që të mos ta humbasë, edhe pse misioni i italianëve nuk është aspak i lehtë.

 

Parashikimet shohin si të favorizuar skuadrën e Sër Aleks Ferguson, për shkak se britanikët janë një ekip më i konsoliduar, pavarësisht “goditjes” për largimin e Kristiano Ronaldon. 

 


Në anën tjetër, Leonardo po praktikon një modul të ri loje, nëpërmjet të cilit shfrytëzon maksimalisht potencialin e Patos dhe Ronaldinjos, që gjithsesi nuk garanton ekuilibra.

 

Në mënyrë paradoksale, ky handikap nuk u shfrytëzua nga Reali i Madridit, por nga ekipe që janë dukshëm më të dobëta, si Olimpik Marseja dhe Zyrihu. Arma “e fshehtë” e Milanit mund të jetë Devid Bekam, i cili i ka lëshuar sfidën ish-skuadrës së tij:

 

“Mançester, do të të mund, ishin fjalët e mesfushorit anglez. Do të jetë një sfidë emocionuese për mua, pasi jam rritur te Junajtid. Nëse do të shënoj nuk kam për të festuar, në shenjë respekti për ish-klubin dhe ish-tifozët e mi”. 



Ferguson: Milani, më i dobët pa Kaka

Vetëm pak orë përpara se Milani dhe Mançester Junajtid të zbresin në fushën e lojës, sfida ndërmjet dy gjigantëve europianë është “ndezur”. Kuqezinjtë do të presin sot “Djajtë e Kuq” në përballjen e vlefshme për 1/8-at e Champions League.

 

Me klasin dhe elegancën që e karakterizon, Sër Aleks Ferguson nuk ka humbur mundësinë që të “shigjetojë” rivalët e përhershëm në arenën ndërkombëtare. Tekniku skocez, i cili ka ndjekur rivalët të premten në ndeshjen e kampionatit Milan-Udineze, nuk e fsheh opinionin e tij: “Mendoj se është një moment i mirë për t’u ndeshur me Milanin. Ata luajtën në fundjavë, Kaka nuk është më në skuadrën e tyre dhe kanë disa lojtarë të dëmtuar. Në anën tjetër, ne nuk kemi luajtur dhe arritëm të çlodheshim”.



Edhe pse skuadra e Leonardos nuk ka yllin brazilian, që gjatë verës u transferua te Reali i Madridit, Ferguson nuk kërkon të bëjë gabimin që të nënvlerësojë kundërshtarët. “Ata e aktivizonin Kakanë si mesfushor të avancuar, në majën e rombit të mesfushës, pas shpinës së dy sulmuesve. Tashmë po luajnë me skemën 4-3-3 me dy sulmues krahësh dhe tre mesfushorë qendre. Më duhet të pranoj se kanë lojtarë cilësorë dhe me shumë përvojë, si Pato e Ronaldinjo, por edhe ne kemi futbollistë që janë në gjendje të ndryshojnë rrjedhën e ndeshjes”, deklaroi Fergi. 



Megjithatë, drejtuesi i stolit të Junajtid është i sigurt për një fakt: gjysmëfinalja e vitit 2007, kur Milani fitoi 3-0 nuk do të përsëritet. Ai tha: “Tri vjet më parë, në ‘San Siro’, ata dominuan plotësisht, por jam i sigurt që kjo nuk ka për të ndodhur më”. Anglezët duhet të ndryshojnë diçka në formacionin e tyre për shkak të mungesës së Rajan Gigs në repartin ofensiv, por edhe të Xhon O’Shi dhe Nemanja Vidiç në mbrojtje. Për një fanellë titullari përkrah Rio Ferdinand në balotazh janë Xhoni Evans dhe Ues Braun. Në Europë, gjatë këtij sezoni, Junajtid ka fituar gjithmonë në transfertë, por Ferguson nuk e fsheh shqetësimin për rikthimin e Aleksandre Patos.

 

“Braziliani është një lojtar vendimtar, jam i sigurt që Milani do të bëjë të pamundurën, që ai të jetë në formë optimale. Bekam? E njohim shumë mirë, i jashtëzakonshëm me harkimet nga krahët dhe duhet të jemi të kujdesshëm nga goditjet e tij”, përfundoi trajneri i anglezëve.

Kalendari

Ngjarjet e datës 26 Tetor 2020  - Komisioni Hetimor Parlamentar lidhur me procesin e privatizimit në Kosovë interviston ish-Zëvendës Drejtorin Menaxhues në AKM, Ahmet Shala. (Ndërtesa e Kuvendit, N204, ora 10:00)

- Ministria e Punëve të Brendshme, respektivisht Agjencia e Regjistrimit Civil, organizon ceremonin e lëshimit te vulës apostile dhe verifikuese edhe në Komunën e Pejës në të cilën do të jetë edhe ministri i Ministrisë së Punëve të Brendshme, Agim Veliu. (Qendra për Pajisje me Dokumente në  Komunën e Pejës, ora 11:00)

- Komisioni Hetimor Parlamentar në lidhje me menaxhimin e pandemisë së virusit COVID-I9 nga ana e Qeverisë së Republikës së Kosovës njoftohet me dëshmitë e dëshmitarëve të ekipesë vullnetare në Qendrën Karantinë në Prishtinë. (Ndërtesa e Kuvendit, salla C203, ora 11:00)

- Vazhdon seanca gjyqësore me shpalljen e aktgjykimit, lidhur me rastin e T.L. i akuzuar për veprën penale Vrasje e rëndë dhe veprën penale Mbajtja në pronësi, kontroll  ose posedim të paautorizuar të armëve. (Gjykata Themelore në Ferizaj, kati I-rë, salla nr.2, ora 11:00)

- Ministrja e Kulturës, Rinisë dhe Sportit, Vlora Dumoshi, viziton nesër Komunën e Gjilanit. (Teatri i Gjilanit, ora 11:00)

- Komisioni Hetimor Parlamentar lidhur me procesin e privatizimit në Kosovë interviston ish- nëtarin e Bordit të AKM-së, përfaqësues i sindikatave të punëtorëve. (Ndërtesa e Kuvendit, N204, ora 11:00)

- Mbahet mbledhja e Kryesisë së Kuvendit të Republikës së Kosovës. (Ndërtesa e Kuvendit, salla C-301, ora 14:00)

- Komisioni Hetimor Parlamentar në lidhje me menaxhimin e pandemisë së virusit COVID-I9 nga ana e Qeverisë së Republikës së Kosovës njoftohet me dëshmitë e dëshmitarëve Vlora Hasimja, Mjeke nga Qendra Kryesore e Mjekësisë Familjare dhe Lume Sopjani, Infermiere, QKMF. (Ndërtesa e Kuvendit, salla C203, ora 12:30)