09 Korrik 2020

Qeveria shkarkon Bordin e Kompanisë Rajonale të Ujësjellësit “Mitrovica”

Prishtinë, 3 qershor - Qeveria në detyrë e Republikës së Kosovës, e drejtuar nga kryeministri Albin Kurti, ka zhvilluar mbledhjen e rregullt, të 39, në të cilën ka miratuar vendimin për ndarje të mjeteve për familjet e minatorëve që humbën jetën dje në minierën e Artanës, ka miratuar masat për parandalimin e keqpërdorimeve në ndërmarrjet publike dhe ka shkarkuar Bordin e Drejtorëve të Ndërmarrjes Publike Kompania Regjionale e Ujësjellësit “Mitrovica” Sh.A..

Qeveria ka aprovuar kërkesën për ndihmë financiare në vlerë prej 60,000.00 € (gjashtëdhjetë mijë euro), për t’i ndihmuar me nga 30,000.00 € (tridhjetë mijë euro) familjarët e dy punëtorëve që tragjikisht humbën jetën në Minierën e Artanës. Këto mjete merren nga nën programi Shpenzimet e Paparashikuara te kategoria e shpenzimeve Rezervat dhe transferohen në kategorinë e shpenzimeve Subvencione dhe Transfere. Të njëjtat do të transferohen në llogaritë e familjarëve të përcaktuara sipas të dhënave bankare.

Në vazhdim të mbledhjes, Qeveria ka miratuar masat për parandalimin e keqpërdorimeve në ndërmarrje publike. Sipas vendimit, ndërmarrjet publike obligohen të krijojnë sistemin e menaxhimit të kontratave publike. Nëse kontratat komerciale përmbajnë zgjedhje për konteste me arbitrazh ndërkombëtar; të drejtën ndërkombëtare ose kontrata që përmbajnë detyrimin e dëmshpërblimit mbi 5 mijë euro, kontratat nuk mund të lidhen pa pëlqimin e ministrit përgjegjës.

Kontratat duhet të jenë në dy gjuhët zyrtare, që shpenzimet e likuiditetet e ndërmarrjes të mos cenohen nga shpenzimet operative dhe të punësimeve të reja. Asnjë ndërmarrje publike nuk lejohet që të caktojë pagë më të lartë se 2500 euro në muaj për një zyrtar të saj pa pëlqimin e ministrit përgjegjës. Ndërmarrjet publike obligohen për transparencë dhe publikim të dokumenteve të tyre, dhe të ju mundësojë qytetarëve pagesën elektronike të faturave për ndërmarrjet që ofrojnë shërbime për qytetarët.

Kabineti qeveritar në mbledhjen e sotme ka shkarkuar Bordin e Ndërmarrjes Publike, Kompania Rajonale e Ujësjellësit “Mitrovica” Sh.A. për shkak të keq menaxhimit dhe të shkeljes së detyrave fiduciare. Nga raporti i auditimit për vitin 2018 shihet se pasqyrat financiare nuk kanë qenë për përputhje me standardet e kontabilitetit sipas ligjit dhe nuk ka prova se drejtorët e tanishëm të bordit kanë thirr në përgjegjësi zyrtarët përgjegjës. Gjithashtu ndërmarrja  ka dështuar në realizimin e projekteve me përkrahje ndërkombëtare dhe si pasojë e mosveprimit është tërhequr ndihma nga Luksemburgu, si i vetmi donator për ndërmarrjen.

Rrethanat e përmendura i kanë dhënë arsye Qeverisë që të konstatojë se Bordi i drejtorëve ka shkelur detyrat fiduciare.

Me po të njëjtin vendim është emëruar Bordi i Përkohshëm i Drejtorëve në këtë përbërje:

1.      Bajram Mustafa, kryesues dhe drejtor;

2.      Nora Ibishaga, drejtore;

3.      Bislim Fetahaj, drejtor; dhe

4.      Edin Hajdarpashiq, drejtor.

Me propozimin e Ministrisë së financave dhe Transfereve, Qeveria ka miratuar vendimet për:

-          Autorizimin e Ministrisë së Financave dhe Transfereve për transferim të mjeteve shtesë për implementimin e Pakos Emergjente Fiskale në vlerë prej 12 milionë eurove te Ministria e Ekonomisë, Punës, Tregtisë, Industrisë, Ndërmarrësisë dhe Investimeve Strategjike;

-          Vendimin që Qeveria e Kosovës të marrë përsipër koston e shpenzimeve për “Kartonin e gjelbër” për vitin 2020; dhe

-          Vendimin për inicimin e themelimit të një mekanizmi të përbashkët me Republikën e Shqipërisë për mirëmbajtjen e rrugëve që lidhin dy vendet.


  

Kalendari

Ngjarjet e datës 9 Korrik 2020 - Mbahet mbledhja e Qeverisë së Kosovës. (Ndërtesa e Qeverisë, ora 9:00)

- Vazhdimi i seancës plenare të Kuvendit të Republikës së Kosovës në të cilën do të behët votimi dhe shqyrtimi i disa Projektligjeve për ratifikimin e Marrëveshjeve ndërkombëtare. (Salla e Kuvendit, ora 10:00)

- Komuna e Prizrenit bën përurimin e stadiumit në Sërbicë të Poshtme, projekt i realizuar nga Drejtoria për Kulturë, Rini dhe Sport ku do të jetë i pranishëm kryetari i Komunës së Prizrenit, Mytaher Haskuka dhe drejtoresha e DKRS-së, Emilija Redzepi. (Nisja do të bëhet nga Shtëpia e Bardhë në Prizren, ora 10:30)

- Vazhdimi i seancës plenare të Kuvendit të Republikës së Kosovës në të cilën do të behët  votimi i Propozim rezolutës nga Raportimi i Kryeministrit të Republikës së Kosovës dhe debati parlamentar lidhur me dialogun Kosovë - Serbi. (Salla e Kuvendit, ora 10:30)

- Në nderim të ushtarit amerikan Alexander Blake Klass, 20 vjeçar nga Willamina e Oregonit, që ka humbur jetën në një incident, që nuk kishte të bënte me veprim të armatosur, Shoqata "Miqtë e Amerikës" do ta ulin në gjysëm shtizë flamurin amerikan. (Sheshi “Bill Clinton” në Prishtinë, ora 11:00)

- Mbahet Seanca plenare e Kuvendit të Republikës së Kosovës. (Salla e Kuvendit, ora 11:00)

- OVL e UÇK-së mban protestë gjithëpopullore me moton “Në mbrojtje të Luftës Çlirimtare”. (Prishtinë dhe qytetet e tjera të Kosovës, ora 12:00)

- Lëvizja Vetëvendosje mban konferencë për media në të cilën flet Albulena Haxhiu. (Zyret e LV-së në Arbëri, ora 13:00)

- Mbahet mbledhja e jashtëzakonshme e Kuvendit Komunal të Rahovecit, në të cilën do të behët shqyrtimi dhe aprovimi i Propozim vendimit për bartjen e mjeteve nga rezervat e buxhetit komunal, nga kategoria pozicionit të pagave në kategorinë e Investimeve Kapitale. (Salla e mbledhjeve të Kuvendit Komunal në objektin e ri të komunës, ora 14:00)

Mbledhja do të mbahet në sallën e mbledhjeve të Kuvendit Komunal, në objektin e ri të komunës.

- Mbahet një takim pune i organizuar nga Ministria e Ekonomisë dhe Ambientit në të cilin do të diskutohet dokumenti - Plani Hapësinor i Parkut Kombëtar Bjeshkët e Nemuna. (Ndërtesa e re e Qeverisë ish-Rilindja, salla e konferencave, kati XVIII, ora 15:00)