19 Qershor 2019

Kosova dhe Shqipëria diskutojnë hapjen e pikave të përbashkëta kufitare

Prishtinë, 20 maj - Në Republikën e Shqipërisë po mbahet takimi i dytë koordinues në mes Qeverisë së Republikës së Kosovës dhe Republikës së Shqipërisë, lidhur me marrëveshjet e nënshkruara në nëntor të vitit 2018 në mbledhjen e përbashkët të dy qeverive në Pejë.

Në kuadër të këtij takimi është diskutuar për zbatimin e “Marrëveshjes mes dy vendeve për hapjen e pikave të përbashkëta të kalimit kufitar” dhe përmirësimi i infrastrukturës në pikën kufitare Morinë-Vërmicë.

Ministri i Punëve të Brendshme, z. Ekrem Mustafa theksoi se kjo marrëveshje ka për qellim lehtësimin e qarkullimit kufitar të njerëzve dhe mallrave, duke thjeshtuar dhe përshpejtuar verifikimet kufitare, por njëkohësisht duke siguruar zbatimin e standardeve të kontrollit kufitar.

“Kjo Marrëveshje që nga dita e nënshkrimit ka filluar të implementohet, në atë që tani është Pika e Përbashkët e Kalimit të Kufirit Vermicë/Morinë. Përndryshe, marrëveshja është në proces për tu zbatuar edhe në pikat tjera të kalimit të kufirit Kosovë – Shqipëri”, theksoi ministri Mustafa.

Ai tha se që nga fillimi i implementimit, në Piken e Përbashkët të Kalimit të Kufirit, aplikohet modeli i kontrollit kufitar hyrje/hyrje. Ky model shpejton procedurat e kontrollit kufitar, pa cenuar sigurinë kufitare, pasi që palët kanë ndërlidhur sistemet e kontrollit kufitar dhe të dhënat barten në sistemet e dyja palëve në kohë reale.

Ministri Mustafa vuri në dukje se në implementimin e marrëveshjes ka disa vështirësi për shkak të hapësirës relativisht të vogël dhe infrastrukturës aktuale në pikën Vermicë/Morinë.

Po ashtu ministri i Punëve të Brendshme, z. Ekrem Mustafa, foli edhe për zbatimin e marrëveshjes ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për njohjen reciproke të patentë shoferëve.  

Ai tha se Ministria e Punëve të Brendshme e Kosovës ka bërë  të  gjitha përgatitjet e nevojshme si juridike ashtu edhe teknike, janë prodhuar certifikatat e vërtetimit dhe vlefshmërisë; janë realizuar funksionalizimet e nevojshme elektronike dhe jemi  të  gatshëm për përmbushjen e kësaj marrëveshje.

“Marrëveshja mbi pranimin reciprok të patentë-shoferëve, tani po hyn në fazën e implementimit. Kushtet për implementim janë arritur me datën 6 Maj 2019, pas pranimit të konfirmimit nga autoritetet e Republikës së Shqipërisë, se i kanë përfunduar të gjitha procedurat legjislative sa i përket miratimit”, tha ministri Mustafa.
 

Kalendari

Ngjarjet e datës 19 qershor 2019

- Komisioni Hetimor Parlamentar në lidhje me gjendjen në PTK dhe Vala do të merr vendim për angazhimin edhe të katër ekspertëve për nevoja të komisionit. (Ndërtesa e Kuvendit, salla N 303, ora 9:00)

- Kryetari i Komunës së Gjilanit, Lutfi Haziri, pret në takim ambasadorin e Norvegjisë në Kosovës, Per Strand Sjaastad. (Zyra e kryetarit Haziri, ora 10:00)

- Për nder të Ditës së Çlirimit të Istogut mbahet turnir në ping-pong për nxënës të shkollave. (Saradran, ora 10:00)

- Zyra e BE-së në Kosovë në partneritet me Ambasadën e Suedisë është duke organizuar një ngjarje për nisjen e projektit "Fuqizimi i Sistemit Statistikor në Kosovë 2019-2020". (Agjencia e Statistikave e Kosovës, ora 10:00)

- Mbahet mbledhja e rregullt e Komitetit për Politikë dhe Financa e Komunës së Mitrovicës. (Salla e Mediave të Komunës së Mitrovicës, ora 10:00)

- Mbahet seanca plenare e Republikës së Kosovës. (Ndërtesa e Kuvendit, ora 10:00)

- Mbahet mbledhja e rregullt e Komitetit për Politikë dhe Financa e Komunës së gjashtë të rregullt. (Salla e mbledhjeve të Kuvendit të Komunës së Rahovecit, ora 10:00)

- Ministria e Mjedisit dhe Planifikimit Hapësinor hap zyrtarisht fazën e shqyrtimit publik për hartën zonale. (Ish objektin “Rilindja”, kati përdhese, Amfiteatri i madh, ora 10:30)

- Kryetari i Komunës së Gjilanit, Lutfi Haziri dhe ambasadori i Norvegjisë në Kosovës, Per Strand Sjaastad në mënyrë simbolike bëjnë zbulimin e pllakës së emërtimit të rrugës, te parku i qytetit. (Parku i qytetit në Gjilan, ora 10:30)

- Operatori i Sistemit, Transmisionit dhe Tregut të energjisë elektrike të Kosovës organizon ceremoninë solemne të inaugurimit të Nënstacionit 110/10(20)kV Ilirida - Mitrovica 2, e cila do të mbahet në prani të personaliteteve të shumta si vendore ashtu edhe ndërkombëtare. (Objekti i ri në Mitrovicë, ora 11:00)

- Ministri Kujtim Gashi, do të bëjë përurimin e Stadiumit të Komunës së Kamenicës dhe do të nënshkruan dy memorandume mirëkuptimi për sport dhe rini. (Kamenicë, ora 11:00)

- Komuna e Vitisë dhe Fshati Sllatin e Epërme organizojnë promovimin e librit 'Sllatina e Epërme e Anamoravës - Monografi' e autorëve Fahrush Rexhepi dhe Jusuf Osmani. (Shtëpia e Kulturës në Viti, ora 11:00)

- Zyra e BE-së në Kosovë do të lansojë Fushatën e Administratës së BE-së për Siguri dhe Shëndet në Vend të Punës "Vendet të shëndetshme të punës - Menaxhimi i substancave të rrezikshme 2019”. (Shtëpia e Evropës, ora 11:00)

- Drejtori për Mbrojtje dhe Shpëtim i Komunës së Gjilanit, Sami Spahiu mban konferencë për media për 5 mujorin e punës dhe planifikimin për tre-mujorin e ardhshëm. (Zyra e kryetarit të Komunës së Gjilanit, ora 11:00)

- Me rastin e 8 vjetorit të vdekjes, anëtarë të Kryesisë së LDK-së, bëjnë homazhe te varri i nënkryetares së LDK-së, veprimtares së dalluar të çështjes kombëtare, Nekibe Kelmendi. (Varri i Nekibe Kelmendit, ora 11:00)

- Kryeministri Ramush Haradinaj merr pjesë në përurimin e trafostacionit të ri, në lagjen Fidanishte të Mitrovicës, investim i KOSTT dhe BERZH. (Lagjja Fidanishte, Mitrovicë afër Universitetit Publik “Isa Boletini”, ora 11:30)

- Përfaqësuesit e Brigadës së zjarrfikësve të Saône et Loire, në Francë, bëjnë dorëzimin zyrtar të një automjeti kundër zjarrit dhe 300 veshmbathjeve për zjarrfikësit e Rahovecit. (Agjencia e Menaxhimit të Emergjencave në Hajvali, ora 12:00)

- Komisioni për Zhvillim Ekonomik, Infrastrukturë, Tregti, Industri dhe Zhvillim Rajonal diskuton lidhur me monopolin në fushën e homologimit të veturave, barriera jo tarifore për importin e veturave të reja që kanë origjinën nga BE, e ftuar Ambasadorja e BE-së në Kosovë Nataliya Apostolova. (Ndërtesa e Kuvendit, salla N204, ora 15:30)

- Me rastin e shënimit të Ditës Ndërkombëtare për Eliminimin e Dhunës Seksuale në Konflikt, zyra e UN Women në Kosovë dhe Ambasada e Shteteve të Bashkuara të Amerikës organizojnë në shfaqjen e dokumentarit "Prokurorët", pasuar nga një diskutim me regjisoren e dokumentarit dhe njehkohësisht fituesen e çmimit Emmy, znj. Leslie Thomas. (Kino Armata, ora 17:00)

- Qendra Kinematografike e Kosovës në bashkëpunim me Komunën e Prishtinës dhe Kino Armatën për nder të njëzet vjetorit të çlirimit të qytetit të Prishtinës organizon Javën e Filmit me shfaqjen e filmave "Gardhi" nga Lendita Zeqiri dhe "me dasht‘ me dasht‘ me dasht‘" nga Ilir Hasanaj. (Kino Armata, ora 20:00)

- Mbahet koncerti Recital për flaut- Erëmira Çitaku dhe harpë - Çağatay Akyol, të udhëhequr nga Dafina Zeqiri-Nushi në bashkëpunim me Festivalin “Tingujt e Flautit”. (Bibloteka Kombëtare e Kosovës, ora 20:30)