Nisma fuqizohet në Skenderaj
Ai tha se me punën e tij kishte larguar 97 për qind të fshatrave në Skenderaj nga balta, duke shtruar rrugët. Të tjerët, siç thotë ai, kanë bërë fushatë dhe kanë marrë vota me punën e tij.
“Unë ndihem mirë që jam në Skenderaj në një qytet dhe një komunë, që kur kam ardh në qeverisje në 2007-n, si ministër i Transportit, 97 për qind e fshatrave të Skenderajt kanë qenë në lloq. Dhe kur kam dalë në 2008-n, 98 për qind të fshatrave të Skenderajt kanë qenë të asfaltuara. Ka shumë që kanë marrë vota me këto punët e rrugëve”, ka thënë Limaj, shkruan Kosovapress.
Sipas Limajt, vetëm të bashkuar dhe duke e parë atdheun si tërësi, si komplet, atëherë ka pasur rezultat.
“Ky ka qenë vizioni i ushtarëve të UCK-së, kudo edhe në Skenderaj. Në fund të fundit ky ka qenë vizioni i komandantit legjendar të UÇK-së për të çliruar jo vetëm Kosovën por edhe përtej saj, dhe ne si ushtarët e tij e kemi përqafuar këtë vizion, drejt lirisë e pastaj drejt ndërtimit të shtetit të Kosovës."
"Në Skenderaj si në çdo qytet tjetër në Kosovë, dhe këtë kanë dashur ta themi edhe para katër viteve edhe themeluesit tanë para katër viteve këtu, në çdo fshat dhe lagje e rrugë e Kosovës është e jona. Nuk ka pronë të askujt, sa jeni ju të Skenderajt aq jam edhe unë i Skenderajt. Dhe këtë kemi dashtë me thane me tregu që vendi ynë është i të gjithëve, e tani ne dallohemi se kush punon mirë e kush punon keq. Kush e ka me zemër e kush e ka me hile, ata e vendos populli, nuk jemi ne ata që e vendosin”, ka thënë Limaj.
Ish-deputeti dhe ministri nga radhët e PDK-së, që tash udhëheq me partinë që doli nga ndarja e PDK-së para katër viteve, po ashtu tha se nuk ka hyrë në politikë për të mundur askënd, por për fitoren e Kosovës.
“Ne jemi dalë këtu për të ofruar e bashkuar njerëz të mirë, djem të ri e vajza të reja të cilët nuk kanë pasur mundësi me dhanë kontributin e tyre në ndërtimin e shtetit edhe me shfrytëzua rastin dhe me ju shpreh mirënjohje të gjithë themeluesve të Nismës këtu, atyre djemve dhe vajzave që nuk e kanë pasur lehtë para katër viteve me ne si vizion politik.
"Ne duam që djemve dhe vajzave tona t’i japim mundësi për punë dhe ata të shpalosen mbi bazën e talentit të tyre e të kenë mundësi të shprehin të gjithë atë talent e energji pozitive që duan të shfrytëzojnë për të zhvilluar vendin e tyre, për qytetin e tyre. Ne siç thashë asnjëherë nuk kemi hyrë në garë për të mundur të tjerët, ne kur ka qenë koha i kemi mundur ata që është dashur t’i mundim. Ne jemi këtu për të fituar Kosovën, prandaj jemi të bashkuar kështu”, ka thënë Limaj.
Ai ka thënë se dallimet duhet të bëhen mes atyre që duan të punojnë dhe atyre që nuk duan të punojnë. Derisa ka vlerësuar se Nisma ka zgjedhur një gjuhë të bashkëpunimit e komunikimit edhe me kundërshtarët politik. Sipas tij me sharje dhe mashtrime nuk qohet vendi përpara. Në fund, ai tha se nuk mund të priten zgjidhje nëse voton në krye me njerëz që nuk kanë politika njerëzore e moral.
Nderkaq Ish kryeparlamentari, Jakup Krasniqi, tani pjesë e Nismës Social Demokrate ka folur për kohën kur kanë themeluar PDK-në.
Krasniqi tha se PDK-në e kishin nisur si social demokrate, si nevojë për një parti të tillë asokohe në Kosovë, por partia e tij e vjetër sipas tij devijoi rrugën që nisi. Këto komente ai i bëri gjatë fjalimit të tij në hapjen e punës së Kuvendit të Nismës në degën në Skenderaj.
“Thuhet se çdo rrugëtim i ri është i vështirë edhe rrugëtimi i Nismës ishte i vështirë. Pse ishte i vështirë? Ishte i vështirë edhe në nivel të politikës por më i vështirë ishte në nivel të Drenicës. Se ata që qeverisën me Kosovën i frikësuan qytetarët e Drenicës se ata do ta humbin perspektivën e tyre duke mos qenë me Partinë Demokratike, të cilën e kishim themeluar ne. Dhe jam i bindur që kontributin që e kam dhënë në ndërtimin e Partisë Demokratike nuk kam mundur të jap në ndërtimin e Nismës Social Demokrate. Edhe pse Nisma Social Demokrate është në shtratin e vet të themelimit edhe të Partisë Demokratike të Kosovës. Partinë demokratike e kemi filluar si parti social demokrate dhe ajo ka shkuar djathtas e ne e kemi vazhduar rrugëtimin tonë dhe besimin tonë duke qenë të bindur se qytetarëve të Drenasit, të Drenicës e Skenderajt e të çdo cepi të Kosovës i duhen politika social demokrate, politika të « drejtësisë dhe politika solidare”, ka thënë Krasniqi.
Ai po ashtu ka komentuar rreth asaj që dikush mund të konsiderojë se ai dhe bashkëpunëtoret e tij janë të harxhuar në politike, gjë të cilën e ka mohuar. Duke thënë se dikush harxhohet me faqe të bardhe e dikush me faqe të zezë në politikë. Sipas tij, PDK nuk ka përfshirë Drenicën sa duhet as në qeverisje.
“Ju e dini që jemi edhe në Koalicion me PDK-në që gjatë këtyre viteve ka mbledhur vota e vota, për të shkuar me qeverisje të vendit, por ju e dini që tepër pak njerëz nga Drenica kanë qenë në ato institucione. Nisma i ka 6 deputetë në Kuvendin e Kosovës por nga Drenica i ka tre qeveritarë, një ministër dhe dy zëvendësministra”, ka thënë Krasniqi.
Ai po ashtu ka thënë se Nisma do të kërkojë votën në Skenderaj por ka kërkuar që të mos votohen për të kaluarën, ta vlerësojnë kontributin por të votohen për synimin dhe të ardhmen.
Kuvendi i Nismës, ka vazhduar punën duke zgjedhur anëtarët për Komisionin verifikues si dhe ka vazhduar punimet me dyer të mbyllura për media.
