12 Prill 2021

Presidenti Sejdiu takoi presidentët Ivanov, Topi e Vujanoviq

Prevallë, 26 qershor - Presidenti i Republikës së Kosovës, dr. Fatmir Sejdiu, në kuadër të Takimit të liderëve të rajonit, ka zhvilluar takime të ndara me Presidentin e Republikës së Maqedonisë, Gjorgi Ivanov, Presidentin e Republikës së Shqipërisë, Bamir Topi, dhe Presidentin e Republikës së Malit të Zi, Filip Vujanoviq.

Takime veç e veç kanë zhvilluar edhe presidentët e tjerë, pjesëmarrës në takim.

Presidenti Sejdiu ka falënderuar presidentët Ivanov, Topi e Vujanoviq për vizitën dhe pjesëmarrjen në takim, që është vazhdimësi e takimeve të liderëve të rajonit, të mbajtura në Vlorë e Ohër, të cilat janë dëshmi e marrëdhënieve shumë të mira mes vendeve dhe në funksion të zgjerimit të mëtejmë të këtij bashkëpunimi në të gjitha fushat me interes të përbashkët.

Në takimin Sejdiu-Ivanov është konstatuar se Kosova dhe Maqedonia kanë marrëdhënie shumë të mira mes vete. Ato nuk kanë asnjë çështje të hapur, por kanë shumë çështje të përbashkëta dhe kanë nënshkruar një varg marrëveshjesh bilaterale në shumë fusha.

Presidenti Ivanov theksoi nga ana e tij se politikat strategjike të Kosovës janë politika strategjike edhe të Maqedonisë, si dhe theksoi synimet e të dyja vendeve për t’u integruar sa më parë në Bashkimin Evropian dhe në NATO.

Presidenti Sejdiu theksoi se Kosova dhe Maqedonia janë përcaktuar për paqe dhe bashkëpunim dhe ato tashmë janë një model i mirë për bashkëpunimin rajonal.

Po ashtu, Sejdiu tha se janë të mirëseardhura përvojat e Maqedonisë në procesin e integrimeve dhe në procesin e liberalizimit të vizave.

Edhe në takimin me Presidentin Topi, Presidenti Sejdiu ka theksuar ndihmën dhe përkrahjen e vazhdueshme që Republika e Shqipërisë i ka dhënë dhe po i jep Republikës së Kosovës. Të dy presidentët kanë theksuar marrëdhëniet shumë të mira midis vendeve, marrëdhënie këto të konkretizuara me shumë marrëveshje të nënshkruara për bashkëpunim në shumë fusha.

Ata kanë theksuar mbështetjen e dyanshme dhe shfrytëzimin e përvojave në procesin e integrimit në institucionet euroatlantike.

Tema të njëjta janë diskutuar edhe në takimin e Presidentit Sejdiu me Presidentin e Republikës së Malit të Zi, Filip Vujanoviq.

Presidenti Sejdiu e falënderoi z.Vujanoviq për përkrahjen që Mali i Zi i ka dhënë Kosovës në periudhën e zhvillimeve të rëndësishme për vendin tonë dhe përkrahjen e vazhdueshme në drejtim të synimeve për integrimet evropiane dhe liberalizimin e vizave.

 Temë e të gjitha takimeve ishin fushat në të cilat mund të zgjerohet edhe më tej bashkëpunimi. Në këtë plan u theksua nevoja e bashkëpunimit sa më të theksuar në fushën e ekonomisë, në liberalizmin e lëvizjes së qytetarëve, në fushën e sundimit të ligjit dhe luftimit të krimit të organizuar e fusha të tjera.

 Presidenti Sejdiu ka përsëritur edhe një herë idenë e krijimit të një Minishengeni për lëvizje të lirë të qytetarëve të rajoni.

  Pas takimeve veç e veç presidentët drekuan së bashku në Prizren, ndërsa nga ora 15:00 do të nisin takimin e përbashkët, për ta përmbyllur takimin me konferencën e përbashkët për media.

 Takimi i liderëve të rajonit ka zgjuar interesimin e madh të medieve, si nga Kosova dhe vendet tjera pjesëmarrëse në takim, ashtu edhe të medieve ndërkombëtare.

 

Kalendari

Ngjarjet e datës 12 Prill 2021

- Agjencia Shtetërore e Arkivave e Kosovës hap Ekspozitën “Vullkani” i Republikës, për nder të 40 Vjetorit të demonstratave të Viti 1981, dhe Ekspozitën “70 Vjet Arkiv”. (Sheshi “Zahir Pajaziti”, ora 10:00)

- Myftiu Naim Tërnava do të japë mesazhin me rastin e fillimit të muajit të bekuar të Ramazanit. (Selia e Kryesisë së BIRK-ut, ora 11:00)

- Partia Demokratike e Kosovës mban konferencë për media, në oborrin e Kuvendit të Kosovës, hyrja nga sheshi qendror. (Oborri i Kuvendit të Kosovës, hyrja nga sheshi, ora 11:30)

- Kryetari i Komunës së Prizrenit, Mytaher Haskuka dhe drejtoresha e Drejtorisë së Turizmit dhe Zhvillimit Ekonomik, Sevil Limani-Kazaz, do të bëjnë lansimin e projektit “View Point”. (Afërsi të fshatit Jabllanicë, ora 12:00)