18 Nëntor 2019

OSBE, Komunat e reja përkundër sfidave veprojnë me sukses

Prishtinë, 19 mars - Komunat e reja, Hani i Elezit, Juniku dhe Mamusha, deri tash kanë vepruar pa vështirësi të mëdha, por përforcimi i pavarësisë të degës së legjislativit dhe kapaciteteve të disa departamenteve si dhe pajtueshmëria me ligjin për përdorimin e gjuhëve mbeten prioritete, thotë vlerësim i prezantuar sot nga OSBE-ja.

Raporti bazohet në kërkimet nga terreni dhe analiza nga stafi i OSBE-së, për punën e ish pilot-njësive komunale pas shndërrimit të tyre në komuna të mirëfillta, nga gushti i vitit 2008 deri në gusht të vitit 2009. Raporti ofron rekomandime për akterët e nivelit qendror dhe lokal, si dhe për komunitetin ndërkombëtar se si të përmirësohen mangësitë e identifikuara.

Raporti adreson fushëveprimin dhe kompetencat komunale, menaxhimin financiar, dhe punën e degëve të legjislativit dhe ekzekutivit si dhe marrëdhëniet institucionale të tri komunave. Po ashtu raporti tregon që transferimi i kompetencave gati ka përfunduar dhe marrëdhëniet me komunat amë mbeten relativisht të mira.

Efikasiteti dhe pavarësia e degës së legjislativit duhet të përmirësohen më tepër, thekson raporti. Përveç kësaj ka nevojë për përforcimin e kapaciteteve të departamenteve të kadastrës, gjeodezisë dhe planifikimit urban si dhe pajtueshmëri më të mirë me ligjin në fuqi për përdorimin e gjuhëve.

“Meqë komunat vazhdojnë të fitojnë përvojë në menaxhimin e punëve të veta, duke përmirësuar infrastrukturën dhe ofruar shërbime për qytetarët, ato do të zhvillojnë edhe më tej kapacitetet për t’iu përgjigjur sfidave më të mëdha,” tha Ambasadori Werner Almhofer, Shef i Misionit të OSBE-së në Kosovë.

Misioni i OSBE-së do të mbështesë tri punëtori për ngritje të kapaciteteve të komunave në mënyrë që të përqendrohet në boshllëqet në fushën e transparencës, pjesëmarrjen e publikut dhe zhvillimin ekonomik. Pritet që së shpejti komunat të marrin veten dhe të vazhdojnë me ngritje të kapaciteteve dhe të përmirësojnë bashkëpunimin ndër-komunal.

Pilot-njësitë komunale e Hanit të Elezit, Junikut dhe Mamushës janë themeluar në korrik të vitit 2005 me miratimin e Rregullores së UNMIK-ut 2000/45 nga Përfaqësuesi Special i Sekretarit të Përgjithshëm të KB në Kosovë. Në gusht të vitit 2008, pilot-njësitë komunale janë shndërruar në komuna të mirëfillta. 

Misioni i OSBE-së në Kosovë  do të përkrahë pajtueshmërinë me parimet e qeverisjes së mirë në komunat në mbarë Kosovën, në vijë me Kartën Evropiane për Vetë-qeverisje Lokale. Misioni po ashtu ka për qëllim promovimin e parimeve themelore të qeverisjes së mirë – duke sjellë shërbimet më afër qytetarëve.

Kalendari

Ngjarjet e datës 18 nëntor 2019

- Oda Ekonomike e Kosovës do të mbajë konferencë për media në të cilën do të prezentojë hulumtimin rreth opinionit të bizneseve për marrëveshjen Kosovë-Serbi. (Objekti i Odës Ekonomike të Kosovës, ora 9:00)

- Organizata për Demokraci, Anti-korrupsion dhe Dinjitet, ÇOHU! me përkrahjen e Ambasadës së Mbretërisë së Holandës përmes Programit Matra organizon tryezë në të cilën do të publikohet raporti me titull Qasja në Drejtësi. (Hotel Sirius, ora 10:00)

- Qendra e Inovacionit të Kosovës dhe Oda Ekonomike Amerikane në Kosovë organizojnë ceremoninë e hapjes së Javës Globale të Ndërmarrësisë 2019 në Kosovë. (Menza "Ramiz Sadiku" në Prishtinë, ora 10:00)

- Grupi Tematik për të Drejtat e Fëmijëve në Shëndetësi në kuadër të Koalicionit te OJQ-ve për Mbrojtjen e Fëmijëve organizon konferencën për media në te cilën do të prezantojë një dokumet me të dhëna dhe rekomandime për mbrojtjen e ambientit në Kosovë. (Qendra e Resurseve për OSHC, Forumi për Iniciativa Qytetare në Lagjen Pejton, ora 10:00) 

- Instituti i Kosovës për Drejtësi me përkrahje të Departamentit të Shtetit Amerikan - Byrosë së Narkotikëve Ndërkombëtar dhe Çështjeve të Zbatimit të Ligjit dhe NED-it do të organizojë tryezë me titull “Pandëshkueshmëria e korrupsionit”. (Hotel Sirius, ora 10:00)

- Instituti Kërkimor për Çështje Evropiane dhe të Zhvillimit organizon prezantimin e studimit per Çështjen e Kompleksit të Trepçës dhe Çështjen e Reparacioneve për Krimet e Luftës të kryera në Kosovë në Kontekstin e ‘Finales së Madhe’ eventuale ndërmjet Kosovës dhe Serbisë. (Hotel Swiss Diamond, ora 10:00)

- Komuna e Prizrenit në bashkëpunim me PPSE Swisscontact dhe SHB Sharri përuron shtegun turistik të ri Via Ferrata "Panorama". (Gryka e Lumbardhit, 4.5 km nga qendra e qytetit, ora 11:00 - transporti i organizuar nga Komuna e Prizrenit, nisja nga Shtëpia e Bardhë, ora 10:30)

- Në kuadër të aktivitet kulturor kushtuar "Ditet e Alfabetit", promovohet botimi 'Levizja Protestante te shqiptaret 1818-1908" te autorit prof. dr. David Hosaflook. (Biblioteka Kombetare "Pjeter Bogdani", ora 10:30)

- Muzeu Kombëtar i Kosovës hap ekspozitën “Bienalen e Akuarelit Edicioni i 2-të” e cila sjellë vepra arti të artisëve nga 70 vende të botës me rreth 380 piktura. (Muzeu Kombëtar, ora 19:00)

 

- Në kuadër të projektit ' Tell Me More' të perkrahur nga MKRS dhe DKRS dhe të implementuar nga Kuvendi i të Rinjve të Prizrenit do të realizohet shfaqja teatrale në Shtepinë e Kulturës " Xhemajli Berisha ". (Shtëpia e Kulturës në Prizren, ora 20:00)