02 Qershor 2020

MPJD u vjen në ndihmë mijëra shtetasve që po kthehen në Kosovë

Prishtinë, 31 mars - Qindra shtetas të Republikës së Kosovës janë kthyer tashmë në vendlindje, dhe disa qindra të tjerë do të kthehen gjatë ditëve në vijim, pasi në pamundësi për të lëvizur, ngecën nëpër aeroporte ndërkombëtare apo vendet ku ndodheshin për vizitë, punë, trajnime apo shkollim.

E gjithë kjo ndodhi, pasi qeveritë e shumicës së shteteve evropiane të Evropës dhe më gjerë, përfshirë edhe Qeverinë e Republikës së Kosovës, ndaluan fluturimet ndërkombëtare, mbyllën kufijtë shtetëror dhe morën masa të tjera për parandalimin e shpërndarjes së virusit COVID-19 dhe mbrojtjen prej tij.

Me punën dhe angazhimin e jashtëzakonshëm të Ministrisë së Punëve të Jashtme dhe Diasporës, Ambasadave dhe Konsullatave të Republikës së Kosovës nëpër botë, menjëherë, me anë të komunikimit përmes numrave emergjentë, adresave elektronike e rrjeteve sociale, u bë identifikimi dhe ofrua ndihma të gjithë shtetasve tanë që kishin mbetur nëpër aeroportet e huaja.

Shërbimi i Jashtëm diplomatik i Republikës së Kosovës, me udhëzim të Ministrisë, arriti marrëveshje mirëkuptimi me shtete të ndryshme, që t’ju vazhdohet leja e qëndrimit shtetasve kosovarë që kanë mundësi të qëndrojnë. Po ashtu, misionet tona regjistruan në listë për kthim të gjithë shtetasit që konsideroheshin raste emergjente dhe të cilët vendbanim të përhershëm kanë Republikën e Kosovës.

Për kthim në Kosovë u regjistruan: në Zvicër – 481 veta; në Gjermani – 420 veta; në Turqi – 259 veta; Suedi/Finlandë – 116 veta; Belgjikë - 84 veta; Mbretëri e Bashkuar – 61; Shtetet e Bashkuara të Amerikës – po ashtu 61 veta; Slloveni – 58 veta, Francë - 46 veta, dhe dhjetëra shtetas që ndodheshin në disa shtete të tjera. 

Bëjmë të ditur se kthimi në këtë kohë varet nga masat që janë marrë prej shteteve të ndryshme dhe kapacitetet që ofrohen për karranitnim pas kthimit, meqë siç dihet tashmë, kushdo që aktualisht hyn në Kosovë, detyrohet që 14 ditë të qëndrojë i mbyllur në karantinën e caktuar nga institucionet përkatëse.

Ministria e Punëve të Jashtme dhe Diasporës, në koordinim me dikasteret tjera qeveritare, po punon që t’ju vije në ndihmë të gjitha rasteve emergjente, mirëpo njëherësh kërkon mirëkuptim dhe durim nga qytetarët, meqë në këto kushte të jashtëzakonshme për mbarë njerëzimin, mundësitë janë të kufizuara.

Me këtë rast, udhëzohen të gjithë shtetasit që të kenë mirëkuptim dhe të jenë të durueshëm. Ata dhe ato që mund të qëndrojnë në vendet ku ndodhen, të qëndrojnë atje ku janë, të tregohen human dhe të mos rrezikojnë kthimin e rasteve emergjente, të atyre që nuk kanë mundësi të qëndrojnë jashtë vendit.   

Ministria e Punëve të Jashtme dhe Diasporës, me këtë rast dëshiron të falënderojë të gjitha shtetet për bashkëpunimin dhe humanizmin e treguar, dhe po ashtu të falënderojë të gjithë shtetasit kosovarë për mirëkuptimin, si kontribut në kapërcimin e rrezikut që po i kanoset njerëzimit nga pandemia COVID-19.

Kalendari

Ngjarjet e datës 2 Qershor 2020 - Mbahet mbledhja e Kryesisë së Kuvendit në të cilën do të shqyrtohet kërkesa e 61 deputetëve për thirrjen e seancës së jashtëzakonshme të Kuvendit. (Ndërtesa e Kuvendit, salla  C-301, ora 10:00 - mbledhja do të mbahet pa prezencën e mediave)

- Lëvizja Vetëvendosje nisë mbledhjen e nënshkrimeve për peticion “Duam Zgjedhje” (Sheshi “Nënë Tereza”, ora 10:00)

- Mbahet seanca e tretë e Kuvendit të Komunës së Gjilanit. (Holli i Gjimnazit Natyror “Xhavit Ahmeti” në Gjilan, ora 10:00) 

- Në kuadër të Javës së Gjelbër, Komuna e Prishtinës do të organizojë mbjelljen e drunjëve në lagjen Dardania. (Lagja Dardania, ora 11:00)

- Komisioni për Ekonomi, Punësim, Tregti, Industri, Ndërmarrësi dhe Investime Strategjike, shqyrton Raportin vjetor të Komisionit të Pavarur për Miniera dhe Minerale për vitin 2019. (Ndërtesa e Kuvendit, C203, ora 11:00)

- Mbahet mbledhja e Kryesisë së Lidhjes Demokratike të Kosovës ku pas mbledhjes, kryetari i LDK-së, Isa Mustafa mban konferencë për medie. (Selia e LDK-së, ora 16:30)