23 Janar 2019

Shërbimi Informativ serb e merr në pyetje deputetin e Kuvendit të Kosovës

Prishtinë, 10 dhjetor - Deputeti i Kuvendit të Kosovës, Sllobodan Petroviq i ka deklaruar KMDLNj-së se me datë 8 dhjetor 2018 në pikëkalimin kufitar në Merdare është ndaluar nga policia serbe në ora 11:15 minuta dhe nuk është lejuar ta vazhdojë udhëtimin me pretekst se kanë urdhër nga lartë dhe se këtë e ka kërkuar BIA - Agjencioni për Siguri i Serbisë.

Petroviq ka thënë se e kanë urdhëruar të futet në një zyrë të stacionit policor - pikës policore ku ka qëndruar deri në ora 13:30 kur kanë ardhur dy veta që janë deklaruar se janë nga BIA.

"Me mua kanë biseduar gjysmë ore për situatën në Kosovë, për FSK-në duke deklaruar se 130 serbë e kanë lëshuar FSK-në gjë që edhe unë e kam pohuar mirëpo kam thënë se janë afërsisht 400 serbë që kanë shprehur gatishmëri të bëhen ushtarë të FSK-së."

"Kanë pyetur për Radoiçiqin dhe qëndrimin tim pse jam deklaruar kundër ngujimit të deputetëve të Listës Serbe në Kuvendin e Kosovës. Kam thënë se ne serbët nuk jemi të rrezikuar nga shqiptarët dhe se jam deputet i Kuvendit të Kosovës me vota të qytetarëve sikur që punoj në përputhje me mandatin që e kam si deputet dhe në bazë të ligjeve të vendit."

"Kam kërkuar të më tregojnë nëse jam i arrestuar dhe cilat janë arsyet që më kanë ndaluar dhe nuk më lejojnë ta vazhdojë udhëtimin. Më kanë mbajtur deri  në ora 16:00 për të më liruar, pa kërkuar nga unë ta nënshkruaj ndonjë deklaratë apo dokument tjetër. Për shkak të pasigurisë dhe rrethanave të krijuara jam kthyer për Kosovë, ndonëse kisha planifikuar t’i marrë anëtarët e ngushtë të familjes që ishin në Serbi, për një festë fetare" ka treguar Petroviq.

Deputeti Petroviq i ka thënë KDMLNj-së se ndaj tij po bëhet presion dhe këtë ndalim dhe marrje në pyetje e konsideron si presion për frikësim për shkak të angazhimit të tij politik dhe qëndrimit kundërshtues ndaj veprimeve të LS dhe ekstremistëve të të gjitha ngjyrave.

Këshilli për Mbrojtjen e të Drejtave e të Lirive të Njeriut në Prishtinë edhe më parë ka ngritur zërin ndaj presioneve që janë bërë Sllobodan Petroviqit, aktualisht në mandatin e katërt si deputet i Kuvendit të Kosovës, dy mandate në postin e nënkryetarit të Kuvendit të Kosovës dhe që nga themelimi, Kryetar i Partisë Liberale Serbe.

Në zgjedhjet e fundit në Kosovë është bërë presion nga ekstremistët serbë ndaj z. Petroviq dhe disa antërë të PLS u patën keqtrajtuar fizikisht për çka KMDLNj pati reaguar publikisht duke e denoncuar si kërcënim dhe dhunë ndaj serbëve të Kosovës që janë dëshmuar se janë institucionalistë dhe se i respektojnë ligjet e Kosovës si dhe që janë të integruar , duke bashkëpunuar me shqiptarët dhe komunitetet tjera.

Në kohën kur Serbia kërcënonte se me ushtri do t’i mbrojë serbët (ekstremistët) e Kosovës dhe të cilët i përdorin si mashë, institucionet e Kosovës duhet të reagojnë fuqishëm dhe të dalin në mbrojtje qytetarëve të Kosovës, pavarësisht përkatësisë etnike, fetare dhe bindjeve politike ndaj ndalimeve të paligjshme dhe keqtrajtimeve që u bëjnë autoritetet serbe, në kufi dhe gjatë kalimit nëpër Serbi kurse, rasti i ndalimit dhe marrjes në pyetje i deputetit të Kosovës, z. Sllobodan Petroviq është rast eklatant i shkeljes elementare i të drejtave të njeriut, lirisë së lëvizjes dhe ndalimit arbitrar.

KMDLNj fton të gjitha organizatat për të drejtat e njeriut në Kosovë dhe Serbi të reagojnë kundër dhunës psikike ndaj deputetit të Kuvendit të Kosovës z. Petroviq  sikur që kërkon nga organizatatat ndërkombëtare për të drejtat e njeriut ta ngrejnë zërin e protestës dhe të kundërshtojnë presionin që Serbia ua bënë serbëve të Kosovës në përgjithësi kurse, në rastin konkret z. Petroviq në veçanti.

KMDLNj kërkon nga Qeveria e Kosovës dhe Kryeministri i Kosoës z. Ramush Haradinaj që këto shqetësime dhe ndërhyrje në punët e brendshme të Kosovës t’i adresojë te faktorët ndërkombëtarë për faktin se po ndikojnënë ngritje të tensioneve dhe po shkaktojnë pasiguri te qytetarët serbë të Kosovës që janë të integruar apo duan të integrohen në institucionet e Kosovës. 
 

Kalendari

Ngjarjet e datës 24 janar 2019 - Projekti i financuar nga Bashkimi Evropian “Mbështetje Kodit Civil – faza 2”, i cili po mbështetë Ministrinë e Drejtësisë organizon ngjarjen “Rruga drejt një Kodi Civil modern të Kosovës,”. (Amfiteatri i Madh në ndërtesën e re të Qeverisë, ora 9:30)

- Shefja e Zyrës së BE-së në Kosovë, Nataliya Apostolova do të marrë pjesë në ceremoninë e dorëzimit të Kodit të ri Civil për Kosovën në Ministrinë e Drejtësisë. (Amfiteatri i Madh në ndërtesën e re të Qeverisë, ora 10:00)

- Ministria e Mbrojtjes dhe Ushtria e Kosovës organizojnë aksionin humanitar për dhurimin vullnetar të gjakut për nevojat e Qendrës Kombëtare të Kosovës për Transfuzion të Gjakut. (Komanda e  Forcave Tokësore të FSK-së, kazerma “Adem Jashari” në Prishtinë, ora 10:00)

- Ministri i Infrastrukturës dhe Transportit, Pal Lekaj pret në takim kryetarin e komunës së Prishtinës, Shpend Ahmeti, me të cilin do të nënshkruaj marrëveshje bashkëpunimi. (Kabineti i ministrit te Infrastrukturës dhe Transportit, ora 10:00)

- Lëvizja Vetëvendosje! shënon 100 vjetorin e vdekjes së Ismail Qemalit me homazhe tek shtatorja në Prishtinë. (Prishtinë, ora 10:30)

- Mbahet mbledhja e Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi në të cilën do të diskutohet lidhur me kërkesën e Rektorëve të Universiteteve Publike rreth programeve të pa akredituara. (Ndërtesa e Kuvendit, salla N 303, ora 11:00)

- Me rastin e 90 vjetorit të lindjes së regjisores së mirënjohur të kinemasë shqiptare Xhanfise Keko, nën patronatin e Ministrisë së Kulturës dhe Ambasadës së Shqipërisë, do të shfaqet premierë filmi dokumentar "Koha e pelikulës" i regjisorit Mevlan Shanaj, dedikuar artistes që ia kushtoi krijimtarinë, botës së madhe të fëmijëve të vegjël. (Kino ABC, ora 11:00)
 
- Kryeministri Ramush Haradinaj vizitë pune në ndërmarrjen “Fox Marble”. (Fshati Poturovc në Lipjan, ora 12:30)

- Komisioni për Punë të Jashtme, Diasporë dhe Investime Strategjike, do të mbajë mbledhjen e radhës, në të cilën do te shqyrtohet draft-Planit të punës së Komisionit për vitin 2019. (Ndërtesa e Kuvendit, salla N-302, ora 13:00)

- Mbahet takimi i përbashkët i Këshillit Gjyqësor të Kosovës dhe Këshillit Prokurorial të Kosovës. (Objekti i Sekretariatit të Këshillit Gjyqësor të Kosovës, Rr. “Luan Haradinaj”, ora 14:30)