25 Qershor 2019

Shefi i Shtabit të Forcave të Armatosura të Kroacisë vizitoi Ministrinë e Mbrojtjes

Prishtinë, 11 qershor - Komandanti i Forcës së Sigurisë së Kosovës, gjenerallejtënant Rrahman Rama, priti me ceremoni ushtarake në Ministri të Mbrojtjes shefin e Shtabit të Forcave të Armatosura të Republikës së Kroacisë, gjeneral kolonel Mirko Shundov.

Në takime të ndara të Ministrit të Mbrojtjes, z. Rrustem Berisha, dhe Komandantit të FSK-së, gjenerallejtënant Rrahman Rama, me gjeneralin kroat Mirko Shundov, u bisedua për bashkëpunimin e shkëlqyer ndërmjet Kosovës dhe Kroacisë në fushën e mbrojtjes si dhe u diskutuan planet dhe opsionet për vazhdimin  dhe avancimin e marrëdhënieve bilaterale ndërmjet dy ministrive të Mbrojtjes dhe të dy Forcave tona në të ardhmen.

Me këtë rast, ministri Rrustem Berisha falënderoi gjeneralin kroat për mbështetjen e Kosovës në ndërtimin e paqes dhe stabilitetit, ngritjen dhe avancimin e kapaciteteve mbrojtëse si dhe përkrahjen e vazhdueshme, bazuar në praktikat e kaluara nga vetë Kroacia, për anëtarësimin e Kosovës në iniciativa rajonale dhe në rrugën drejt NATO-s.

Komandanti i FSK-së, gjeneral Rama, gjatë takimit me shefin e Shtabit të Forcave të Armatosura të Kroacisë, gjeneralin Shundov, e njoftoi lidhur me procesin e transicionit dhe rrugën e FSK-së drejt ndërtimit të kapaciteteve mbrojtëse bazuar në mandatin e ri.

“Për ne Kroacia është partner strategjik në rajon, dhe në kuadër të kësaj, ne diskutuam për bashkëpunimin tonë bilateral si dhe mundësinë e avancimit të bashkëpunimit në të gjitha fushat”, deklaroi gjenerallejtënant Rrahman Rama në konferencën për shtyp, të mbajtur me gjeneralin Shundov, pas takimin kokë më kokë midis dy gjeneralëve.

Në fund, gjeneral Rama e falënderoi gjeneralin Shundov për vizitën si dhe kontributin e Ushtrisë Kroate në KFOR dhe në Ekipin Këshillues dhe ndërlidhës të NATO-s për Ministrinë e Mbrojtjes dhe FSK-në.

Shefi i Shtabit të Forcave të Armatosura të Kroacisë deklaroi se Kroacia vazhdon të japë kontribut për paqen dhe sigurinë në Kosovë, ka zotim të plotë për vazhdimin dhe avancimin e bashkëpunimit si dhe është e gatshme që të ofrojë gjithë ekspertizën dhe përvojën e saj të kaluar që të ndihmojë Ministrinë e Mbrojtjes dhe FSK-në në rrugën e anëtarësimit në iniciativa rajonale dhe me gjerë.

Kosova dhe Kroacia kanë marrëveshje të nënshkruar bilaterale që nga viti 2012, në kuadër të së cilës për çdo vit realizohet një gamë e gjerë e aktiviteteve të planifikuar me interes të përbashkët.

Kalendari

Ngjarjet e datës 25 qershor 2019 - Ministri i Punëve të Jashtme i Republikës së Kosovës, Behgjet Pacolli do ta presë në takim ministren e Punëve të Jashtme të Norvegjisë, Ine Eriksen Søreide. (Hapësirat e MPJ-së, ora 8:30)

- The Siracusa International Institute for Criminal Justice and Human Rigths, një Organizatë Joqeveritare italiane organizon Dialogun Strategjik Kombëtar mbi temën e luftës kundër trafikut të paligjshëm. (Hotel Swiss Diamond, ora 9:00)

- Mbahet mbledhja e Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi në të cilën do të diskutohet lidhur me kërkesat e Këshillit Kombëtar Shqiptar nga vizita e përbashkët e realizuar në Luginë të Preshevës (Ndërtesa e Kuvendi, salla C 203, ora 10:00)

- Instituti i Kosovës për Drejtësi me përkrahje të Departamentit të Shtetit Amerikan - Byrosë së Narkotikëve Ndërkombëtar dhe Çështjeve të Zbatimit të Ligjit dhe NED-it do të mbajë konferencë për media, në të cilën do publikohet raporti analitik: “Dështimet në rastet e shënjestruara”. (Hotel Sirius, ora 10:00)

- Ministri i Arsimit, Shkencës dhe Teknologjisë, Shyqiri Bytyqi, do të vizitojë Shkollën Fillore dhe të Mesme të Ulët “Pjetër Bogdani” në Prishtinë, ku do të bëhet dorëzimi i pajisjeve për klubet e mediave, që është donacion i GIZ-it.  (Shkolla “Pjetër Bogdani”, ora 10:00)

- Koalicioni i OJQ-ve për Mbrojtjen e Fëmijëve në Kosovë organizojnë konferencën për media lidhur me Projektligjin për Mbrojtjen e Fëmijëve. (Sheshi “Ibrahim Rugova” përpara objektit të Kuvendit të Republikës së Kosovës, ora 10:00)

- Kryeministri Ramush Haradinaj pret në takim Ministren e Punëve të Jashtme të Norvegjisë, Ine Eriksen. (Ndërtesa e Qeverisë, ora 10:05)

- Kompania Rajonale e Ujësjellësit Prishtina organizon ceremoninë me rastin e shënimit të ditës më të madhe për qytetarët e Fushë Kosovës, lëshimin në funksion të linjës magjistrale për furnizim 24 h me ujë të pijshëm. (Rr. Hajrullah ZymiFushë Kosovë, ora 10:30)

- Drejtoria e Emergjencës dhe Sigurisë në Komunën e Prizrenit organizon aktivitete solemne me rastin e Ditës së Zjarrfikësve të Prizrenit duke filluar me defileun e automjeteve dhe mjeteve zjarrfikëse në unazën e qytetit. (Nisja nga objekti i Shërbimit Zjarrfikës në Prizren, ora 11:00)

- Ministria e Punëve të Brendshme së bashku me UNDP do të organizojnë konferencën për media për vazhdimin e kampanjës për legalizimin e armëve. (Objekti qendrorë i MPB-së, salla P-02, ora 11:00)

- Kryetari Shpend Ahmeti takohet me Kryetarin e qytetit të Des Moines, Iowa të SHBA,  Thomas  Cownie. (Ndërtesa e vjetër e Komunës, ora 11:00)

- Drejtoria e Administratës në Komunën e Prizrenit në bashkëpunim me OJQ Nevo Koncepti organizon tryezë diskutimi me temën Trajtimi i Fëmijëve në Raste të Dhunës dhe Abuzimit. (Hotel Centrum, ora 11:00)

- Ministri i arsimit, Shyqiri Bytyqi raporton para Komisioni për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi lidhur me tekstet e reja shkollore. (Ndërtesa e Kuvendit, salla N 303, ora 12:00)

- Drejtoria e Emergjencës dhe Sigurisë në Komunën e Prizrenit bën demonstrimin i ushtrimeve të kërkim-shpëtimit dhe shuarjes së zjarrit në objektin e shkollës fillore “Heronjtë e Lumës” në fshatin Vërmicë. (Vërmicë, ora 12:00)

- Balkan Green Foundation, Instituti GAP, Grupi për Studime Juridike dhe Politike dhe Instituti për Politika Zhvillimore organizojnë tryezën e rrumbullakët "Kapacitetet e energjisë së ripërtëritshme dhe kost-efektiviteti i tyre,". (Hotel Sirius, ora 13:00)

- Ministri i Ministrisë së Infrastrukturës dhe Transportit, Pal Lekaj raporton para Komisioni për Zhvillim Ekonomik, Infrastrukturë, Tregti, Industri dhe Zhvillim Rajonal lidhur me monopolin në fushën e homologimit të veturave. (Ndërtesa e Kuvendit, salla N 303, ora 13:00)

- Mbahet mbledhja e rregullt e Qeverisë së Kosovës. (Ndërtesa e Qeverisë, ora 14:00)

- Banka Evropiane për Rindërtim dhe Zhvillim organizon ceremoninë e nënshkrimit të kredisë prej 18 milionë eurosh që BERZH-i i ka dhënë parkut energjetik me erë të Kitkës. (Hotel Sirius, ora 15:00)

- Kryeministri Ramush Haradinaj merr pjesë në Ekspozitën e Artizanaleve të ndryshme, nga organizata e grave “Orkide”, në Prizren. (Qendra Kulturore “Yunus Emre”, Prizren, ora 18:00)

- Kryeministri Ramush Haradinaj merr pjesë në shënimin e Javës Egjiptiane në Gjakovë. (Pallati i Kulturës “Asim Vokshi”, Gjakovë, ora 19:00)

- Shkolla Amerikane e Kosovës organizon Inagurimi i kampusit të ri të Shkollës Amerikane të Kosovës. (Shkolla Amerikane e Kosovës, Shkabaj, Prishtinë, ora 20:00)