13 Dhjetor 2019

Gjermania e Kosova partner në fushën e shëndetësisë

Prishtinë, 15 korrik - “Gjermania është një nga vendet që ka dhënë më së shumti kontribut në pavarësinë e vendit dhe në procesin e shtet ndërtimit dhe Qeveria e Kosovës është e përkushtuar për ta fuqizuar këtë marrëdhënie, duke e konsideruar shtetin gjerman si partner serioz dhe afatgjatë, në të gjitha fushat”, kështu tha Kryeministri Haradinaj, pasi priti në takim ministrin e Shëndetësisë të Gjermanisë, Jens Spahn.

Në këtë takim Kryeministri Haradinaj e informoi ministrin Spahn për zhvillimet e fundit në vend, duke vënë theks në përparimet në fushën e shëndetësisë.

“Qeveria e Kosovës, me të drejtë e ka rritur rreth 20 për qind buxhetin për shëndetësinë, në të gjitha nivelet e saja për vitin 2019-të, si përpjekje për ta përmirësuar këtë sektor dhe për të përmirësuar shërbimet në fushën e mjekësisë dhe shëndetësia është ndër sektorët me prioritet në vend dhe në këtë drejtim do të vazhdojmë angazhimin tonë”, ka thënë Kryeministri Haradinaj, duke e potencuar faktin që në këtë rrugëtim, partner si Gjermania janë tejet të rëndësishëm dhe se Kosova është vend që përveç ekspertëve të mjekësisë, mund të ofrojë më shumë edhe në aspektin e shërbimeve mjekësore, nga këtu për vendet evropiane, me theks të veçantë për tregun shëndetësorë në Gjermani.

“Kosova ka kapacitete për të ofruar shërbime shëndetësore dhe përcjellëse edhe për Gjermaninë. Ne kemi qenë dëshmitarë që ekspertët tanë tashmë kanë shënuar rezultate dhe suksese në Gjermani dhe vende të tjera, po ajo çka mund të bëjmë është, bashkëpunimi konkret, që nga këtu, me ekspertë tanë, t’i ofrojmë këto shërbime për Gjermaninë dhe ky lloj partneriteti do të jetë në interes të të dyja palëve”, ka thënë Kryeministri Haradinaj.

Kryeministri Haradinaj, falënderoi ministrin Spahn për përkrahjen në vazhdimësi të shtetit të tij dhënë për fushën e shëndetësisë në të gjitha fazat e zhvillimit të këtij sektori në Republikën e Kosovës.

“Që nga paslufta, Kosova ka marrë më shumë se 650 milionë euro donacione nga Gjermania dhe një pjesë e tyre kanë qenë të dedikuara për sektorin e shëndetësisë. Vizita juaj sot është një dëshmi se kjo marrëdhënie duhet të përqendrohet më shumë në një partneritet. Nënshkrimi i një Deklarate të Përbashkët të qëllimit, në të cilën, shkëmbimi i përvojave në fusha të tilla si sigurimi shëndetësor, menaxhimi shëndetësor, kualifikimi i profesionistëve të shëndetësisë dhe mbështetja për akreditimin dhe certifikimin e stafit infermierë janë fusha me interes, për të cilat shprehim angazhimin tone te plote ", tha Kryeministri Haradinaj, duke përmendur, ndër të tjera, Parkun e Inovacionit dhe Trajnimit në Prizren, i cili është një investim gjermano-kosovar dhe mund të shërbejë edhe në këtë partneritet.

Kryeministri Haradinaj, duke e falënderuar Ministrin e Shëndetësisë së Gjermanisë për vizitën ka treguar që Qeveria, prej muajsh ka nisur reforma të përgjithshme në vend, të cilat përfshijnë edhe reformat në shëndetësi dhe arsim, me qëllim të avancimit të këtyre sektorëve dhe vizita e sotme është rast i mirë për t’i parë nga afër këto të arritura dhe mundësitë e zgjerimit të bashkëpunimit ndërshtetërorë.
 

Kalendari

Ngjarjet e datës 13 dhjetor 2019 - Aleanca Kosovare e Bizneseve dhe Ministria e Tregtisë dhe Industrisë organizojnë hapjen e ekspozimit dhe promovimit të prodhimeve vendore në kuadër të “Javëve të Biznesit Kosovar 2019” me moto: Unë Konsumoj Produkte Vendore, Po JU? (Hotel Emerald, ora 9:30)

- Organizata për Fëmijët pa Kujdes Prindëror organizon konferencë nacionale për të diskutuar për situatën e strehimit familjar në Kosovë, për të arriturat, sfidat dhe planet e ardhshme për të zhvilluar me tutje këtë shërbim për fëmijët pa përkujdesje prindërore. (Hotel Sirius, ora 9:30)

- Komisioni i Pavarur për Miniera dhe Minerale organizon takim vjetor informues për përfaqësuesit dhe personat përgjegjës të ndërmarrjeve që merren me shfrytëzimin dhe përpunimin e lëndëve minerare, përpiluesit e plan-programeve të hulumtimit, përpiluesit e projekteve gjeologjike dhe të shfrytëzimit. (Salla e madhe në ndërtesën e Ministrisë së Administratës Publike, ora 10:00)

- Instituti Columbus organizon tryezë diskutimi me temë "Efekti i korrupsionit tek qytetarët: Diskutimi i fondit për trjatimin e pacientëve jashtë institucioneve publike të Kosovës. (Hotel Sirius, ora 10:00)

- Ministria e Tregtisë dhe Industrisë organizon konferencë informuese për zhvillimin e sektorit privat ku do të behet edhe ndarja e mirënjohjeve për “Ndërmarrjet me të suksesshme të vitit 2019”. (Hotel Emerald, ora 10:00)

- Demokraci Plus në bashkëpunim me Fondacionin Konrad Adenauer organizon konferencën lidhur me Procesin e Berlinit dhe obligimet për Sundim të Ligjit dhe Mirëqeverisjen. (Hotel Swiss Diamond, ora 10:00)

- Kryeministri në detyrë Ramush Haradinaj zhvillon vizitë pune në Ministrinë e Mbrojtjes, për të shënuar  një vjetorin e miratimit të tri Ligjeve, Ligjin për Forcën e Sigurisë, Ligjin për Shërbimin në FSK dhe Ligjin për Ministrinë e Mbrojtjes. (Ministria e Mbrojtjes, ora 11:00)

- Komuna e Istogut organizon diskutim publik me qytetar për projekt rregulloren komunale për taksa, ngarekesa dhe gjoba. (Ndërtesa e Komunës së Istogut, ora 11:00)

- Ekipi i Kombëve të Bashkuara në Kosovë së bashku me Klubin Ndërkombëtarë të Prishtinës  organizon panairin e festave të fundvitit. (Ndërtesa e Termokiss në Dardani, ora 12:00)

- Nxënësit finalistë nga e gjithë Kosova të klasave 3-12 do të konkurrojnë në garën e katërtë vjetore Po-e-Zë. (Amfiteatri i Bibliotekës Kombëtare të Kosovës, ora 12:00)

 - Muzeu Kombëtar i Kosovës organizon hapjen e ekspozitës me fotografi 'Bukuria e betonit' nga autori Etienne Rémond. (Muzeu Kombëtar, ora 12:00)

- Kryeministri në detyrë Haradinaj, në përvjetorin e rënies së dëshmorit dhe heroit Mujë Krasniqi, bën homazhe dhe vendos kurora lulesh te shtatorja e heroit. (Klinë, ora 13:00​)

- Hapet panairi “Punimet artizanale përtej kufijve” i organizuar për nder të festave të fundvitit, në kuadër të projektit ndërkufitar Kosovë - Maqedoni Veriore, “Ndërtimi i konkurrencës përmes bashkëpunimit dhe inovacionit: Qasja në tregjet e eksportit për produktet artizanale’’. (Restorant ‘’Planet’’ në Gjilan, ora 14:00)

- Instituti Kosovar për Hulumtim dhe Zhvillim të Politikave organizon tryezë diskutimi me temë: “Ligjërisht (t’pa) diplomuar?” e cilan mbahet me qëllim të diskutimit rreth problemit të verifikimit të diplomave të studentëve të cilët kanë ndjekur studimet pranë Bartësve Privatë të Arsimit të Lartë. (Hotel Sirius, ora 14:00)

- Projekti Climate 4 Change, i cili mbështetet nga Ambasada Norvegjeze dhe nga Fondacioni Kosovar për Shoqëri Civile organizon një debat politik - publik në të cilën do të diskutotohet për klimën. (Salla e Kuqe në Pallatin e Rinisë dhe Sporteve, ora 17:00)

- Ambasadorja e Francës në Kosovë, Marie-Christine Butel, organizon një pritje e cila si qëllim ka promovimin e djathit të Sharrit. (Rezidenca e Francës në Arbëri, ora 17:30)

- Instituti i Kosovës për Drejtësi organizon shfaqjen e dokumentarit “Java Kundër Korrupsionit 2018”.  (Modelarium i Fakultetit te Arkitekturës të Universitetit të Prishtinës, ora 18:00)