15 Nëntor 2019

Arrestohen tre persona për gjuajtje me armë zjarri

Prizren, 26 qershor - Policia e Republikës së Kosovës ka bërë të ditur se dje në orët e pasdites Policia në Prizren ka pranuar një informacion për gjuajte me armë zjarri në rrugën transite në afërsi të lagjes ‘Petrovë’.

Ekipet e Policisë kanë reaguar menjëherë në mënyrë profesionale dhe pas një kohe shumë të shkurtër kanë arritur të ndalojnë një automjet të dyshimtë të tipit BMW, ngjyrë e bardhë me targa vendore, ku gjatë kontrollimit kanë vërejtur gjurmë të dëmtimit të automjetit që dyshohet se janë shkaktuar nga arma e zjarrit.
 
Nga hetimet e para të filluara Policia ka arritur të mësojë identitetin e personave të dyshuar,  ka bërë kontrollimin e zonës dhe me njoftimin e prokurorit përveç bastisjes së automjetit, janë bastisur edhe shtëpitë e personave të dyshimtë, ku në njërin lokacion Policia ka gjetur dhe ka sekuestruar në cilësinë e provës materiale 1 (një) armë të tipit AK 47, 1 (një) karikator dhe 15 fishekë të kalibrit 7.62. Gjithashtu në cilësinë e provës është sekuestruar edhe automjeti i tipit BMW, ngjyrë e bardhë me targa vendore si dhe një motoçikletë e tipit Skuter.

Personat e dyshuar të arrestuar në këtë rast janë: D. K. i lindur me 1992; Sh. K. i lindur me 1994 dhe M. Xh. i lindur me 1994

Në këtë operacion Policia me urdhër të prokurorit kompetent ka ndaluar në mbajtje tre personat e dyshimtë për 48 orë, të cilët dyshohet se janë përfshirë në incidentin e gjuajtjes me armë zjarri, ku njëri nga të dyshimtit ka kërkuar ndihmë mjekësore si pasojë e lëndimit nga arma e zjarrit.

       
Rasti është cilësuar si vrasje në tentativë.


 

Kalendari

Ngjarjet e datës 15 nëntor 2019 - Klinika e Neonatologjisë dhe Shoqata e Neonatologëve të Kosovës, organizojnë Konferencën e I-rë nderkombëtare. (Hotel Garden, ora 9:00)

- Policia e Kosovës në shënim të ditës botërore të përkujtimit të viktimave në trafikun rrugor, në bashkëpunim me Këshillin e Sigurisë në Trafikun Rrugor dhe me Shoqatën e Sigurimeve , do të mbaj tryezë për shënimin e kësaj dite. (Salla Orion në Prishtinë në afërsi të Kino ABC, ora 9:30)

- Ministria e Arsimit, Shkencës dhe Teknologjisë organizon tryezën dhe punëtorinë me temën “Status quo e Zhvillimit të Kërkimit dhe Inovacionit në Kosovë: Ide rreth së ardhmes së K&I në Kosovë”, mbështetur nga Projekti HERAS i cili përkrahet nga Qeveria e Austrisë. (Hotel Sirius, ora 9:30)

- Komisioni i Pavarur për Miniera dhe Minerale mban punëtorinë lidhur me “Udhëzuesin për miradministrimin e aktiviteteve minerare dhe mjedisore. (Hotel Amazona, ora 10:00)

- Programi i Kombeve të Bashkuara për Zhvillim në Kosovë, përmes projektit Interdev 2, organizon një panair me shoqatat e grave prodhuese për të shënuar Ditën Ndërkombëtare të Sipërmarrësisë së Grave. (Qendra Kulturore në Viti, ora 11:00)

- Ministria e Mbrojtjes organizon ceremoninë e certifikimit të rekrutëve të rinj të FSK-së, gjenerata e dytë 2019. (Kazerma 'Adem Jashari' në Komandën e Forcave Tokësore në Prishtinë, ora 11:00)

- Komuniteti artistik organizon takim përkujtimor për regjisoren Arzana Kraja. (Teatri Kombëtar, ora 12:00)

- Organizata ETEA dhe Kuvendi i të Rinjve të Prishtinës organizon ceremoninë e hapjes të minibibliotekës së lagjes Ulpiana. (Te fontana në lagjen Ulpiana, ora 12:00).

- Ministri i MMPH-së, Fatmir Matoshi, do të nënshkruajë gjashtë Udhëzime Administrative që avancojne fushën e kadastrës dhe regjistrimit të pronës. (Zyret e Agjencisë Kadastrale të Kosoves, ndërtesa e Arkivit të Kosovës, ora 14:00)

- Kryetari i Gjykatës Themelore në Gjilan, Ramiz Azizi, do të mbajë një konferencë për media në të cilën do të prezantohet raporti nga muaji korrik deri në muajin tetor për Gjykatën Themelore të Gjilanit, së bashku me Degët e saja. (Gjykata Themelore Gjilan, ora 14:30)

- Mbahet marsh përkujtimor në këmbë nga Lagja Arbëria, rrugës Fehmi Agani deri te Teatri Kombëtar ku do të bëhet ndezja e qirinjve në përkujtim të viktimave që kanë humbur jetën në aksidente në trafikun rrugor. (Kolegji i Shkencave të Aplikuara Teknike “Tempulli”, ora 18:00)

- Mbahet stërvitja e Kombëtares së Kosovës. (Stadiumi ‘Fadil Vokrri’, ora 18:00)

- Galeria e Ministrisë së Kulturës organizn hapjen e ekspozitës individuale të autores Lumjetë Havolli, e titulluar "Is This Me...Or i Do it For You Only!?". (Galeria e Ministrisë së Kulturës, ora 19:00)

- Qendra për Informim dhe Përmirësim Social feston hapjen e Linjës telefonike për parandalim të vetëvrasjes "Linja e Jetës" në Kosovë! (Menza Ramiz Sadiku, ora 21:00)