18 Nëntor 2019

Stefano Stefani: Realiteti në Kosovë është i pakthyeshëm

Prishtinë, 1 Mars -Ministri i Punëve të Jashtme i Republikës së Kosovës, Skender Hyseni ka pritur sot një delegacion nga Komisioni për Punë të Jashtme dhe Komunitete të Parlamentit të Italisë, kryesuar nga Stefano Stefani, kryetar i këtij komisioni.

Gjatë takimit, ministri Hyseni dhe parlamentarët italianë folën për shumë çështje që kishin të bënin me Kosovën, progresin e saj, zhvillimet e brendshme si dhe raportet me Serbinë.

Ndërsa i falënderoi për ndihmën e vazhdueshme që Italia ka dhënë për Kosovën, veçanërisht pas pavarësisë së saj, ministri Hyseni i njohu parlamentarët italianë me arritjet që Kosova ka bërë në dy vitet e pavarësisë së saj, si dhe shprehu gatishmërinë e Kosovës dhe institucioneve të saj për të punuar sa më shumë për të ardhmen dhe perspektivën evropiane të vendit.

Një temë e posaçme dhe e rrahur gjatë në takim ishte perspektiva e përbashkët evropiane e Kosovës dhe e të gjithave vendeve të Ballkanit Perëndimor, me theks të posaçëm te liberalizimi i vizave.

Ministri Hyseni kërkoi nga bashkëbiseduesit e tij, që Kosova as të mos përjashtohet nga procesi i liberalizimit të vizave dhe as të mos vonohet më shumë se vendet e tjera në përfshirjen e saj në këtë proces.

Procesi i liberalizimit të vizave, theksoi ministri Hyseni, ndërlidhet me çështje të natyrës teknike, për çka edhe nuk ka pse të kthehet e të ndërlidhet me çështje të natyrës politike.

Ndërsa potencoi qëndrimin e qartë të qeverisë së Kosovës për ndërtimin e marrëdhënieve të mira me të gjithë fqinjët, ministri Hyseni i siguroi parlamentarët italianë se, të njëjtin qëndrim dhe interes Kosova ka edhe për marrëdhënie të mira me Serbinë.

Por, theksoi ministri Hyseni, qëndrimi i prerë i institucioneve të Kosovës është se janë të papranueshme skenarët për rinegociata për pavarësinë apo për ndarjen e Kosovës. Pavarësia e Kosovës është e pakthyeshme, theksoi mes të tjerash ministri Hyseni.

Të njëjtin mendim me ministrin e jashtëm të Kosovës ndau edhe kryesuesi i delegacionit, z. Stefano Stefani, i cili pohoi që në krye se realiteti në Kosovë është i pakthyeshëm.

Ministri Hyseni dhe bashkëbiseduesit e tij nga Komisioni i Jashtëm i Parlamentit të Italisë biseduan gjatë edhe për perspektivën evropiane të Kosovës, për EULEX-in dhe shtrirjen e tij në të gjithë territorin e Kosovës si dhe për shumë çështje të tjera me interes dypalësh. 

Kalendari

Ngjarjet e datës 18 nëntor 2019

- Oda Ekonomike e Kosovës do të mbajë konferencë për media në të cilën do të prezentojë hulumtimin rreth opinionit të bizneseve për marrëveshjen Kosovë-Serbi. (Objekti i Odës Ekonomike të Kosovës, ora 9:00)

- Organizata për Demokraci, Anti-korrupsion dhe Dinjitet, ÇOHU! me përkrahjen e Ambasadës së Mbretërisë së Holandës përmes Programit Matra organizon tryezë në të cilën do të publikohet raporti me titull Qasja në Drejtësi. (Hotel Sirius, ora 10:00)

- Qendra e Inovacionit të Kosovës dhe Oda Ekonomike Amerikane në Kosovë organizojnë ceremoninë e hapjes së Javës Globale të Ndërmarrësisë 2019 në Kosovë. (Menza "Ramiz Sadiku" në Prishtinë, ora 10:00)

- Grupi Tematik për të Drejtat e Fëmijëve në Shëndetësi në kuadër të Koalicionit te OJQ-ve për Mbrojtjen e Fëmijëve organizon konferencën për media në te cilën do të prezantojë një dokumet me të dhëna dhe rekomandime për mbrojtjen e ambientit në Kosovë. (Qendra e Resurseve për OSHC, Forumi për Iniciativa Qytetare në Lagjen Pejton, ora 10:00) 

- Instituti i Kosovës për Drejtësi me përkrahje të Departamentit të Shtetit Amerikan - Byrosë së Narkotikëve Ndërkombëtar dhe Çështjeve të Zbatimit të Ligjit dhe NED-it do të organizojë tryezë me titull “Pandëshkueshmëria e korrupsionit”. (Hotel Sirius, ora 10:00)

- Instituti Kërkimor për Çështje Evropiane dhe të Zhvillimit organizon prezantimin e studimit per Çështjen e Kompleksit të Trepçës dhe Çështjen e Reparacioneve për Krimet e Luftës të kryera në Kosovë në Kontekstin e ‘Finales së Madhe’ eventuale ndërmjet Kosovës dhe Serbisë. (Hotel Swiss Diamond, ora 10:00)

- Komuna e Prizrenit në bashkëpunim me PPSE Swisscontact dhe SHB Sharri përuron shtegun turistik të ri Via Ferrata "Panorama". (Gryka e Lumbardhit, 4.5 km nga qendra e qytetit, ora 11:00 - transporti i organizuar nga Komuna e Prizrenit, nisja nga Shtëpia e Bardhë, ora 10:30)

- Në kuadër të aktivitet kulturor kushtuar "Ditet e Alfabetit", promovohet botimi 'Levizja Protestante te shqiptaret 1818-1908" te autorit prof. dr. David Hosaflook. (Biblioteka Kombetare "Pjeter Bogdani", ora 10:30)

- Muzeu Kombëtar i Kosovës hap ekspozitën “Bienalen e Akuarelit Edicioni i 2-të” e cila sjellë vepra arti të artisëve nga 70 vende të botës me rreth 380 piktura. (Muzeu Kombëtar, ora 19:00)

 

- Në kuadër të projektit ' Tell Me More' të perkrahur nga MKRS dhe DKRS dhe të implementuar nga Kuvendi i të Rinjve të Prizrenit do të realizohet shfaqja teatrale në Shtepinë e Kulturës " Xhemajli Berisha ". (Shtëpia e Kulturës në Prizren, ora 20:00)